"ވަރޗުއަލް މޯލްޑިވްސް"ގެ ނަމުގައި ރާއްޖެ އިޝްތިހަރުކުރުމަށް ކުރިއަށްގެންދާ ހަރަކާތުގައި ރާއްޖޭގެ ފަތަރުވެރިކަމުގެ ދާއިރާގައި ހަރަކާތްތެރިވާ 100 އަށްވުރެ ގިިނަ ރިސޯޓު އަދި ގެސްޓުހައުސްއިން މިހާތަނަށް ބައިވެރިވެފައިވާކަމަށް ޓީޓީއެމްއިން ހާމަކޮށްފިއެވެ.
ވަރޗުއަލްކޮށް ރާއްޖެ އިޝްތިހާރުކުރުމަށް ޓްރެވެލް ޓްރޭޑް މޯލްޑިވްސް، ޓީޓީއެމްއިން ކުރިއަށްގެންދާ މިހަރަކާތުގައި ރާއްޖޭގެ ރިސޯޓުތަކާއި ގެސްޓްހައުސްތައް ދަނީ އިޝްތިހާރުކުރަމުންނެވެ.
ކޯވިޑް-19ގެ ސަބަބުން މުޅި ދުނިޔޭގައި ފަތުރުވެރިކަން ހުއްޓި ފަތުރުވެރިކަން މާކެޓްކުރުމަށް ކުރިއަށްގެންދާ ގިނަ ހަރަކާތްތަކެއްވެސް ވަނީ ހުއްޓިފައެވެ. ރާއްޖޭގެ އިޤްތިޞާދުގެ ބޮޑުބައެއް ފަތުރުވެރިކަމަށް ބަރޯސާވެފައިވާއިރު މިދަނޑިވަޅުގައި ރާއްޖެ އިޝްތިހާރު ކުރެވޭނެ އެންމެ ރަނގަޅު އެއްގޮތަކީ މިއީކަމަށް ޓީޓީއެމްއިން ބުނެއެވެ.
ވާޗުއަލްކޮށް ރާއްޖެ އިޝްތިހާރުކުރުމަށް ޓީޓީއެމްއިން ކުރިއަށްގެންދާ މި ހަރަކާތް ފަށާފައިވަނީ ޖޫންމަހުއެވެ. މިއީ 18 މަސްދުވަހަށް ކުރިއަށްގެންދާ ހަރަކާތެކެވެ.
ވާޗުއަލްކޮށް އިޝްތިހާރުކުރާއިރު ބޭނުންކުރާ ފޮޓޯއާއި ވީޑީއޯތައް ނަގާފައިވާގޮތުން، ދުނިޔޭގެ ކޮންމެ ތަކެއްގައި ހުރިނަމަވެސް އެ ރިސޯޓެއް ނުވަތަ ގެސްޓްހައުސްއެއްގެ މަންޒަރުތައް ބަލާ ފަރާތްތަކަށް އެ ތަނުގައި ހުރެވޭކަހަލަ އިހުސާސެއް ކުރެވޭނެއެވެ. ޓީޓީއެމްއިން ބުނީ ވާޗުއަލް ރިއަލިޓީއަކީ މުސަތަޤްބަލުގައި ދުނިޔޭގެ ފަތުރުވެރިކަން އިޝްތިހާރުކޮށް މާކެޓްކުރުމަށް ބޭނުންކުރާ މުހިއްމު ވަސީލަތަކަށް ވެގެންދާނެކަމަށެވެ.