މާލެ ސިޓީގެ ގޭބިސީތަކުގައި ހަރުކޮށްފައި ހުރި ފެން މީޓަރުތަކުގެ ތެރެއިން ދުވަސްވެ ބާވެފައިހުރި ފެން މީޓަރުތައް ބަދަލުކުރުމުގެ މަސައްކަތް އެމް.ޑަބްލިޔު.އެސް.ސީން ފަށައިފިއެވެ.
ފެން މީޓަރުތައް ބަދަލުކުރުމަށް އެކުންފުނިން ކުރިއަށްގެންދާ ޚާއްސަ ޕްރޮގްރާމް ފަށާފައިވަނީ މިއަދެވެ. މި ޕްރޮގްރާމް ފަށްޓަވައިދެއްވީ އެމް.ޑަބްލިޔު.އެސް.ސީގެ މެނޭޖިން ޑިރެކްޓަރު ހަސަން ޝާހެވެ.
މިޕްރޮގްރާމުގެ ބޭނުމަކީ އެމް.ޑަބްލިޔު.އެސް.ސީގެ ޚިދުމަތްދޭން ބޭނުންކުރާ ފެން މީޓަރުތައް އެއް ޔުނިފޯމިޓީއަކަށް ބަދަލުކޮށް، ކުންފުނީގެ ސްޓޭންޑަޑް ދެމެހެއްޓުން ކަމަށް އެކުންފުނިން ވިދާޅުވެއެވެ. އަދި މި ޕްރޮގްރާމުގެ ދަށުން އައު ކުރާނީ މާލޭގެ ގޭގޭގައި ހަރުކޮށްފައިވާ ފެން މީޓަރުތަކުގެ ތެރެއިން 10 އަހަރަށްވުރެ ގިނަ ދުވަސްވެފައިވާ ފެން މީޓަރުތައް ކަމަށް އެމް.ޑަބްލިޔު.އެސް.ސީން ވިދާޅުވެއެވެ.
މާލޭގެ ގޭބިސީތަކުގައި ހަރުކޮށްފައިވާ ދުވަސްވެ ބާވެފައިހުރި ފެން މީޓަރުތައް ބަދަލުކުރުމުގެ މި ޕްރޮގްރާމް އެއް އަހަރު ދުވަހުގެ މުއްދަތަކަށް ކުރިއަށްދާނެ ކަމަށް އެމް.ޑަބްލިޔު.އެސް.ސީން ވިދާޅުވެއެވެ. އަދި އަމާޒަކީ މި މުއްދަތުގެ ތެރޭގައި 15،000 ފެން މީޓަރު ބަދަލުކުރުން ކަމަށްވެސް އެކުންފުނިން ވިދާޅުވެއެވެ.
އެމް.ޑަބްލިޔު.އެސް.ސީން މީގެ ކުރިން ފެން މީޓަރު ބަދަލުކޮށްދެނީ ކަސްޓަމަރު އެކަމަށް އެދުމުންނެވެ. ނަމަވެސް ކުންފުނިން ފެށި މި ޕްރޮގްރާމުގެ ދަށުން، ގޭގޭގައި ބާވެފައި ހުރި ފެން މީޓަރުތަކާއި، ދުވަސްވެ ހަޑިވެފައި ހުރި ފެން މީޓަރުތައް ބަދަލުކޮށްދޭނެކަމަށް އެކުންފުނިން ވިދާޅުވެއެވެ.