ކޯވިޑްއަށްފަހު އަލުން ފަތުރުވެރިކަން ފަށާއިރު މިއީ ޤައުމުތަކުން ފަތުރުވެރިން އަތުން އިތުރު ޓެކްސްތައް ނަގަންވީ ވަގުތު ނޫންކަމަށް ޓުއަރިޒަމް މިނިސްޓަރ ޢަލީ ވަޙީދު ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ދުނިޔޭގެ ފަތުރުވެރިކަމުގެ ޖަމިއްޔާ ޔޫއެންޑަބްލިއުޓީއޯގެ މާކެޓް އިންޓެލިޖެންސް އެންޑް ކޮމްޕެޓިޓިވްނެސް ޑިޕާޓްމަންޓްގެ އިސްވެރިންނާއެކު މިއަދު ބޭއްވި ވެބިނަރގައެވެ.
މިވެބައިނަރގައި ވާހަކަދައްކަވަމުން މިނިސްޓަރ ވިދާޅުވީ މަންޒިލްގެ ރައްކާތެރިކަން އިތުބާރަކީ ބައިނަލްއަޤްވާމީ ފަތުރުވެރިކަމުގެ ބިންގާ ކަމަށާއި، ރާއްޖޭގެ ބޯޑަރު ހުޅުވާނީ އެ އިތުބާރާއެކުކަމަށެވެ.
މިިނިސްޓަރ ޢަލީ ވަޙީދު ވިދާޅުވީ ކޯވިޑް-19ގެ ސަބަބުން ދިވެހިރާއްޖޭގެ އިޤްތިޞާދަށް އަގުނުކުރެވޭ މިންވަރުގެ ބޮޑެތި ގެއްލުން ވެފައިވާ ކަމަށާއި، ރައްޔިތުންގެ ޢާންމު ދިރިއުޅުން ހުއްޓި މުޅި އިޤްތިޞާދު ހުއްޓިފައިވާ ކަމަށެވެ. އެހެންކަމުން ދުނިޔޭގެ އެހެން ޤައުމުތަކެކޭ އެއްފަދައިން ރާއްޖެވެސް ތައްޔާރުވަމުންދަނީ ރައްކާތެރިކަމުގެ ފިޔަވަޅުތަކާއެކު އިޤްތިޞާދީ ޙަރަކާތްތައް ފަށައިގަތުމަށްކަމަށާއި، ނަމަވެސް މިދަނޑިވަޅުގައި މުޅި ދުނިޔެވެސް ސަމާލުވާންވީ އިތުރަށް މި ބަލީގެ ޙާލަތު ގޯސްވިޔަނުދީ ހުރިހައި ފަރާތްތައް ގުޅިގެން ޤައުމުތަކުގެ ބޯޑުންތަކާއި، އެއަރޕޯޓްތަކާއި އަދި ޓޫރިސްޓް ފެސިލިޓީ ތަކުގައި ބައިނަލްއަޤްވާމީ އެއް މިންގަނޑަކަށް ރައްކާތެރިކަމުގެ ފިޔަވަޅުތައް އިތުރަށް ހަރުދަނާ ކުރުމަށް ކަމަށް މިނިސްޓަރ ވިދާޅުވިއެވެ.
ކޯވިޑްއަށްފަހު ފަތުރުވެރިކަން އަލުން ފެށުމަށް ޤައުމުތަކުން މަސައްކަތްކުރަމުންދާއިރު، ރާއްޖެއިންވެސް ދަނީ އެކަމަށް ތައްޔާރުުވަމުންނެވެ. މިގޮތުން ފަތުރުވެރިން ގެނައުމުގައި އަމަލުކުރަންޖެހޭ އުސޫލުތަކުގެ ދެލިކޮޕީއެއް ތައްޔާރުކޮށް، ކަމާބެހޭ ފަރާތްތަކާއެކު ދަނީ މަޝްވަރާކުރަމުންނެވެ.