ފަސްވަނަ ޓޫރިޒަމް މާސްޓަރ ޕްލޭން އިފްތިތާޙްކުރުމަށް ބާއްވާ ޖަލްސާ، އަންނަ ހޯމަދުވަހު ބޭއްވުމަށް ޓޫރިޒަމް މިނިސްޓްރީން ނިންމަވައިފިއެވެ.
ދަރުބާރުގޭގައި ބާއްވާ މި ޖަލްސާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ބައިވެރިވެވަޑައިގަންނަވާނެ ކަމަށް ޓޫރިޒަމް މިނިސްޓްރީން މައުލޫމާތުދެއްވައެވެ.
މި ހަފްލާއާއި ގުޅޭ މައުލޫމާތުތައް މީޑިއާ އާއި ހިއްސާ ކުރައްވަމުން ޓޫރިޒަމް މިނިސްޓަރ ޢަލީ ވަޙީދު ވިދާޅުވީ، މި ޖަލްސާގައި ޓޫރިޒަމް މާސްޓަރ ޕްލޭންގެ މަސައްކަތް އިފްތިތާޙްކުރުމުގެ އިތުރަށް ރާއްޖޭގެ ރިސޯޓްތަކުގައި މަސައްކަތްކުރާ މުވައްޒަފުންގެ ދަފްތަރު އިފްތިތާޙްކުރުމަށް ހަމަޖެހިފައިކަމަށެވެ.
"ޖުލައިމަހުގެ 29ވަނަ ދުވަހު ޙާއްސަ ޖަލްސާއެއް ބޭއްވުމަށް ވަނީ ހަމަޖެހިފައި، މި ޖަލްސާގައި ޓޫރިޒަމް މާސްޓަރ ޕްލޭންގެ މަސައްކަތް އަދި ރިސޯޓްތަކުގައި މަސައްކަތްކުރާ މުވައްޒަފުންގެ ދަފްތަރު އިފްތިތާޙްކުރުމަށްވަނީ ހަމަޖެހިފައި، މީގެ އިތުރުން ވޯޓަރ ސޭފްޓީ ބޯޑު ޕްރޮގްރާމުގައި ހިމެނޭ ލައިފް ގާޑުންގެ ޙިދުމަތް އިފްތިތާޙްކުރުމަށްވަނީ ހަމަޖެހިފައި" ޓޫރިޒަމް މިނިސްޓަރު އަލީ ވަޙީދު ވިދާޅުވިއެވެ.
'ފިފްތު ޓޫރިޒަމް މާސްޓަރ ޕްލޭން' އަންނަ ހޯމަދުވަހު އިފްތިތާޙުކުރާއިރު އެންމެ ފަހުން ޓޫރިޒަމްގެ މާސްޓަރ ޕްލޭން އެކުލަވާލީ 2013 ވަނަ އަހަރުއެވެ. މިފަހަރު އެކުލަވާލާ މާސްޓަރ ޕްލޭނާއިއެކު ރާއްޖޭގެ ފަތުރުވެރިކަމުގެ ދާއިރާގައި ހުރި ގިނަ މައްސަލަތައް ހައްލު ކުރެވިގެންދާނެކަމަށް ޓޫރިޒަމް މިނިސްޓްރީން ވިދާޅުވެއެވެ.