ލޭނު އަޅައިގެން، ލޯ ބޮޑު ކަންނެލީގެ މަސްވެރިކަން ރާއްޖޭގައި ކުރިއަރުވައި، ދިވެހިންނަަށް އެކަމުން ރަގަޅު ނަފާއެއް ހޯދައިދިނުމަށް މަސައްކަތްތަކެއް ކުރުމަށް ރާވާފައިވާ ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަޙީދު ވިދާޅުވެއްޖެއެވެ.
އިއްޔެ ރައްޔިތުންގެ މަޖިލީހުގެ އިޤްތިސާދީ ކޮމިޓީގައި ވާހަކަދައްކަވަމުން މިނިސްޓަރ ޒަހާ ވިދާޅުވީ، ލޭނު އަޅައިގެން ލޯ ބޮޑު ކަންނެލީގެ ލައިސަންސް ދިނުން މިހާރު ހުއްޓާލާފައިވާކަމަށެވެ. ސަރުކާރުގެ އަމާޒަކީ، ފުޅާ ދާއިރާއެއްގައި މަޝްވަރާކުރެވިގެން ދިވެހިންނަށް ކުރެވޭ މަސްވެރިކަމަކަށް ލޭނުގެ މަސްވެރިކަން ހެދުމަށްފަހު ލައިސަންސް ދޫކުރަން ފެށުން ކަމަށް މިނިސްޓަރު ޒަހާ ވިދާޅުވިއެވެ.
" ލޭނުމަސްވެރިކަމަކީ ވިސްނުންތެރިކަމާއި އެކީގައި ފުޅާ ދާއިރާއެއްގައި މަޝްވަރާ ކުރެވިގެން ބައްޓަންވެގެން ކުރެވިދާނެ މަސްވެރިކަމެއް ކަމަކަށް ހަދަން ބޭނުން. ލޯ ބޮޑު ކަންނެއްޔަކީ އާދައިގެ ކަންނެއްޔަށް ވުރެ އަގުގެ ގޮތުން ބޮޑު އެއްޗެއް، ސިޔާސަތުތައް ރޭވިގެންދާނީ ދިވެހިންނަށް މިކަން ކުރެވޭ ގޮތަށް،" މިނިސްޓަރ ޒަހާ ވިދާޅުވިއެވެ.
މިނިސްޓަރ ޒަހާ ވިދާޅުވީ 2017ވަނަ އަހަރު، ދިވެހިންނަށް މި މަސްވެރިކަމުން 310، މިލިއަން ރުފިޔާއެއް ލިބިފައިވާ ކަމަށާއި، ލައިސަންސް ފީގެ ގޮތުގައި ފިޝަރީޒް މިނިސްޓްރީއަށް 1.9 މިލިއަން ރުފިޔާ ލިބިފައިވާ ކަމަށެވެ.
މީގެ އެއްއަހަރު ކުރިއަށް ބަލާއިރު، 28 އުޅަނދަކަށް ލައިސެންސް ދޫކޮށްފައިވާއިރު މީގެން ކޮންމެ އުޅަނދެއްގައި ހުންނަނީ އެންމެ ދިވެއްސެއް ކަމަށާއި މި އުޅަނދުތަކުގައި ޤަވާއިދާއި ހިލާފް އެތައް ކަމެއް ކުރަމުން ދިޔަ ކަން މިނިސްޓަރ ޒަހާ ފާހަގަކުރެއްވިއެވެ.
" ދިވެހިންގެ ނަމުގައި ރަޖިސްޓްރީކޮށްފައިހުރި ކަމުގައި ވިޔަސް ދިވެހިންނަށް މި ކުންފުނިތަކަކަށް ބާރެއް ނުފޯރުވޭ، ހުރިހާ މަސްވެރިންގެ ދިފާޢުގައި އެކަމަށް ނިމުމެއް ގެންނަން ޖެހުނީ، ރާއްޖެއިން މަސް އެކްސްޕޯޓްކޮށްގެން އާމްދަނީ ހޯދަމުން މިދަނީ،" ޒަހާ ވިދާޅުވިއެވެ.
ލޭނު މަސްވެރިކަން ކުރުމުގެ ލައިސަންސް އަލުން ދޫކުރާނީ، މިހާރު ފާހަގަަކުރެވިފައިހުރި މައްސަލަތަކަށް ހޯދަންޖެހޭ ހައްލުތަކާމެދު ފުޅާދާއިރާއެއްގައި މަޝްވަރާކޮށް އެމައްސަލަތަކަށް ހައްލު ހޯދުމަށްފަހުކަމަށް ފިޝަރީޒް މިނިސްޓްރީން ހާމަކުރެއެވެ. އެގޮތުން، ލޭނު މަސްވެރިކަންކުރާ އުޅަނދުފަހަރު އޮޕަރޭޓްކުރާ ފަރާތްތަކާއި މަސްވެރިކަމުގެ ސިނާޢަތުގައި ޙަރަކާތްތެރިވާ އެހެނިހެން ފަރާތްތަކާއެކު މިކަމާ ގުޅޭގޮތުން މަޝްވަރާކުރަމުންދާކަމަށް ފިޝަރީޒް މިނިސްޓްރީން ވިދާޅުވެއެވެ.
ލޭނު އަޅައިގެން ބޮޑުކަންނެލީގެ މަސްވެރިކަން ކުރުމުގެ ހުއްދަ 2012 ވަނަ އަހަރު ރާއްޖެއަށް ތަޢާރަފްކުރިނަމަވެސް މިބާވަތުގެ މަސްވެރިކަމުގައި ހަރަކާތްތެރިވާ މަސްވެރިން ވަރަށް މަދެވެ. އަދި ފާއިތުވި އަހަރުތަކުގައި ފިޝަރީޒް މިނިސްޓްރީން އެކި ފަހަރުމަތިން ލޭނު މަސްވެރިކަމަށް މަސްވެރިން ތަމްރީނުކުރުމަށްޓަކައި ތަފާތު ޕްރޮގްރާމުތައް ހިންގާފައިވެއެވެ.