ޔޫރަޕްގެ މަޝްހޫރު ޓުއަރ އޮޕަރޭޓަރ، ކުއޯނީގެ ކަސްޓަމަރުންގެ މެދުގައި އެންމެ މަޤުބޫލް މަންޒިލްތަކުގެ ލިސްޓުގެ 1 ވަނަ ރާއްޖެ ލިބިއްޖެއެވެ.
މިއީ މި ލިސްޓުގެ 1 ވަނަ ރާއްޖެއިން ޖެހިޖެހިގެން ހޯދި 17 ވަނަ އަހަރެވެ.
ކުއޯނީން އިގިރޭސިވިލާތުގެ ކަސްޓަމަރުންނަށް އަމާޒުކޮށްގެން ތައްޔާރުކޮށްފައިވާ ރިޕޯޓްގައިވާ ގޮތުން އެޤައުމުގެ ފަތުރުވެރިންގެ މެދުގައި 2 ވަނައަށް އެންމެ މަޤްބޫލް މަންޒިލަކީ މޮރިޝަސްއެވެ. 2 ވަނަ އަދި 3 ވަނަ އަށް ހޮވިފައިވަނީ ސްރީލަންކާއެވެ.
ކުއޯނީގެ ރިޕޯޓުގައިވާ ގޮތުން ދުރު މަންޒިލްތަކަށް ޗުއްޓީއަށް ދިޔުމަށް ގިނަ އަދަދެއްގެ ބަޔަކު ބޭނުންވެއެވެ. އަދި މިއާއެކު ރާއްޖެފަދަ މަންޒިލްތަކަށް އޮންނަ ޑިމާންޑު ބޮޑުވާކަމަށް ކުއޯނީގެ ރިޕޯޓުގައިވެއެވެ. އަދި ރާއްޖެއަކީ ލޯބިވެރިންގެ މެދުގައި މަޤްބޫލް މަންޒިލަކަށްވުމުން، ހަނީމޫނަށް ގިނަ އަދަދެއްގެ ފަތުރުވެރިން ރާއްޖެ ޒިޔާރަތްކުރާ ކަމަށް ކުއޯނީން ބުނެއެވެ.
އިގިރޭސިވިލާތަކީ ރާއްޖެއަށް އެންމެ ގިނައިން ފަތުވެރިން ޒިޔާރަތްކުރާ ޤައުމުތަކުގެ ތެރޭގައި ހިމެނޭ ޤައުމެކެވެ. އެގޮތުން ރާއްޖެއަށް 5 ވަނަ އަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރާ ޤައުމަކީ އިނގިރޭސިވިލާތެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން މިދިޔަމަހު އިނގިރޭސިވިލާތުން ރާއްޖެއަށް 10734 ފަތުރުވެރިން ޒިޔާރަތްކޮށްފައިވާއިރު، މިއީ ރާއްޖެއަށް ޒިޔާރަތްކުރި މުޅި ޖުމްލަ ފަތުރުވެރިންގެ 6.2 އިންސައްތައެވެ.