އދ. ގެ ވަރކިންގ ގްރޫޕަށް ކުރީގެ ރައީސް މުހައްމަދު ނަޝީދުގެ ފަރާތުން ހުށައަޅުއްވާފައިވާ މައްސަލަ އަށް ދިވެހި ސަރުކާރުން މިއަދު ޖަވާބުދާރީވެއްޖެއެވެ.މި މައްސަލަ އދ ގެ ވަރކިން ގުރޫޕަށް ހުށައަޅާފައިވަނީ، ނަޝީދުގެ މައްޗަށް ހިންގި ޝަރީއަތުގައި ތޭރަ އަހަރަށް ޖަލަށް ލާފައި ވަނީ އިޖުރާއަތްތަކާ ހިލާފަށްކަމަށާއި، އަދި ނަޝީދު ޖަލުގައި ހުންނަވާ އިރު ވެސް އެކަށީގެންވާ ރައްކާތެރިކަން ނުދޭ ކަމަށް ބުނެއެވެ.
ނަމަވެސް ޖަވާބުދާރީވުމުގެ ލިއުން ހަވާލުކުރުމަށްފަހު ބޭއްވި ނޫސްވެރިންގެ ބައްދަލުވުމެއްގައި ސަރުކާރުގެ ފަރާތުންވަނީ ވަރކިންގ ގްރޫޕަށް ރައީސް ނަޝީދުގެ ފަރާތުން ހުށައެޅުއްވި ޕެޓިޝަންގައި ކަންހިނގާދިޔަގޮތާއި ޚިލާފު މައުލޫމާތު ހިމަނާފައިވާކަން ފާހަގުރައްވާފައެވެ.
ނަޝީދުގެ ފަރާތުން ހުށައަޅާފައިވާ މައްސަލައަށް ދިވެހި ސަރުކާރުގެ ފަރާތުން ޖަވާބްދާރީވާ ލިއުންތަށް އދ ގެ ވޯކިންގ ގްރޫޕް އޮން އާބިޓްރަރީ ޑިޓެންޝަނަށް ހަވާލުކޮށްދެއްވީ، ރާއްޖެއިން ޔޫރަޕިއަން ޔޫނިއަން އަށް ކަނޑައަޅުއްވާފައި ހުންނަވާ ސަފީރު އަހްމަދު ޝިއާންއެވެ.
ލިޔުންތައް ހަވާލުކުރެއްވުމަށްފަހު ޖެނީވާގައި ބޭއްވި ނޫސްވެރިންގެ ބައްދަލުވުމެއްގައި މަޢުލޫމާތު ހިއްސާ ކުރައްވަމުން ޝިއާން ވިދާޅުވީ، ނަޝީދުގެ ވެރިކަމުގެ ގާނޫނާއި ޚިލާފަށް އެތަށް ކަމެއެއް ހިންގާފައިވާކަމަށާއި، ކްރިމިނަލް ކޯޓުގެ އިސްގާޒީ އަބްދުﷲ މުހައްމަދު ހައްޔަރުކުރުމުގެ އިތުރުން، ސިފައިންގެ އެންމެމަތީ ވެރިއަކަށް ހުނަނަވައިގެން އިދިކޮޅު ސިޔާސީ ފަރާތްތަށް ހައްޔަރުކުރުމާއި، ސަރުކާރުގެ ތެރެއިން ކުރެއްވި ގާނޫނާއި ޚިލާފު ގިނަ ކަންކަން ހިމެނޭކަމަށެވެ.
އޭނާ ވިދާޅުވީ، ރައީސް ނަޝީދުގެ މައްޗަށް ކުރެވުނު ދައުވާއަކީ ޝަރުއީ ކޯޓެއްގެ ފަނޑިޔާރަކު ގަދަކަމުން ފޮރުވިކަމުގެ ކުށުގައި ދިވެހިރާއްޖޭގެ ގާނޫނުތަކާއި އެއްގޮތްވާ ގޮތުގެ މަތީން ކުރެވުނު ދައުވާއެއްކަމަށާއި، އެއީ ސިޔާސީ ދައުވާއެއް ނޫންކަމަށެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން ރާއްޖޭގެ ފަރާތުން މިމައްސަލާއިގައި ޖަވާބްދާރީވުމަށް އެހީތެރިވެދޭ އިނގިރޭސި ވިލާތުގެ އޮމްނިއަރ ސްޓްރެޓަޖީގެ ވަކީލު ޓޮބީ ކެޑްމަން ވިދާޅުވީ، ރާއްޖޭގެ ކުރީގެ ރައީސަކު ކްރިމިނަލް ކޯޓްގެ ފަނޑިޔާރު ގަދަކަމުން ފޮރުވުމަކީ، ރާއްޖޭގެ ގާނޫނުތަކުގައިވާ ގޮތުން ވަރަށް ބޮޑުކުށެއްކަމަށާއި، ދުނިޔޭގެ ގިނަގައުމުތަކުގައިވެސް މިފަދަ ކަމެއް ކޮށްފިނަމަ، ވަރަށް ބޮޑެތި އަދަބުތައް ލިބިގެންދާކަމަށެވެ.
ނަމަވެސް ރައީސް ނަޝީދުގެ ފަރާތުން ހުށައަޅުއްވާފައިވާ ޕެޓިޝަންގައި ކްރިމިނަލް ކޯޓްގެ ފަނޑިޔާރު ގަދަކަމުން ފޮރުވުމަކީ، މާ ބުރަދަނެއް ހުރިކަމެއްކަން ފާހަގަނުކުރެވޭކަން ސިފަކުރައްވަމުން ކެޑްމަން ވިދާޅުވީ، ވަރކިންގ ގްރޫޕަށް ރައީސް ނަޝީދުގެ ފަރާތުން ހުށައެޅުއްވި ސަބްމިޝަންގައި ކަންހިނގާދިޔަގޮތާއި ޚިލާފު މައުލޫމާތު ހިމަނާފައިވާކަމަށެވެ.
އެހެހެން ކަމުން ދިވެހި ސަރުކާރުން އެރުވި ޖަވާބަށްފަހު އެމައްސަލަ ވަރކިންގ ގުރޫޕުން ބޭރުކޮށްލާނެކަމަށް ވަރަށްބޮޑަށް ބެލެވޭކަމަށް އެނާ ވިދާޅުވިއެވެ.ކުރީގެ ރައީސް ނަޝީދުގެ މައްޗަށް ޓެރަރިޒަމްގެ ކުށް ސާބިތުވެ 13 އަހަރަށް ޖަލަށް ލުމަށް ކުރި ހުކުމް ހައި ކޯޓުގައި އިސްތިއުނާފު ނުކުރަން ނިންމަވާފައި ވަނީ ނަޝީދު އަމިއްލަފުޅަށް ކަމަށާއި އިސްތިއުނާފުގެ ފުރުސަތު އަދިވެސް އޮތްކަން ސަރުކާރުން ވަނީ ތަކުރާރުކޮށް ހާމަކުރައްވާފައެވެ.
ރާއްޖެއިން މިމައްސަލާގައި ވަރަށް ތަފްސީލުކޮށް ވަރކިންގ ގުރޫޕަށް ޖަވާބުދާރީ ވެފައިވުމުން ނަޝީދުގެ ދައުވާގެކަންކަން ރާއްޖެއިން ކުރިއަށް ގެންގޮސްފައިވަނީ ދެފުއްފެންނަ ގޮތަކަށްކަން ހާމަވާކަމަށް ޖެނީވާގައި މިއަދުބޭއްވި ނޫސްވއެރިންގެ ބައްދަލުވުމުގައި ސަރުކާރުގެ ފަރާތުންވަނީ ވިދާޅުވެފައެވެ.