އަންނަ ސެޕްޓެމްބަރު މަހުގެތެރޭ ހުޅުވުމަށް ތައްޔާރުވަމުންދާ 'ޕުލްމަން މޯލްޑިވްސް މާމުޓާ' ރިސޯޓަށް މުއައްޒަފުން ހޯދުމުގެ ގޮތުން ކުރިއަށްގެންދާ ހަރަކާތް ފަށައިފިއެވެ.
ހުވަދު އަތޮޅު އުތުރު ބުރި މާމުޓާގައި ތަރައްޤީކޮށްފައިވާ މި ރިސޯޓަށް މުވަައްޒަފުން ހޯދުމުގެ ހަރަކާތް ކުރިއަށް ދަނީ މިއަދު އިރު އޮއްސި ހައެއް ޖެހުމާއި ހަމައަށް ސޯލްޓް ކެފޭ ރެސްޓޯރެންޓްގައެވެ.
މި ހަރަކާތާއި ގުޅޭގޮތުން ޕީއެސްއެމް ނިއުސްއާ ވާހަކަދައްކަމުން، އެރިސޯޓް މެނޭޖަރ ފެބްރިސް ލޮއެކް ވިދާޅުވީ، ރިސޯޓަށް މުވައްޒަފުން ހޮވުމުގައި ދިވެހިންނަށް ޙާއްސަ އިސްކަމެއް ދެއްވާނެ ކަމަށެވެ. އެހެންކަމުން މިއަދު ގެ ހަރަކާތަށް ވީހާވެސް ގިނަ ދިވެހިން ދިއުމަށް އޭނާވަނީ އެދިފައެވެ.
މި ހަރަކާތާއި ގުޅޭގޮތުން މައުލޫމާތުދެއްވަމުން ޕުލްމަން މޯލްޑިވްސް މާމުޓާ ކުލަސްޓަރ ރެޒެވޭޝަން ސުޕަވައިޒަރ މުޙައްމަދު ސަމާހް ވިދާޅުވީ، އިއްޔެ އެކަނިވެސް ސަތޭކައަށް ވުރެ ގިނަ ފަރާތްތަކުން ރެކްރޫޓްމަންޓް ހަރަކާތަށް އައިސް ވަޒީފާގެ މައުލޫމާތުތައް އޮޅުންފިލުވާފައިވާ ކަމަށެވެ.
ފަރަންސޭސިވިލާތުގެ ކުންފުންޏެއް ކަމަށްވާ އެކޯރ ގެ ޕުލްމަން ބުރޭންޑުގެ މި ރިސޯޓުވެގެންދާނީ، ރާއްޖޭގައި ހުޅުވާ މި ބުރޭންޑުގެ ފުރަތަމަ ރިސޯޓަށެވެ. މި ރިސޯޓުގައި 120 ވިލާ ހުރެއެވެ. ކޫއްޑޫ އެއަރޕޯޓުން ލޯންޗެއްގައި ފުރައިގެން މި ރިސޯޓަށް 10 މިނެޓް ތެރޭގައި ދެވެއެވެ.