އަންނަ އާދީއްތަ ދުވަހުން ފެށިގެން ވިސާ އައުކޮށްދިނުމުގެ ޚިދުމަތްދިނުމަށް މޯލްޑިވްސް އިމިގްރޭޝަނުން ނިންމައިފިއެވެ.
ކޯވިޑް-19 ފެތުރުން ކޮންޓްރޯލްކޮށް، އާއްމު ރައްޔިތުންގެ ސަލާމަތާއި ރައްކާތެރިކަމަށްޓަކައި މިދިޔަމަހުގެ 19 ވަނަ ދުވަހުން ފެށިގެން ސަރުކާރުގެ އިދާރާތައް ބަންދުކުރުމަށް ނިންމާފައިވުމާއެކު، މޯލްޑިވްސް އިމިގްރޭޝަނުން ދެމުންގެންދާ ބައެއްޚިދުމަތްތައްވެސް ވަނީ މެދުކަނޑާލެވިފައެވެ.
އެހެންނަމަވެސް، ރާއްޖޭގައި އުޅޭ ގިނަ އަދަދެއްގެ ބިދޭސީންގެ ވީޒާއާއި ގުޅުންހުރި ކަންތައްތައް ފުރިހަމަ ކުރުމުގައި ދަތިވަމުންދާތީ ވެ، އަންނަ އާދީއްތަ ދުވަހުން ފެށިގެން ވާރކް ވިސާ އަދި އެހެނިހެން ވިސާ ދޫކޮށްފައިވާ ފަރާތްތަކުގެ ވިސާ އައު ކޮށްދިނުމުގެ ޚިދުމަތް އަންނަ އާދީއްތަ ދުވަހުން ފެށިގެން ލިބޭނެކަމަށް އިމިގްރޭޝަނުން ވަނީ ހާމަކުރައްވާފައެވެ.
އެގޮތުން އެކްސްޕެޓް އޮންލައިން ސިސްޓަމް މެދުވެރިކޮށް ވާރކްވީޒާ އާއި ގުޅުންހުރި ޚިދުމަތް ތަކަށް އެދުން، ހެނދުނު 09:00 އިން 13:00 އަށް އަދި ވިސާ ޖެހުމަށްފަހު ޕާސްޕޯޓު ދޫކުރުން ހެނދުނު 09:10 އިން 12:00 އަށް ކުރިއަށްދާނެއެވެ.
ޓޫރިސްޓު ވިސާ އަދި ބިޒްނަސް ވީސާގައި ރާއްޖެ އެތެރެވެފައިވާ ފަރާތްތަކުގެ ތެރެއިން، ރާއްޖެއިން ބޭރަށްކުރާ ދަތުރުތައް ގަވާއިދުން ފެށުމުން، ފުރައިގެންދިއުމަށް އެދޭ ފަރާތްތައް ވިސާ އައުކުރުމަށް ހުށަހަޅާކަށް ނުޖެހޭނެކަމަށް އިމިގްރޭޝަނުން ބުނެއެވެ.
އަދި މި ފަރާތްތަކުން، އެޕްލިކޭޝަން ފޮރ އިމަރޖެންސީ ޑިޕާޗަރ ފޯމް ފުރިހަމަ ކުރުމަށްފަހު، އެއަރޕޯރޓަށް ވަޑައިގަތުމުން ފުރޭނެ އިންތިޒާމް ހަމަޖެހިފައިވާ ކަމަށާއި، ނަމަވެސް މިދިޔަމަހުގެ 19ގެ ކުރީގެ ތާރީޚަކަށް ވިސާ ހަމަވެފައިވާ ފަރާތްތަކާއި، މިހާރު ދޫކުރެވިފައިވާ ވިޒާގެ މުއްދަތު އިތުރުކުރުމަށް ބޭނުންވާފަރާތްތަކުން ވިސާ އައުކުރުމަށްއެދި ހުށަހަޅާ ފޯމާއި އެހެނިހެން ލިޔެކިއުންތަށް އިމިގްރޭޝަނަށް މެއިލްކުރުމަށްވަނީއ އެދިފައެވެ.
މިގޮތަށް މެއިލް ކުރާ ފަރާތްތަކަށް ވީޒާ ޖެހުމަށް ޕާސްޕޯރޓް ހުށަހެޅުމަށް އެޕޮއިންޓްމަންޓެއް ހަމަޖެއްސުމަށްފަހު، އެ މަޢުލޫމާތު މެއިލް މެދުވެރިކޮށް ފޮނުވޭނެކަމުގައިވެސް އިމިގްރޭޝަނުން ވިދާޅުވެފައިވެއެވެ.
އިމިގްރޭޥަންގެ ޚިދުމަތް ދިނުމަށް ހަމަޖެހިފައިވަނީ، ހެލްތް ޕްރޮޓެކްޝަން އޭޖެންސީއިން އާންމުކޮށްފައިވާ ގޮތުގެ މަތިން އިޖްތިމާޢީ ގައިދުރުކަން ބަހައްޓައިގެން ކަމަށްވީ ހިނދު، ޚިދުމަތް ހޯއްދަވަން ވަޑައިގަންނަވާ ފަރާތްތަކުން މިކަމަށް ޙާއްޞަ ސަމާލުކަމެއް ދެއްވުމަށާއި، މަސައްކަތްތައް ރޭވިފައިވާ ގޮތްތަކަށް ހުރުމަތްތެރިކޮށް ހިތުމަށް އެއިދާރާއިން ވަނީ އިލްތިމާސްކޮށްފައެވެ.