އިންޑަސްޓްރިއަލް ވިލެޖްގައި ތަރައްޤީކޮށްފައިވާ އެފް.އެސް.އެމްގެ ޕެޓްރޯލް ޝެޑުން ޙިދުމަތްދޭން ފަށައިފިއެވެ.
މި ޝެޑުން ޙިދުމަތްދޭން ފެށުމާއި އެކު، އިންޑަސްޓްރިއަލް ވިލެޖްގައި މިހާތަނަށް ހިދުމަތްދެމުން އައި ވަގުތީ ޕެޓްރޯލް ޝެޑުވަނީ ބަންދުކޮށްފައެވެ.
އެފްއެސްއެމުން މައުލޫމާތުދޭގޮތުގައި މި ޕެޓްރޯލް ޝެޑުން ހުކުރު ދުވަސް ފިޔަވާ ކޮންމެ ދުވަހެއްގައި ހެނދުނު އަށަކަށް ރޭގަނޑު އެގާރަ ޖެހުމާއި ހަމައަށް ހިދުމަތް ދޭނެއެވެ. އަދި ހުކުރު ދުވަހު މެންދުރު ފަހު ދޭކުން ރޭގަނޑު އެގާރަ ޖެހުމާއި ހަމައަށް އިންޑަސްޓްރިއަލް ވިލެޖްގެ އެފްއެސްއެމް ޕެޓްރޯލް ޝެޑުން ހިދުމަތް ދޭނެއެވެ.
އިންޑަސްޓްރިއަލް ވިލެޖްގައި ތަރައްޤީކޮށްފައިވާ ޕެޓްރޯލް ޝެޑުގައި 8 ޕަމްޕު ހުރެއެވެ.
އެފްއެސްއެމްއިން ދޭ ޙިދުމަތްތަކުގެ ފެންވަރު ރަނގަޅުކުރުމުގެ ގޮތުން އެކުންފުނިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ޙިދުމަތްދޭ ގަޑިތައް އިތުރުކޮށް، ސްޓެލްކޯ ކައިރީގައި ހުންނަ އެފްއެސްއެމް ޕެޓްރޯލް ޝެޑުން ދަނީ 24 ގަޑިއިރު ޙިދުމަތްދެމުންނެވެ.
ކުރިއަށް އޮތް ރޯދަމަހު އެފްއެސްއެމްގެ ޕެޓްރޯލް ޝެޑްތަކުން ޙިދުމަތްދޭ ގަޑިތަކަށްވެސް ވަނީ ބަދަލުގެނެސްފައެވެ. އެގޮތުން ރޯދަމަހު ރޭގަނޑު އެކެއް ޖަހަންދެން ޕެޓްރޯލް ޝެޑުތަކުން ހިދުމަތް ދިނުމަށް ހަމަޖެހިފައިވާ ކަމަށް އެފް.އެސް.އެމުން މަޢުލޫމާތުދެއެވެ.