ފަސޭހައިން ރާވާލެވޭ ގޮތަށް ތައްޔާރުކުރާ ފަރުނީޗަރު ވިއްކުމުގައި ކަސްޓަމަރުންގެ މެދުގައި މަޤްބޫލްކަން ހޯދާފައިވާ 'އައިކިއަރ' އިން އެމެރިކާގައި ހިންގާ އެކުންފުނީގެ ފަރުނީޗަރ ފެކްޓަރީ ބަންދުކުރުމަށް ނިންމައިފިއެވެ.
ގޭތެރޭގައި ހިފާ ގެންގުޅޭ ތަކެއްޗާއި، ފަރުނީޗަރު އަދި ބަދިގޭ ސާމާނުފަދަ ތަކެތި ވިއްކާ ސްވިޑެންގެ ކުންފުންޏެއް ކަމަށްވާ 'އައިކިއަރ' އިން އެމެރިކާގައި ޤާއިމްކޮށްފައިވަނީ ފަރުނީޗަރ އުފައްދާ އެންމެ ފެކްޓަރީއެކެވެ.
ވަރޖިނިއާ ސްޓޭޓްގެ ޑެންވިލްގައި ހުންނަ މި ފެކްޓަރީ މިއަހަރުގެ ޑިސެމްބަރުމަހުގެ ނިޔަލަށް ބަންދުކުރުމަށް އައިކިއަރ ކުންފުނިން ވަނީ ނިންމާފައެވެ.
ޢެމެރިކާގައި ހިންގާ ފެކްޓްރީ ބަންދުކުރުމަށްފަހު، އެ ފެކްޓްރީ ބަދަލުކުރުމަށް ނިންމާފައިވާ ޔޫރަޕަށެވެ. މި ބަދަލާއި އެކު ޙަރަދުތައް ކުޑަކުރެވިގެންދާނެ ކަމަށް އައިކިއަރ ކުންފުނިން ހާމަކުރެއެވެ. އެގޮތުން ފަރުނީޗަރުތައް ތައްޔާރުކުރުމަށް ބޭނުންކުރާ ތަކެތީގެ އަގުތައް އެމެރިކާއަށްވުރެ ޔޫރަޕްގައި އަގުހެޔޮކަން އައިކިއަރއިން ފާހަގަކުރެއެވެ.
ޔޫރަޕްގެ ޕޮލެންޑު، ރަޝިއާ އަދި ސްވިޑަންގައި އައިކިއަރއިން އަންނަނީ ފެކްޓްރީތައް ހިންގަމުންނެވެ. 300 އެއްހާސް މުވައްޒަފުންނާއި އެކު ޑެންވިލްގައި އައިކިއަރގެ ފެކްޓަރީ ހުޅުވާފައިވަނީ ދެހާސް އަށްވަނަ އަަހަރުއެވެ. ލަކުޑި ބޭނުންކޮށްގެން ތައްޔާރުކުރާ ހަރުފަތްތަކާއި، ސްޓޯރޭޖް ޔުނިޓްތައް ފަދަ ތަކެތި މި ފެކްޓްރީގައި ހަދައެވެ.
އައިކިއަރއިން ދަނީ ދުނިޔޭގެ 9 ޤައުމެއްގައި ފެކްޓަރީތައް ހިންގަމުންނެވެ. މި ފެކްޓަރީތަކުގައި 20،000 އެއްހާ މުވައްޒަފުން މަސައްކަތްކުރެއެވެ.