ދިވެހި ރާއްޖެއާއި އެމެރިކާއާއި ދެމެދު ވިޔަފާރިއާއި އިންވެސްޓްމަންޓްގެ ފުރުޞަތުތައް ފުޅާކުރުމަށް މަޝްވަރާ ބައްދަލުވުމެއް ފަށައިފިއެވެ.
ޓްރޭޑް އެންޑް އިންވެސްޓްމެންޓް އެގްރީމެންޓް، ޓީފާގެ ދެވަނަ ޖޮއިންޓް ކައުންސިލް ބައްދަލުވުން ކުރިއަށްދަނީ ހޮޓެލް ޖެންގައެވެ. މި ބައްދަލުވުން ފެށުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރ އޮފް އިކޮނޮމިކް ޑިވެލޮޕްމަންޓް ފައްޔާޟް އިސްމާޢީލްވަނީ ރާއްޖެއާއި އެމެރިކާއާއި ދެމެދު އޮތް ވިޔަފާރިގެ ބަދަހި ގުޅުމާއިގުޅޭގޮތުން ވާހަކަދައްކަވާފައެވެ. އަދި ކުރިމަގުގައި މި ގުޅުން އިތުރަށް ބަދަހިވެގެންދާނެކަމަށް އުއްމީދުކުރައްވާކަމަށްވެސް މިނިސްޓަރު ވިދާޅުވިއެވެ.
މި ބައްދަލުވުމުގައި އިކޮނޮމިކް މިނިސްޓްރީގެ އިސްވެރިންނާއި އެމެރިކާގެ ކަމާއި ގުޅުން ހުރި ބޭފުޅުން ބައިވެރިވެވަޑައިގަންނަވައެވެ.
ޓީފާގެ ޖޮއިންޓް ކައުންސިލްގެ ފުރަތަމަ ބައްދަލުވުން ބާއްވާފައިވަނީ 2014ވަނަ އޮކްޓޯބަރުމަހުއެވެ.