ދިވެހިވަންތަ ސިފަތަކާއެކު ދިވެހި ސަޤާފަތް ފެންނަ ފަދަ ރިސޯޓެއް ރާއްޖޭގައި ތަރައްޤީކުރުމުގެ ކޮންސެޕްޓެއް އެކުލަވާލުމުގެ މަސައްކަތް ކުރަމުންދާކަމަށް މިނިސްޓަރ އޮފް ޓޫރިޒަމް ޢަލީ ވަޙީދު ވިދާޅުވެއްޖެއެވެ.
ރާއްޖޭގައި ތަފާތު އެކި ކޮންސެޕްޓްތަކަށް ރިސޯޓްތައް ތަރައްޤީކޮށް، ރާއްޖެއަށް އަންނަ ފަތުރުވެރިންނަށް ތަފާތު އެކި ތަޖުރިބާތައް ކުރުމުގެ ފުރުސަތު ފަހިކޮށްދިނުމަކީ މި ސަރުކާރުގެ އަމާޒެކެވެ.
ސަޤާފީ ހިރިގަލު ވަޑާން ކޯސް އިފްތިތާޙްކުރުމަށް ބޭއްވި ރަސްމިއްޔާތުގައި ރާއްޖޭގައި ކަލްޗުރަލް ޓޫރިޒަމް ތަރައްޤީކުރުމަށް ކުރަމުންދާ މަސައްކަތްތަކާއި ގުޅޭގޮތުން ވާހަކަދައްކަވަމުން، ޓޫރިޒަމް މިނިސްޓަރ ޢަލީ ވަޙީދު ވިދާޅުވީ ރާއްޖޭގެ ރައީސުލްޖުމްހުރިއްޔާއަށް އެފަދަ ރިސޯޓެއް ތަރައްޤީކުރުމުގެ ކޮންސެޕްޓް ޓޫރިޒަމް މިނިސްޓްރީގެ ފަރާތުން ހުށަހަޅާނެ ކަމަށެވެ.
"މިނިސްޓްރީ އޮފް ޓޫރިޒަމްއިން މިފަހަރު ރައީސުލްޖުމްހުރިއްޔާއަށް ދިވެހިވަންތަ ދިވެހި ސަޤާފަތް ފެންނަ ރިސޯޓެއް ތަރައްޤީކުރުމުގެ ކޮންސެޕްޓް މިނިސްޓްރީގެ ފަރާތުން ހުށަހަޅާނެ ކަމުގެ ޔަޤީންކަން އަރުވަން،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖޭގެ ފަތުރުވެރިކަން ފުޅާވެ ކުރިއަރައިގެންދާއިރު، ރާއްޖޭގެ ތާރީޙާއި ސަޤާފަތް ރައްކާތެރިކޮށް، އެފަދަ ތަންތަން ހުރި ރަށްތަށް ފަތުރުވެރިކަމަށް ދޫކުރާއިރު، ތާރީޙާއި ގުޅުންހުރި ތަންތަން ހިމާޔަތްކުރެވޭގޮތަށް މެނުވީ އެރަށްތަކުގެ ރިސޯޓްތަރައްޤީ ކުރުމުގެ ހުއްދަ ނުދޭނެ ކަމަށެވެ.
"މިއަހަރު ރިސޯޓް ހަދަން މިނެރޭ ރަށްތަކުގައި ރިސޯޓް ތަރައްޤީވެގެންދާނީ ތާރީޙީ ތަންތަން ދިރުވާ އާލާ ކުރެވިގެން އެފަދަ ތަނެއް ވަނީ ނަމަ، އެފަދަ ތަނެއް ހިމާޔަތް ކުރެވޭ ގޮތަށް މެނުވީ، އެފަދަ ރަށެއްގައި ރިސޯޓް ތަރައްޤީ ވެގެންނުދާނެ ކަމުގެ ޔަޤީންކަންދޭން ބޭނުންވޭ،" މިނިސްޓަރ ވިދާޅުވިއެެވެ.
ރާއްޖޭގެ ސަޤާފީ ޓޫރިޒަމް ތަރައްޤީކުރުމަށް ރާއްޖޭގެ އެކި ސަރަޙައްދުތަކުގައި ކަލްޗަރަލް ސެންޓަރތައް ޤާއިމްކުރުމަށް ސަރުކާރުން ދަނީ މަސައްކަތްކުރަމުންނެވެ. އަދި ރާއްޖޭގެ ތާރީޙާއި ގުޅުންހުރި ބޭރުގެ ޤައުމުތަކުން ބޭނުންވާ މައުލޫމާތުތައް އެއްކުރުމަށް ޤައުމުތަކުގެ އެހީ ހޯދުމުގެ މަސައްކަތް ޓޫރިޒަމް މިނިސްޓްރީން ދަނީ ކުރައްވަމުންނެވެ.