2020ވަނަ އަހަރު ސިފަވެގެންދަނީ ރާއްޖޭގެ ތަރައްޤީއަށް އައު އިންޤިލާބީ ބަދަލުތަކެއް އަންނާނެ އަހަރެއްގެ ގޮތަށްކަމަށް ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީގެ މުޤައްރިރު އަޙްމަދު އަބްދުﷲ ވިދާޅުވެއްޖެއެވެ.
ކައުންސިލްތަކުގެ މާލީ މުޢާމަލާތްތަކާއި އާމްދަނީއާއި ޚަރަދު އިލެކްޓްރޯނިކް ނިޒާމަކުން ބެލެހެއްޓުމަށް ފިނޭންސް މިނިސްޓްރީއާއި އެލްޖީއޭއިން ތަރައްޤީކޮށްފައިވާ "ވިޔަ"ނިޒާމަށް ކައުންސިލަރުން ތަމްރީނު ކުރުމުގެ 3 ބެޗްގެ ޓްރެއިނިން ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. އޭނާ ވިދާޅުވީ 2020ވަނަ އަހަރަކީ ހަޤީޤީ މާނައިގައި ލާމާރުކަޒީ ނިޒާމްގެ ފޮނިމީރުކަން ލިބިގެންދާނެ އަހަރެއްކަމަށާ، އަންނައަހަރު ކައުންސިލްގެ ބާރުތަކުގެތެރެއަށްވެސް ކުރިން ލިބިފައިނުވާ އިތުރު ބާރުތަކެއް ލިބިގެންދާނެކަމަށް އޭނާ ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން ދަޢުލަތުގެ ފައިނޭންޝިއަލް ކޮންޓްރޯލާ ފާތިމަތު ރަޒީނާ ވިދާޅުވީ ކައުންސިލްތަކުގެ މާލީ މުޢާމަލާތްތަކާއި އާމްދަނީއާއި ޚަރަދު އިލެކްޓްރޯނިކް ނިޒާމަކުން ބެލެހެއްޓުމަށް ފިނޭންސް މިނިސްޓްރީއާއި އެލްޖީއޭއިން ތަރައްޤީކޮށްފައިވާ "ވިޔަ" ނިޒާމުގެ ދަށުން މިހާރުކުރަމުންދާ މަސައްކަތްތައް ހަރުދަނާވެ އަވަސް ވެގެންދާނެކަމަށެވެ. އަދި އަންނަ އހަރު ކައުންސިލްތަކުގެ ބަޖެޓްއަށްވެސް ބޮޑެތި ބަދަލުތަކެއް އަންނާނެކަމަށް އޭނާ ވިދާޅުވިއެވެ.
ރާއްޖޭގެ ހުރިހާ ރަށެއްގެ ކައުންސިލްތަކުން މުވައްޒަފުންނަށް އަމާޒު ކޮށްގެން ކުރިއަށް ގެންދާ ބައްދަލުވުންތައް ބާއްވަނީ ބައިތަކަށް ބަހާލައިގެންނެވެ. މިގޮތުން މީގެ ތިންވަނަ ބެޗް ތަމްރީން ކުރުމަށް ކުރިއަށްގެންދިޔަ ބައްދަލުވުމުގައި 48 ކައުންސިލަކުން 88 މުވައްޒަފުން ބައިވެރިވިއެވެ. މީގެ އިތުރުން މީގެ ކުރިން ބެއްވި ދެ ބައްދަލުވުމުގައި ވަނީ 191 މުވައްޒަފުން ތަމްރީން ކޮށްފައެވެ.