ދިވެހިރާއްޖޭގެ ގުދުރަތީ މުއްސަނދިކަމާއި ރީތިކަން އިޙްސާސްކޮށްލުމަށް ފަލަސްތީނުގެ ވެރިރަށް ގާޒާގައި "މޯލްޑިވް ގާޒާ"ގެ ނަމުގައި ރެސްޓޯރެންޓެއް ހުޅުވައިފިއެވެ.
ގާޒާގެ އަތިރިމައްޗާއި ގާތްގަނޑަކަށް 15 މީޓަރު ކައިރީގައި ހަދާފައިވާ މި ރެސްޓޯރެންޓަކީ 3 ބުރިއަށް ފަރުމާކޮށްފައިވާ ތަނެކެވެ. މިއީ ގާޒާގެ ރައްޔިތުންނަށް ޤައުމުން ބޭރަށް ދަތުރުނުކުރެވޭތީ، އަމިއްލަ ޤައުމުގައި ތިބެގެން ތަފާތު އެކި ޤައުމުތަކުގެ ތަޖުރިބާކޮށްލުމުގެ ފުރުޞަތު ފަހިކޮށްދިނުމަށް ހުޅުވި ތަނެކެވެ.
ރޮއިޓަރސްއާއި ވާހަކަދައްކަމުން "މޯލްޑިވް ގާޒާ"ގެ ކޯ އޯނަރ އިމާދު އަލްބައްޔާ ބުނީ، ރާއްޖެއަކީ ގާޒާގެ ރައްޔިތުންގެ މެދުގައިވެސް މަޤުބޫލު މަންޒިލެއްކަމަށެވެ. އެހެންކަމުން އަތިރިމަތީ ސަރަޙައްދެއްގައި މިކަހަލަ ތަނެއް ހުޅުވުމުގެ އެންމެ ބޮޑު ބޭނުމަކީވެސް ރާއްޖޭގެ "ޓްރޮޕިކަލް" ސިފަތައް އިޙްސާސްކޮށްލުމުގެ ފުރުޞަތު ގާޒާގެ ރައްޔިތުންނަށް ދިނުންކަމަށް އިމާދު ބުންޏެވެ.
"ގާޒާގެ ރައްޔިތުންނަކަށް ދިވެހިރާއްޖެއަކަށް ނުދެވޭ. އެހެންވީމަ އަހަރުމެން ވިސްނީ ރާއްޖެ ގާޒާއަށް ގެނައުން ކިހިނެއްހޭ ވާނީ. ރާއްޖޭގެ ގޮނޑުދޮށްތަކުން އެކުރެވޭ އިޙްސާސް މިތަނުން ލިބިގެންދާނެ" އިމާދު ބުންޏެވެ.
1200 މީހުންނަށް ކޭޓަރކުރެވޭ ފެންވަރަށް ހަދާފައިވާ މި ރެސްޓޯރެންޓުން ދިވެހިވަންތަ ކެއުންތައް ނުލިބުނެއްކަމަކު، ކަރާއާއި އަލަނާސިން ތައްޔާރުކޮށްފައިވާ "ޓްރޮޕިކަލް" ބުއިންތައް ލިބެން ހުންނާނެއެވެ. މިއީ ރާއްޖެއަށް އަންނަ ފަތުރުވެރިންގެ މެދުގައިވެސް މަޤުބޫލު ބުއިންތަކެކެވެ. އަދި ތާޒާ ކަނޑުމަހުން ތައްޔާރުކޮށްފައިވާ އެކި ކަހަލަ ކެއުންތައްވެސް މިތަނުން ލިބެން ހުރެއެވެ.
މި ރެސްޓޯރެންޓް ހުޅުވިތާ ކުޑަދުވަސްކޮޅެއްގެ ތެރޭގައި ގާޒާގެ ރައްޔިތުންގެ މެދުގައި މަޤުބޫލުތަނަކަށް މިތަން ވަނީ ވެފައެވެ. ލަނކުޑިއާއި ފިލާ ބޭނުންކޮށްގެން ރެސްޓޯރެންޓްގެ އެތެރެ ފަރުމާކޮށްފައިވާތީ، މިތަނުގެ އެތެރެއިންވެސް ރާއްޖެވަންތަ އިޙްސާސްތަކެއް ކުރެވޭކަން އެތަނަށް ދިޔަ ބައެއް ކަސްޓަމަރުން ބުނެފައިވެއެވެ. އަދި މޫދާކައިރީގައި ހުރުމުން ހިތަށް ފިނިކަން ލިބި އުފާވެރި އިޙްސާސްތަކެއް ކުރެވޭކަމަށާއި، ހިނދުކޮޅަކަށްވިޔަސް ރާއްޖޭގައި ޗުއްޓީ ހޭދަކޮށްލެވޭފަދަ އިޙްސާސެއްކުރެވޭކަމަށްވެސް ގާޒާގެ ބައެއް ރައްޔިތުން ބުނެފައިވެއެވެ.
"މޯލްޑިވް ގާޒާ"އަށް ގަޒާގެ ގިނަ ބަޔަކު މިހާރު ދަނީ ޒިޔާރަތްކުރަމުންނެވެ. މިތަނަށް ލިބޭ ތަރުހީބަށް ބަލާ، ރެސްޓޯރެންޓް އިތުރަށް ފުޅާކުރުމަކީ ކުރާ އުއްމީދެއްކަމަށް ކޯ އޯނަރ އިމާދު އަލްބައްޔާ ބުނެފައިވެއެވެ. މި ރެސްޓޯރެންޓް މިވަނީ ގާޒާގެ ރައްޔިތުންގެ އިތުރުން ދުނިޔޭގެ ސަމާލުކަންވެސް މިހާރު ހޯދާފައެވެ. އެތަނުގެ ފޮޓޯއާއި ވީޑިއޯތައް ވައިރަލްވާން ފަށާފައިވާއިރު، ގިނަ ބަޔަކު އަންނަނީ ރެސްޓޯރެންޓުގެ ހިތްގައިމުކަމާމެދު ތަޢުރީފުކުރަމުންނެވެ.
މި ކެފޭ ހުންނަ ސަރަހައްދަކީ ގާޒާގެ ރައްޔިތުންގެ މެދުގައި މަޤުބޫލުކަން ހޯދާފައިވާ ދުނިޔޭގެ އެކި މަންޒިލްތަކުގެ ކެއުންތަކާއި ބުއިންތައް ތަޖުރިބާކުރެވޭނެ ތަފާތު ކެފޭ ރެސްޓޯރެންޓްތައް ހިމެނޭ ސަރަޙައްދެކެވެ.
އެގޮތުން ސްޕެއިންގެ މާބެލާއާއި، މިޞްރުގެ ޝާމް އަލް ޝެއިޙްއާއި ދުބާއީފަދަ މަންޒިލުތަކަށް ޚާއްސަ ކެފޭ ރެސްޓޯރެންޓްތައް އެ ސަރަޙައްދުގައި ހުރެއެވެ.