މާލޭ މަސްވެރިންގެ ޕާކުގައި ފަތުރުވެރިންނަށް ޚާއްސަކޮށްގެން ތަރައްޤީކޮށްފައިވާ ސެންޓަރުގެ ޚިދުމަތްތައް ބޭނުންކުރުމަށް ކްރޮސްރޯޑްސް މޯލްޑިވްސް އަދި ޖަލްބޫތް ހޯލްޑިންގްސް މޯލްޑިވްސްއިން ޝަޢުޤުވެރިކަން ފާޅުކޮށްފިއެވެ.
މި ސެންޓަރުގެ ޚިދުމަތްތައް ބޭނުންކުރުމަށް ޝައުގުވެރިވާ ފަރާތްތައް ހޯދުމަށް އިޢުލާންކޮށްފައިވަނީ މިދިޔަމަހުގެ ތެރޭގައެވެ.
މާލެ ސިޓީ ކައުންސިލުން ބޭއްވި ބައްދަލުވުމުގައި ވަނީ މަސްވެރިންގެ ޕާކުގައި ތަރައްޤީކޮށްފައިވާ ސެންޓަރުގެ ޚިދުމަތްތައް ބޭނުންކުރުމަށް ޝައުގުވެރިކަން ފާޅުކޮށްފައިވާ ދެ ފަރާތްކަމުގައިވާ، ކްރޮސްރޯޑްސް މޯލްޑިވްސް އަދި ޖަލްބޫތް ހޯލްޑިންގްސް މޯލްޑިވްސްއަށް އެތަން ބޭނުންކުރަން ދިނުމާއި ގުޅޭގޮތުން ވަނީ މަޝްވަރާކޮށް ގޮތެއް ނިންމާފައެވެ. އެތަން ބޭނުން ނުކުރެވި ގިނަ ދުވަހު ހުރުމަކީ އެކަމުން މާލީ ގެއްލުންވެސް ވަމުންދާ ކަމެއް ކަމަށް މާލެ ސިޓީ މޭޔަރ ސިފާ މުޙައްމަދު ވަނީ ފާހަގަކުރައްވާފައެވެ. އެގޮތުން މި ސެންޓަރގެ ޙިދުމަތްތައް ދިނުމުގައި ރަނގަޅު ކުއްޔެއް ކަނޑައެޅުންވެސް މުޙިއްމު ކަން ސިފާ ފާހަގަކުރެއްވިއެވެ.
" މިހާތަނަށް ސިޓީ ކައުންސިލުން ޓޫރިސްޓުންނާއި ރިލޭޓަޑް މިފަދަ ކަމެއް ފަށާފައެއް ނެތް، ފެށުމަށްޓަކައިވެސް ކޮންމެވެސް އުސޫލުތަކެއް އޮންނަން އެބަޖެހޭ، އަވަހަށް އޮޕަރޭޝަނަށް އެތަން ގެންނަން އެބަޖެހޭ، އެތަން އޮޕަރޭޓް ކުރުމަށް މިހާރު ލަފާކޮށްފައިވާ އަދަދަކީވެސް 150،000 ރުފިޔާ، ވީމާ އަވަހަށް މިތަން ކުއްޔަށް ދޭން އެބަޖެހޭ،" ސިފާ ވިދާޅުވިއެވެ.
މި ސެންޓަރުތައް ހިންގައިގެން މާލެ ސިޓީ ކައުންސިލަށް އާމްދަނީ ލިބޭނެ ފަދަ ގޮތެއް ހަމަޖައްސާ، އެކަން ލިޔެކިޔުމުން އެގެން އޮތުން މުޙިއްމުކަން ކައުންސިލް މެމްބަރުން ފާހަގަކުރެއްވި. މާލެއަށް އަންނަ ކުރޫޒް ލައިނާރތަކުން އަންނަ ފަތުރުވެރިންނަށް ޙިދުމަތްދިނުމަށްޓަކައި ތަރައްޤީކޮށްފައިވާ މި ސެންޓަރުގެ ޙިދުމަތް ފަތުރުވެރިންނަށް އެންމެ ފަސޭހައިން ލިބޭނެފަދަ ގޮތެއް ހަމަޖެހިފައި އޮތުން މުޙިއްމުކަންވެސް ކައުންސިލް މެމްބަރުންވަނީ ފާހަގަކޮށްފައެވެ.
މަސްވެރިންގެ ޕާކުގައި ހަދާފައިވާ ފަތުރުވެރިންނަށް ޚިދުމަތްދޭ ސެންޓަރުގެ ބޭނުންހިފުމަށް ޝަޢުޤުވެރިވެރިވާ ފަރާތްތައް ހޯދުމަށް މާލެ ސިޓީ ކައުންސިލުން ކުރެވުނު އިޢުލާނާ ގުޅިގެން ޝައުގުވެރިކަން ފާޅުކޮށްފައިވާ ދެފަރާތް ކަމުގައިވާ ކްރޮސްރޯޑްސް މޯލްޑިވްސް އަދި ޖަލްބޫތް ހޯލްޑިންގްސް މޯލްޑިވްސްއާ ސިޓީ ކައުންސިލްގެ ޕްލޭނިންގް ކޮމެޓީން ވާހަކަ ދައްކައިގެން އެ ފަރާތްތަކުން މިކަން ކުރަން ބޭނުންވާގޮތް ލިޔުމުން ހޯއްދުމަށް ވަނީ ނިންމާފައެވެ.
މަސްވެރިންގެ ޕާކުގައި ތަރައްޤީކޮށްފައިވާ ސެންޓަރު ފަތުރުވެރިންނަށް ހުޅުވާލުމަށްޓަކައި ފަތުރުވެރިންނަށް ޚިދުމަތްދޭ ސެންޓަރުގެ ޚިދުމަތްތައް ބޭނުންވާ ޓުއަރ އޮޕަރޭޓަރުންނާއި، ރިސޯޓްތައް އަދި ޕެސެންޖަރ ކުރޫޒް ލައިނަރތައް މެނޭޖްކުރައްވާ ފަރާތްތަކުން، މިސެންޓަރުގެ ޚިދުމަތްތައް ބޭނުންކުރެއްވުމަށް ޝައުޤުވެރިކަން ހުރިކަން މާލެ ސިޓީ ކައުންސިލަށް ލިޔުމުން އެންގުމަށް އެކައުންސިލުން އޭރު ކުރި އިޢުލާނުގައި އެދިފައިވޭ. މިސެންޓަރުން ފަތުރުވެރިންނަށް ލިބެންހުރި ޚިދުމަތްތަކަކީ، ރެސްޓް ރޫމް, ގެސްޓް ލައުންޖު, މައުލޫމާތު ސާފުކުރާ ކިއޮސްކް, ވެއިޓިންގ އޭރިއާ ފަސްޓްފުލޯރ, ވެއިޓިންގ އޭރިއާ،ގާޑަން،ފްރީ ވައިފައި އަދި އޭރިއާ ސެކިއުރިޓީއެވެ.
މި އިމާރާތުގައި އާއްމު ފާހަނާތަކުގެ ގޮތުގައި 7 ފާހަނާއަކާއި، ނުކުޅެދުންތެރިކަން ހުންނަ ފަރާތްތަކާއި އުމުރުން ދުވަސްވީ ފަރާތްތަކަށް ޚާއްސަ 1 ފާހަނާއި ފެންވެރުމަށް ޙާއްސަ 2 ފާހަނާ ހިމެނޭހެން ޖުމްލަ 10 ފާހަނާ މި އިމާރާތުގައި ހަދާފައިވެއެވެ. ސިޓީ ކައުންސިލުން ވިދާޅުވީ، މަސްވެރިންގެ ޕާކު އަލުން ތަރައްޤީކުރިއެއްކަމަކު، އެތަނުގެ ނަމަށް އެއްވެސް ބަދަލެއް ގެނައުމަށް ނިންމާފައިނުވާކަމަށެވެ. އަދި އިމާރާތާއި އިންވެގެން އެ ސަރަޙައްދު ޒީނަތްތެރިކުރުމުގެ މަސައްކަތް ކުރަމުންދާކަމަށްވެސް ސިޓީ ކައުންސިލުން ވިދާޅުވެއެވެ.
މާލޭ މަސްވެރިންގެ ޕާކުގައި ފަތުރުވެރިންނަށް ޚާއްސަކޮށްގެން ތަރައްޤީކޮށްފައިވާ އިމާރާތުގެ މަސައްކަތް ނިންމާ، އެމް.ޑަބްލިޔު.އެސް.ސީން އެތަން މާލޭ ސިޓީ ކައުންސިލާއި ހަވާލުކޮށްފައިވަނީ މިދިޔަ ޑިސެމްބަރުމަހުގެ ތެރޭގައެވެ.