މާދަމާއިން ފެށިގެން އެޗްޑީސީގެ އޮފީހުން ޙިދުމަތް ލިބޭނެ

މާދަމާއިން ފެށިގެން އެޗްޑީސީގެ އޮފީސް ހުޅުވައި ޙިދުމަތްދިނުމަށް އެކުންފުނިން ނިންމައިފިއެވެ.

ހައުސިން ޑިވެލޮޕްމަންޓު ކޯރޕަރޭޝަން، އެޗްޑީސީން ބުނީ މާދަމާއިން ފެށިގެން އެކުންފުނީގެ އޮފީހުގެ ކައުންޓަރުތައް ހުކުރު އަދި ހޮނިހިރުދުވަސް ފިޔަވައި ކޮންމެ ދުވަހެއްގެ ހެނދުނު 8:30 މެންދުރުފަހު 3:00 އަށް ހުޅުވާފައި ހުންނާނެ ކަމަށެވެ.

ޙިދުމަތް ހޯދަން އަންނަ ފަރާތްތަކުން މާސްކު އަޅަން ޖެހޭނެ ކަމަށާއި އިޖުތިމާއީ ގައިދުރުކަން ބަހައްޓަން ޖެހޭނެކަމަށް އެޗްޑީސީން ހާމަކުރެއެވެ.

ކޯވިޑް-1 އާ ގުޅިގެން އެޗްޑީސީގެ އޮފީސް ބަންދުކޮށް، އެކުންފުނިން ދެމުން އަންނަ ޙިދުމަތްތައް ވަނީ އޮންލައިންކޮށް ލިބޭނެ ގޮތް ހަމަޖައްސާފައެވެ.

މާދަމާއިން ފެށިގެން އާއްމުންނަށް ޙިދުމަތްދޭ ގިނަ އޮފީސްތަކެއް ހުޅުވުމަށް ދަނީ ތައްޔާރުވަމުންނެވެ. މީގެއިތުރުން މާދަމާއިން ފެށިގެން ސަރުކާރުގެ އިދާރާތައްވެސް އާންމުކޮށް ހުޅުވުމަށް ވަނީ ނިންމާފައެވެ. ރައީސުލްޖުމްހޫރިއްޔާގެ އޮފީހުން ވިދާޅުވެފައި ވަނީ ސަރުކާރުގެ އިދާރާތައް ހުޅުވާފައި ހުންނާނީ ކުރިއެކޭވެސް އެއްގޮތަށް ކޮންމެ ހަފުތާއެއްގެ އާދީއްތަ ދުވަހުން ފެށިގެން ބުރާސްފަތިދުވަހުގެ ނިޔަލަށް ކޮންމެ ދުވަހަކު ހެނދުނު 8:00 އިން މެންދުރުފަހު 2:00 އަށް ކަމަށެވެ.

ސަރުކާރުގެ އިދާރާތައް އާންމުކޮށް ހުޅުއްވައިގެން ދެއްވަންޖެހޭ ޚިދުމަތްތަކާއި، ކުރައްވަންޖެހޭ މަސައްކަތްތައް ކުރެއްވުމަށް ހަމަޖެއްސެވުމާގުޅިގެން، އިދާރާތަކުން ޢަމަލު ކުރައްވާނެ އުސޫލުވެސް ރައީސުލްޖުމްހޫރިއްޔާގެ އޮފީހުން ވަނީ އާންމުކުރައްވާފައެވެ.