ރާއްޖޭގައި، ދިރޭ ޖަނަވާރު ގެންގުޅޭ ރަށްތަކުގައި ހިންގާ "އެނިމަލް ޕެސްޓް އެންޑް ޑިޒީޒް ސާވޭލެންސް" ޕްރޮގްރާމް ރ.އަތޮޅުގެ ބައެއްރަށްތަކުގައި ހިންގަންފަށައިފިއެވެ.
މިއީ ޖަނަވާރަށާއި، ޖަނަވާރުގެ ޒަރިއްޔާއިން އިންސާނުންނަށް ޖެހޭ ބަލިތަކަށް ފާރަވެރިވެ ދެނެގަތުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން ކުރިއަށްގެންދާ ޕްރޮގްރާމެކެވެ. ރ.އަތޮޅޫ އުނގޫފާރު، ހުޅުދުއްފާރު، މާކުރަތު، ދުވާފަރު މިރަށްރަށުގައި މިޕްރޮގްރާމް ކުރިއަށްގެންދިޔުމަށް ހަމަޖެހިފައިވަނީ މިމަހުގެ 11ވަނަ ދުވަހުގެ ނިޔަލަށެވެ.
މިހަތަރު ރަށުގައިވެސް ބަކަރިއާއި ކޯލިދޫނީގެ ބާވަތްތައް ގެންގުޅެ، ވިއްސައި އާލާކުރުމަކީ އާމްދަނީ ހޯދުމަށް ކުރާ މަސައްކަތްކުރެއެވެ. މިޕްރޮގުރާމުގެ ތެރޭގައި ކޯލިދޫންޏަށާއި ބަކަރިއަށް އާންމުކޮށް ޖެހޭ ބަލިތަކާއި އެބަލިތައް ދެނެގަންނާނެ އަލާމާތްތައް ކިޔައިދިނުމުގެ އިތުރުން، މިފަދަ ތަކެތި ގެންގުޅޭ ފާމްތައް ބަލައިފާސްކުރުމަށް ހަމަޖެހިފައިވާކަމަށް އެ މިނިސްޓްރީން ވިދާޅުވެއެވެ.
މިގޮތުން، ފާމްތަކުގައި ގެންގުޅޭ ބަކަރިން ލޭގެ ސެމްޕަލް ނެގުމަށްފަހު، ބަކަރިއަށް ޖެހޭ ބައްޔެއްކަމަށްވާ ފުޓް އެންޑް މައުތް ޑިޒީސް (އެފް.އެމް.ޑީ) އަށް ވަގުތުން ޓެސްޓުކުރުމަށް ހަމަޖެހިފައިވެއެވެ.
އަދި ފާމްތަކުގެ ބަޔޯސެކިއުރިޓީ ނުވަތަ ހަޔަވީ ރައްކާތެރިކަމުގެ ޙާލަތު ބަލައި ރަނގަޅުކުރަންވީ ކަންތައްތަކާ ބެހޭގޮތުން ލަފާދިނުމަށްވެސް ހަމަޖެހިފައިވެއެވެ.