ކޯވިޑް-19ގެ ހާލަތާއި ގުޅިގެން ކަރަންޓް ބިލްތައް ދެއްކުމަށް ދަތިވެފައިވާ ފަަރާތްތަކަށް އިންސްޓޯލްމަންޓް އުޞޫލުން ނުވަތަ ބަހާލައިގެން ބިލް ދެއްކުމަށް ސްޓެލްކޯއިން ހުޅުވާލާފައިވާ ފުރުޞަތުގައި މިހާތަނަށް 220 ފަރާތަކުން އެޕްލިކޭޝަން ހުށަހަޅާފައިވާ ކަމަށް ސްޓެލްކޯއިން ވިދާޅުވެއްޖެއެވެ.
ބަހާލައިގެން ބިލް ދެއްކުމުގެ ފުރުސަތު ސްޓެލްކޯއިން ހުޅުވާލާފައިވަނީ މިމަހުގެ 5 ވަނަ ދުވަހުއެވެ. މި ފުރުޞަތުގެ ދަށުން މާރޗްމަހާއި، އޭޕްރީލް، މެއި އަދި ޖޫން މަހުގެ ބިލްތައް ދެއްކުމުގައި މާލީ ތަނަވަސްކަންނެތް ފަރާތްތަކަށް ބިލްތައް ބަހާލައިގެން ދެއްކުމުގެ ފުރުޞަތު ސްޓެލްކޯއިން ވަނީ ފަހިކޮށްދީފައެވެ. އެގޮތުން އެކަމަށް އެދޭ ފޯމް ކުންފުނީގެ ކައުންޓަރުން ލިބެން ހުންނާނެކަމަށާއި، އޮންލައިކޮށް ހުށައަޅަން ބޭނުންވާ ފަރާތްތަކަށް https://stelco.com.mv/rpex މި ލިންކް މެދުވެރިކޮށް ހުށައެޅޭނެކަމަށްވެސް ސްޓެލްކޯއިން ވިދާޅުވެއެވެ.
ސްޓެލްކޯއިން ވިދާޅުވީ، ފާއިތުވި 4 މަހުގެ ކަރަންޓް ބިލު ބަހާލައިގެން ދެއްކުމަށް މިހާތަނަށް 220 ފަރާތަކުން ހުށަހަޅާފައިވާކަމަށެވެ. މިކަމަށް އެދި ފޯމް ހުށަހެޅުމުގެ ފުރުޞަތު އެކުންފުނިން ހުޅުވާލާފައިވަނީ މިމަހުގެ 19 ވާ އާދިއްތަ ދުވަހުގެ ނިޔަލަށެވެ. އަދި ބަހާލައިގެން ބިލް ދައްކަން އެދޭ ކަސްޓަމަރުންނަށް ބިލް ދެއްކުމުގެ މުއްދަތު ކަނޑައަޅާނީ އެމީހެއްގެ ހާލަތަށް ބެލުމަށްފަހުކަމަށް ސްޓެލްކޯއިން ވިދާޅުވެއެވެ.
ކަރަންޓް ބިލްތައް އާދަޔާ ޚިލާފަށް ބޮޑުވެ ރައްޔިތުންގެ ޝަކުވާތައް ބޮޑުވުމުން މިދިޔަ މަހުގެ ކަރަންޓް ބިލުން 40 އިންސައްތަ ޑިސްކައުންޓް ދިނުމަށް ސްޓެލްކޯއިން ވަނީ ނިންމާފައެވެ. އަދި ރާއްޖޭގެ ގިނަ ރަށްތަކަށް ކަރަންޓްގެ ޚިދުމަތް ދެމުން އަންނަ ފެނަކައިންވެސް ވަނީ މިދިޔަ މަހުގެ ބިލްތަކުން 40 އިންސައްތަ ސަބްސިޑީޒް ދޭން ނިންމާފައެވެ.