ސަރުކާރާއި އެމްޑީޕީއާއެކު މާދަމާ ރޭ ބޭއްވުމަށް ހަމަޖެހިފައިވާ މަޝްވަރާތަކުގައި އޮންނާނީ ސަރުކާރުގެ ފަރާތުން އެމްޑީޕީއަށް ކަންތައްތަކެއް ހުށައެޅުންކަމަށް މަޝްވަރާތަކުގައި ބައިވެރިވެވަޑައިގަންނަވާ އެމްޑީޕީގެ މަންދޫބް ވިދާޅުވެއްޖެއެވެ. ސަރުކާރާއި އެމްޑީޕީއާއިއެކު ކުރިއަށްގެންދާ މަޝްވަރާތަކުގެ ތިންވަނަ ބައްދަލުވުން
މާދަމާރޭ ބޭއްވުމަށް ހަމަޖެހިފައިވާއިރު، ޕީއެސްއެމަށް މަޢުލޫމާތުދެއްވަމުން
މަޝްވަރާތަކުގައި އިސްކޮށް ހަރަކާތްތެރިވާ އެމްޑީޕީގެ ޕާލިމަންޓަރީ ގްރޫޕްގެ ލީޑަރ
އިބްރާހިމް މުހައްމަދު ޞާލިޙް ވިދާޅުވީ، މިފަހަރުގެ މަޝްވަރާތަކަށް އެމްޑީޕީގެ
ފަރާތުން ކަންތައްތަކެއް ހުށަނާޅާނެކަމަށެވެ. ނަމަވެސް އެމްޑީޕީން ކުރަންޖެހޭނެ
ކަންތައްތަކެއް ސަރުކާރުން އެޕާޓީއަށް ހުށައަޅުއްވާނެކަމަށް އޭނާ ވިދާޅުވިއެވެ.
އިބްރާހިމް މުހައްމަދު ޞާލިޙް ވިދާޅުވީ، މަޝްވަރާތައް ކުރިއަށް ދަނީ
ދެފަރާތުންވެސް ބޭނުންވާގޮތަށްކަމަށާއި، ކާމިޔާބުކަމާއެކު މަޝްވަރާތައް
ނިންމާލެވޭނެކަމުގެ ޔަގީންކަން އެބައޮތްކަމަށެވެ. މި މަޝްވަރާތަކުގައި ހުރިޕާޓީއެއް
އެކުގައި މަޝްވަރާ ކުރުމަށް އެމްޑީޕީން ހުށައަޅާފައިވީނަމަވެސް މިލެވެލްގައި އަދި
އެއްވެސް އިތުރު ޕާޓީއެއް ބައިވެރިނުކުރާނެކަމަށާއި، ނަމަވެސް މަޝްވަރާތަކުގެ
ވަކިހިސާބަކުން ކުރީގެ ރައީސް އަދި އެމްޑީޕީގެ ކުރީގެ ރައީސް މުޙައްމަދު ނަޝީދު
ބައިވެރިކުރެވޭނެކަމުގެ ޔަގީންކަން ސަރުކާރުން ދެއްވާފައިވާތީ، އެކަން
ކުރިއަށްދާނެކަމަށް އުއްމީދުކުރެވޭކަމަށް ވިދާޅުވިއެވެ. މަޝްވަރާތަކުގެ ތިންވަނަ
ބައްދަލުވުން ބޭއްވުމަށް ކުރިން ހަމަޖައްސާފައިވަނީ މިދިޔަ ބުދަދުވަހަށެވެ. ނަމަވެސް
މަޝްވަރާތަކުގައި ބައިވެރިވާ ބައެއް ފަރާތްތަށް ރަށުގައި ނޫޅުއްވާތީ އެދުވަހުގެ
ބައްދަލުވުން ވަނީ ކެންސަލްކޮށް މާދަމާރޭ ބޭއްވުމަށް ހަމަޖައްސަވާފައެވެ.
މަޝްވަރާތަކުގައި ސަރުކާރުގެ ފަރާތުން ބައިވެރިވެ ވަޑައިގަންނަވަނީ، ހޯމް މިނިސްޓަރ
އުމަރު ނަސީރާއި، ފިޝަރީޒް މިނިސްޓަރ ޑރ. މުޙައްމަދު ޝައިނީއާއި ރައީސުލްޖުމްހޫރިއްޔާގެ
އޮފީހުގެ މިނިސްޓަރ އަބްދުﷲ އަމީނެވެ. އިދިކޮޅު އެމްޑީޕީގެ ފަރާތުން ބައިވެރިވެވަޑައިގަންނަވަނީ
އިބްރާހިމް މުހައްމަދު ޞާލިހާއި އެޕާޓީގެ ލީގަލް ޑިރެކްޓަރ ހިސާން ހަސަނެވެ. އެންމެ
ފަހުން ބޭއްވި ބައްދަލުވުމުގައި ދެފަރާތުން އެއްބަސްވެފައިވާ ބައެއް ކަންކަމުގެ
ތެރޭގައި، ކުށްކުށުގެ ތުހުމަތުގައި ހައްޔަރުކޮށްފައި ތިބި ސިޔާސީ މީހުންނާއި،
ހުކުމް ތަންފީޒްކުރަމުންގެންދާ ސިޔާސީ މީހުންނަށް ލުއި ދިނުން ހިމެނެއެވެ. އަދި ހަފްތާއެއްހާ
ދުވަހުގެ ތެރޭގައި ނަތީޖާއެއް ނެރުމަށް
މަސައްކަތްކުރުންވެސް ހިމެނެއެވެ. މަޝްވަރާތަކުގައި
މެދުވެރިއެއްގެ ރޯލް އަދާކުރުމަށް އަވަށްޓެރި އިންޑިޔާ ބައިވެރިކުރަން އެޕާޓީން
ހުށައެޅިނަމަވެސް އެކަން މިހާރު ނުހިމެނޭނެކަމަށް އެމްޑީޕީން ބުނެއެވެ. އަދި
މަޝްވަރާކުރުމަށް އެމްޑީޕީން ކަނޑައަޅާފައިވާ ޓީމުގައި ކުރީގެ ރައީސް މުހައްމަދު
ނަޝީދު ނަން ލިސްޓްގައި އޮތުމަށް ސަރުކާރުންވެސް މިހާރު ދެކޮޅު ނުހަދާކަމަށް އެޕާޓީން
ބުނެއެވެ.
ރައީސުލްޖުމްހޫރިއްޔާ އަބްދުﷲ ޔާމީންގެ އިސްނެންގެވުމާއިއެކު ކުރިއަށްގެންދާ
މަޝްވަރާތަކުގައި މިހާތަނަށް އިޖާބަދީފައިވަނީ، އިިދިކޮޅު އެމްޑީޕީއާއި
ޖުމްހޫރީޕާޓީންނެވެ. މި މަޝްވަރާތަކުގައި އަދާލަތު ޕާޓީން ބައިވެރިވާނެކަން އަދި ހާމަކޮށްފައެއްނުވެއެވެ.