އާމްދަނީ ހޯދުމަށް ގޭގައި އެކި ކަހަލަ މަސައްކަތްތައް ކުރާ މީހުން ދަނީ އިތުރުވަމުންނެވެ. އަދި ޙާއްސަކޮށް ކާބޯތަކެތީގެ އެކި ބާވަތްތައް ތައްޔާރުކޮށް ސޯޝަލް މީޑިއާ މެދުވެރިކޮށް ވިއްކަމުންދާ ފަރާތްތައްވެސް މަދެއް ނޫނެވެ.
ގޭގައި ލިބެން ހުރި މަދު ވަސީލަތަކުން ތަކެތި ތައްޔާރުކުރުމަކީ ބުރަ ކަމެކެވެ. އަދި ގޭތެރޭގެ ޖާގަ ކުޑަވުމަކީވެސް މަސައްކަތް ފުޅާ ކުރުމަށް އެޅޭ ހުރަހެކެވެ. މިފަދަ ކަންތައްތަކަށް އިތުރު ލިޔެއް ލިބިގެންދާނެ ފެސިލިޓީއެއް ހުޅުމާލޭގައި ތަރައްޤީކުރުމުގެ މަަސައްކަތް ބީސީސީން ވަނީ ފަށާފައެވެ.
އެއްފަހަރާ ގިނަ ބަޔަކަށް ބޭނުންކުރެވޭ، ކޯ-ޝެއާޑު ކިޗަން ފެސިލިޓީ ކުރިއަށް އޮތް ތިންމަސްދުވަސްތެރޭ އާއްމުން ބޭނުން ކުރުމަށް ހުޅުވާލާނެ ކަމަށް ބީސީސީން ހާމަކުރެއެވެ. ބިޒްނަސް ސެންޓަރ ކޯޕަރޭޝަން، ބީ.ސީ.ސީން މިހާރުވަނީ ކޯ-ޝެއާޑު ކިޗަން ނުވަތަ ގިނަ ބަޔަކަށް އެއްފަހަރާ ބޭނުން ކުރެވޭ ބަދިގޭގެ ޙިދުމަތް ހޯދަން ބޭނުންވާ ފަރާތްތައް ރަޖިސްޓްރީވުމަށް ހުޅުވާލާފައެވެ.
ވިޔަފާރިއަށް ކާބޯތަކެތި ތައްޔާރުކުރާ ފަރާތްތަކަށް އަމާޒްކޮށްގެން ތަރައްޤީކުރާ ކޯ-ޝެއާޑު ކިޗަންގެ ޙިދުމަތާއި ގުޅޭގޮތުން ޕީއެސްއެމް ނިއުސްއާ ވާހަކަދައްކަމުން ބީ.ސީ.ސީގެ މެނޭޖިންގ ޑިރެކްޓަރ ފާތިމަތު ފަޒްލީނާ ވިދާޅުވީ މިހާރު ކުރިއަށްދަނީ މިތަން ތަރައްޤީކުރާނެ ތަނެއް ކަނޑައެޅުމުގެ މަސައްކަތް ކަމަށެވެ. އަދި މިހާރު އެންމެ ރަގަޅު ދެ ތަނެއް ޝޯޓު ލިސްޓު ކުރެވިފައިވާ ކަމަށާއި އަންނަ ހަފްތާ ތެރޭ ތަނެއް ކަނޑައެޅި އެތަނުގެ އެތެރޭގެ ފަރުމާ ކުރުމުގެ މަސައްކަތް ކުރާނެ ބަޔަކު ހޯދުމުގެ މަސައްކަތް ފަށާނެ ކަމަށެވެ. މިތަން ބޭނުން ކުރާ ފަރާތްތަކުގެ އަތުން ކުޑަ ފީއެއް ނަގާނެއެވެ. މި ފީއަކީ ތަން ހިންގުމަށް ދާނެ ޙަރަދުތަކަށް ނަގާ ފީއެއް ކަމަށް ފަޒްލީނާ ވިދާޅުވިއެވެ.
ރަޖިސްޓްރީ ކުރަން ހުޅުވިފަހުން މިވީ ކުޑަ ދުވަސްކޮޅުގެ ތެރޭ ގިނަ އަދަދެއްގެ ބަޔަކު މިތަނާއި ގުޅޭ މައުލޫމާތު ހޯދުމަށް ގުޅަމުން ދާކަމަށް ފަޒްލީނާ ފާހަގަކުރެއްވިއެވެ.
" އަދި މިވީ 3 ދުވަސް އިޢުލާން ކުރިފަހުން، ބައިވަރު މީހުން އިންކުއާ ކުރަމުން އެބަދޭ މިތަނާއި ގުޅޭގޮތުން، ޝައުގުވެރިކަން ވަރަށް އެބަހުރި އާއްމުންގެ، މިތަނާއި ގުޅޭ އިތުރު މައުލޫމާތުތައް މީޑިއާތައް މެދުވެރިކޮށް އާއްމުންނަށް ދިނުމަށް އަންނަ ހަފްތާ ތެރޭ މަސައްކަތަކެއް ކުރުމަށްވަނީ ރޭވިފައި،" ފަޒްލީނާ ވިދާޅުވިއެވެ.
ޖުމްލަ 15 މޭޒު މި ބަދިގޭގައި ހުންނާނެއެވެ. އެހެން ކަމުން އެއްފަހަރާއި 15 ވިޔަފާރިއަކަށް އެތަން ބޭނުންކުރެވޭނެއެވެ. ކޮންމެ ވިޔަފާރިއަކުންވެސް އެތަނުގައި އެއްފަހަރާއި މަސައްކަތް ކުރެވޭނީ 4 މީހުންނަށެވެ.
ކޯ-ޝެއާޑު ކިޗަން ފެސިލިޓީއެއްގެ ޙިދުމަތަކީ ރާއްޖެއަށް އަދި މުޅިން އާ ކޮންސެޕްޓެކެވެ. ރާއްޖޭގައި ގޭގައި ތިބެގެން ކާބޯތަކެތި ތައްޔާރުކޮށްގެން އާމްދަނީ ހޯދާ ފަރާތްތައް ދަނީ އިތުރުވަމުންނެވެ. މިފަދަ ޒަމާނީ ޙިދުމަތްތައް ލިބޭ ބަދިގެއެއްގެ ސަބަބުން މަސައްކަތަށް ލުއިތަކެއް ލިބި ވިޔަފާރިތަކަށް ކުރިއެރުން ލިބިގެންދާނެ ކަމަށް ބީސީސީން ދެކެއެވެ.
މިއީ ޔޫ.އެން.ޑީ.ޕީގެ މާލީ އެހީގެ ދަށުން، މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ އިސްނެންގެވުމާއި އެކު ބިޒްނަސް ސެންޓަރ ކޯޕަރޭޝަން، ބީ.ސީ.ސީން ހިންގުމަށް ހަމަޖެހިފައިވާ ފެސިލިޓީއެކެވެ.
ބީސީސީން ވިދާޅުވީ މިއީ އެންމެ ކުދި ވިޔަފާރިއާއި ކުދި ވިޔަފާރި އަދި މެދު ފަންތީގެ ވިޔަފާރިތަކުގެ ތެރެއިން ކާބޯތަކެތި އުފައްދާ ފަރާތްތަކަށް، ހާއްސަކޮށް ޒުވާން ވިޔަފާރިވެރިންނާއި ގޭގައި ތިބެގެން ކާބޯތަކެތި އުފައްދާ އަންހެންވެރިންނަށް އަމާޒުކޮށްގެން ހުޅުވާ ތަނެއް ކަމަށެވެ.
ކޯޝެއާޑް ކިޗެން އަކީ ކާބޯތަކެތި އުފެއްދުމަށް ބޭނުންވާ ގިނަ ވަސީލަތްތަކެއް އެއްތަނަކުން ލިބޭ، އެއްފަހަރާ ގިނަ ބަޔަކަށް ބޭނުންކުރެވޭ ގޮތަށް، ހުންނަންޖެހޭ ވަކި ސްޓޭންޑަޑަކަށް ފަރުމާކޮށްފައި ހުންނަ ތަންތަނެވެ.
ކޯ-ޝެއާޑް ކިޗަން ފެސިލިޓީ ބޭނުންކުރުމަށް ޝައުގުވެރިވާ ފަރާތްތަކުން ގޫގުލް ފޯމް މެދުވެރިކޮށް މިކަމަށް ރަޖިސްޓްރީވެވޭނެ ކަމަށާއި، ފޯމްލުމުގެ ސުންގަޑިއަކީ އަންނަމަހުގެ 6 ވަނަ ދުވަހުގެ މެންދުރު 3:00 އަކަށްކަމަށް ބީސީސީން ހާމަކުރެއެވެ.