ރާއްޖޭގެ ޤައުމީ އެއަރލައިން "މޯލްޑިވިއަން" ހިންގާ ކުންފުނި އައިލެންޑް އޭވިއޭޝަން ސަރވިސަސްއަށް މިއަދު މިވަނީ 20 އަހަރު ފުރިފައެވެ. އައިލެންޑް އޭވިއޭޝަނުން އޮޕަރޭޓް ކުރަމުން ގެންދާ މޯލްޑިވިއަން އެއާލައިނަކީ އެތެރޭގެ އުދުހުންތަކަށް ބެލިނަމަވެސް އަދި ބޭރު ޤައުމަތަކަށް ކުރާ ދަތުރުތަކަށް ބެލި ނަމަވެސް ހަލުވި ދުވެއްޔެއްގައި ފަހަތަށް ނުޖެހި ކުރިއަރަމުން އަންނަ އެއަރލައިނެކެވެ.
އެއަރމޯލްޑިވްސްގެ ނަމުގައި ކުރިން ހިންގަމުން ދިޔަ ކުންފުނި އުވާލުމުން ޤައުމީ އެއަރލައިނެއްގެ ބޭނުން އޮތީ ޖެހިފައެވެ. ރާއްޖެ ފަދަ ކުދި ޖަޒީރާ ޤައުމަކަށް، އެކި ރަށްރަށަށް ވައިގެ މަގުން ހިތްފަސޭހަ ދަތުރެއް ކޮށްލެވޭ ދުވަހެއްގެ އިންތިޒާރުގައި ދިވެހިން ތިއްބައި 2000 ވަނަ އަހަރުގެ އޭޕްރީލްމަހުގެ 13 ވަނަ ދުވަހު އުފެއްދި އައިލެންޑް އޭވިއޭޝަން ކުންފުންޏާއެކު ދިވެހިންނަށް ހިތްހަމަ ޖެހުން ލިބިގެން ދިޔައެވެ.
އޭރު ކުޑަ އޮޕަރޭޝަނެއްގައި ފެށި ނަމަވެސް މޯލްޑިވިއަނުން މިހާރު ދަނީ ވެލާނާ އިންޓަރނޭޝަނަލް އެއަރޕޯޓުން ރާއްޖޭގެ 12 ސަރަޙައްދީ އެއަރޕޯޓަކަށް ދަތުރުތައް ކުރަމުންނެވެ. މީގެ ތެރެއިން ބައެއް އެއަރޕޯޓުތަކަށް ދުވާލަކު 5 ދަތުރުވެސް ކުރެއެވެ.
އެތެރޭގެ އުދުހުންތަކުގެ އިތުރަށް މޯލްޑިވިއަނުން ދަނީ ބައިނަލްއަޤްވާމީ ދަތުރުތައްވެސް ކުރަމުންނެވެ. ރާއްޖެއިން ބޭރަށް ދަތުރުކުރުމުގެ ހުއްދަ އައިލެންޑް އޭވިއޭޝަނަށް ލިބުމާއިއެކު، އެކުންފުނިން އެންމެފުރަތަމަ ދަތުރުތައް ފަށާފައިވަނީ އިންޑިއާގެ ތްރިވަނަންތަޕޫރަމަށެވެ. އެއީ 2008 ވަނަ އަހަރުގެ ޖެނުއަރީމަހުގެ 25 ވަނަ ދުވަހެވެ.
ބޭރު ޤައުމުތަކަށް މޯލްޑިވިއަނުން ކުރާ ދަތުރުތައްވެސް ފުޅާވެ، އެއަރލައިނުން ދަނީ ބައިނަލްއަޤްވާމީ ގިނަ މަންޒިލްތަކަކަށް ދަތުރުތައް ބާއްވަމުންނެވެ.
އައިލެންޑް އޭވިއޭޝަނުންދަނީ ކުންފުނީގެ ވިޔަފާރި ފުޅާކޮށް ތިން ބާވަތެއްގެ މަތިންދާބޯޓު އޮޕަރޭޓް ކުރަމުންނެވެ. އެގޮތުން މޯލްޑިވިއަންގެ ފްލީޓުގައި އެއާބަސް 2 ބޯޓު އޮވެއެވެ. މިއީ 152 ސީޓުގެ ބޯޓަކާއި 200 ސީޓުގެ ބޯޓެކެވެ.
ޑޭޝް-8 މަރުކައިގެ 10 ބޯޓު މޯލްޑިވިއަންގެ ފްލީޓުގައި ހިމެނޭއިރު، 11 ސީޕްލޭންވެސް މޯލްޑިވިއަނުން ދަނީ އުދުހުންތަކުގައި ބޭނުންކުރަމުންނެވެ.
މޯލްޑިވިއަނުން ސީ ޕްލޭންގެ ޙިދުމަތް ފަށާފައިވަނީ 2014 ވަނަ އަހަރުގެ ޖުލައިމަހުއެވެ. މިހާރު މިޙިދުމަތަށްވެސް މިވަނީ 5 އަހަރު ފުރިފައެވެ. ރިސޯޓުތަކަށް ފަތުރުވެރިން އުފުލުމުގައި ބޭނުންކުރާ ސީޕްލޭންގެ ދަތުރުތައް ފުޅާކޮށް، ދޭ ޙިދުމަތުގެ ފެންވަރު ރަނގަޅު ކުރުމަށްޓަކައި އައިލެންޑް އޭވިއޭޝަނުން ދަނީ ގިނަ މަސައްކަތްތަކެއް ކުރަމުންނެވެ.
ކޯވިޑް-19އާ ގުޅިގެން މޯލްޑިވިއަންގެ އުދުހުންތަކަށް މަޑުޖެހުމެއް އައިސްފައިވީނަމަވެސް، އެ އެއަރލައިނުން ދަނީ ޗާޓަރ ދަތުރުތައް ބާއްވަމުންނެވެ. ރާއްޖެ ނާދެވިފައި ތިބި ދިވެހިން އަނބުރާ ރާއްޖެ ގެނައުމަށް މޯލްޑިވިއަނުން ކުރާ މަސައްކަތަށް ޝުކުރު ހައްޤެވެ. މިފަދަ ދަނޑިވަޅެއްގައި އެކުންފުނީގެ މުވައްޒަފުން އެކޮށްދެނީ ޤައުމީ ޙިދުމަތެކެވެ.
މުޅި ދުނިޔޭގެ ވެސް ދަތުރުފަތުރުގެ ދާއިރާ ހުއްޓުމަކަށް އައިސްފައިވުމުން ރާއްޖެއަށް މުދާ ގެންނަން ބޭނުންވާ ވިޔަފާރިވެރިންނަށް އެފުރުސަތު ފަހިކޮށްދިނުމަށް މޯލްޑިވިއަންއިން ދަނީ ކާގޯ ފްލައިޓްތައްވެސް ބާއްވަމުންނެވެ.
އައިލެންޑް އޭވިއޭޝަނަކީ ސައްތައިން ސައްތަ ދިވެހި ސަރުކާރު ހިއްސާވާ އެއަރލައިނެކެވެ. ދިވެހި ރައްޔިތުންނަށް ލުއިފަސޭހަ ގޮތެއްގައި ވައިގެ ދަތުރު ކުރެވޭނޭމަގު ފަހިކޮށްދިނުމަށް ސަރުކާރުން އުފެއްދެވި މި ކުންފުނިން ގެންދަނީ، އެ އެއަރލައިނުން ދިވެހިންނަށް ދެމުން އަންނަ ޚިދުމަތްތަކުގެ ފެންވަރު ރަނގަޅުކޮށް، ވިޔަފާރި ފުޅާކުރުމަށް އިތުރު އިންވެސްޓްމަންޓްތައް ޤާއިމްކުރަމުންނެވެ.