ބ.ފެހެންދޫއިން ގޮއިދޫއަށް ދަރިވަރުން ގެންދިއުމަށްޓަކައި އުޅަނދެއް ބަނުމަށް އަލްޝާލީ މެރިން މޯލްޑިވްސް ޕްރައިވެޓް ލިމިޓެޑާ ހަވާލުކޮށްފިއެވެ.
މި އެއްބަސްވުމުގައި އެޑިއުކޭޝަން މިނިސްޓްރީން ސޮއިކުރެއްވީ ފައިނޭންސް އެގްޒެކްޓިވް ނައުޝާދު އިބްރާހީމްއެވެ. އަދި އެ ކުންފުނީގެ ފަރާތުން ސޮއިކުރެއްވީ އޮޕަރޭޝަން މެނޭޖަރ އިސްމާއީލް ޝަރީފްއެވެ.
އިންޑިއާ ސަރުކާރުގެ ހިލޭ އެހީގެ ދަށުން ކުރިއަށްގެންދާ މި މަސައްކަތް 100 ދުވަހުގެ ތެރޭ ނިންމާ ހަވާލުކުރަންޖެހެއެވެ. އަދި މި މަސައްކަތް ކުރުމަށް އެ ކުންފުނިން ހުށައަޅާފައިވަނީ ދެ މިލިޔަން ހަތަރު ލައްކަ ބާވީސް ހާސް ހަ ސަތޭކަ އަށްޑިހަ ފަސް ރުފިޔާ ފަންސާސް ހަތަރުލާރިކަމަށް އެޑިއުކޭޝަން މިނިސްޓްރީން ވިދާޅުވެއެވެ.
ފެހެންދޫއާއި ގޮއިދޫއަކީ އެއް ފަޅެއްގައި އޮންނަ ދެރަށެވެ. ފެހެންދޫ ސްކޫލު ބަންދުކުރި ފަހުން އެތައް އަހަރެއް ވެފައިވާއިރު އެރަށު ކުދިން ސްކޫލަށް ދަނީ ޑިންގީއެއްގައި 20 ވަރަކަށް މިނެޓުގެ ދަތުރެއް ކުރުމަށްފަހު އެ އަތޮޅު ގޮއިދޫއަށެވެ.
މިމައްސަލަ ހައްލުކުރުމަށް ބ. ފެހެންދޫއާއި ގޮއިދޫ ކޯޒްވޭއަކުން ގުޅާލަން އަންނަ އަހަރުގެ ބަޖެޓުގައި ވަނީ ދުއިސައްތަ ދިހަހާސް ރުފިޔާ ހިމަނާފައެވެ.