ފްލެޓްތަކަށް ބަދަލުދިނުމުގެ އެއްބަސްވުމުގައި ބްރާސްފަތި ދުވަހުގެ ކުރިން ސޮއިކުރުމަށް އަންގައިފި

ގުޅީފަޅުން ފްލެޓުގަތުމަށް ފައިސާ ދައްކަންފަށާފައިވާ ފަރާތްތަކާއި، ވެށިފަހި މާލެ ޕްރޮގްރާމްގެ ދަށުން ޓާޓާ ފްލެޓަށް ދައްކަންޖެހޭ ފައިސާ ހަމަނުޖެހުނު ފަރާތްތަކުން ބަދަލުދިނުމުގެ އެއްބަސްވުމުގައި މިމަހުގެ 27 ވާ ބުރާސްފަތި ދުވަހުގެ ކުރިން ސޮއިކުރުމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން އަންގައިފިއެވެ.

ގުޅިފަޅުން ފްލެޓު ގަންނަން ފައިސާ ދައްކާފައިވާ މީހުންނާއި ޓާޓާ ފްލެޓަށް ދައްކަންޖެހޭ ފައިސާ ހަމަނުޖެހުނު މީހުންނަށް 2 ގޮތުންކުރެ ގޮތެއް ޚިޔާރުކުރުމުގެ ފުރުޞަތު ސަރުކާރުން ވަނީ ހުޅުވާލާފައެވެ. އެގޮތުން ހިޔާ މަޝްރޫޢުގެ 6720 ފުލެޓުގެ ތެރެއިން 2 ކޮޓަރީގެ ފުލެޓެއް ހިޔާރުކުރުން ނުވަތަ ފަހިދިރިއުޅުން ކޯޕަރޭޝަނުން ހުޅުމާލޭގައި ޢިމާރާތްކުރާ 1700 ފުލެޓުގެ ތެރެއިން 3 ކޮޓަރީގެ ފުލެޓެއް ހިޔާރުކުރުމުގެ ފުރުޞަތު އެ ފަރާތްތަކަށް ދީފައިވެއެވެ. މި ދެ މަޝްރޫޢަކީވެސް ހުޅުމާލޭ ދެވަނަ ފިޔަވަހީގައި ކުރިއަށްގެންދާ ބޯހިޔާވަހިކަމުގެ ދެ މަޝްރޫޢެވެ.

ހައުސިންގ މިނިސްޓްރީން ވިދާޅުވީ، ގުޅީފަޅުން ފްލެޓުގަތުމަށް ފައިސާ ދައްކަންފަށާފައިވާ ފަރާތްތަކާއި، ވެށިފަހި މާލެ ޕްރޮގްރާމްގެ ދަށުން ގާކޮށި އަދި ވޭސައިޑް އިން ފްލެޓަށް ދައްކަންޖެހޭ ފައިސާ ހަމަނުޖެހުނު ފަރާތްތަކުގެ ތެރެއިން ބަދަލުދިނުމުގެ އެއްބަސްވުމުގައި މިހާތަނަށް ސޮއިނުކުރާ ފަރާތްތަކުން އެ ދެގޮތުން ކުރެ ގޮތެއް ޚިޔާރުކުރުމަށްފަހު 27 އޮގަސްޓް 2020 ގެ 13:00 ގެ ކުރިން ބަންދުނޫން ކޮންމެދުވަހެއްގެ ހެނދުނު 9:00 އިން 13:00 އަށް އެ މިނިސްޓްރީއަށް ގޮސް ލިޔުމުގައި ސޮއިކުރަން ޖެހޭނެ ކަމަށެވެ.

ގުޅީފަޅު މަޝްރޫގައި ފްލެޓް ގަންނަން ފައިސާ ދެއްކި ފަރާތްތަކަށް، ގެއްލުމުގެ ބަދަލުގެ ގޮތުގައި 4 ލައްކައަށްވުރެ ގިނަ ރުފިޔާ ދިނުމަށާއި، އަދި އެފަރާތްތަކުން އެދޭނަމަ ހިޔާ މަޝްރޫއުގެ ތެރެެއިން ފްލެޓް ދިނުމަށް ސަރުކާރުން ނިންމާފައިވާކަމަށް ހައުސިންގ މިނިސްޓަރ މުހައްމަދު އަސްލަމް މީގެ ކުރިންވަނީ ވިދާޅުވެފައެވެ. ގުޅީފަޅު މަޝްރޫއުގެ ތެރެއިން، ފްލެޓް ގަތުމަށް 140 ފަރާތަކުން ފައިސާ ދައްކާފައިވެއެވެ. ގުޅީފަޅުން ފްލެޓްގަތް ބައެއް މީހުން، ޑައުންޕޭމެންޓާއި އިތުރު ފައިސާވެސް ދައްކާފައިވާކަމަށް މިނިސްޓަރ އަސްލަމް ވަނީ ކުރިން ވިދާޅުވެފައެވެ.

އެގޮތުން ގުޅީފަޅުން ފްލެޓް ލިބުނު ފަރާތްތަކަށް ބޯހިޔާވަހިކަމާއި ގެއްލުމުގެ ބަދަލު ދިނުމަށް ސަރުކާރުން ނިންމަވާފައިވާއިރު، އޭގެ ތެރެއިން ހިޔާ މަޝްރޫއިން ފްލެޓް ބޭނުން ނުވާ ފަރާތްތަކަށް އެހެން މަޝްރޫއަކުން ފްލެޓް ދޭން ވަނީ ނިންމާފައެވެ. 2017 ވަނަ އަހަރުގެ ޑިސެމްބަރު މަހުން ފެށިގެން 2020 ޑިސެމްބަރު މަހާއި ހަމައަށް އެފަރާތްތަކުން ކުއްޔަށް ދިރިއުޅެން ހޭދަކުރި ފައިސާއަށް ބަލައި މަހަކު، 12000 ރުފިޔާގެ ރޭޓުން، 3 އަހަަރަށް، 432000ރ (ހަތަރުލައްކަ ބައްތިރީސްހާސް ރުފިޔާ) ގެއްލުމުގެ ބަދަލުގެ ގޮތުގައި ދިނުމަށް ވަނީ ނިންމާފައެވެ.

އެހެން ނަމަވެސް މީގެ ތެރެއިން ހިޔާ މަޝްރޫގެ ތެރެއިން ފްލެޓް ބޭނުންވާ އަދި ސަރުކާރުގެ އެހެން މަޝްރޫއެއްގެ ތެރެއިން 3 ކޮޓަރީގެ ފްލެޓް ގަންނަން ބޭނުންވާ ފަރާތްތަކަށް މި އަހަރުގެ ޑިސެމްބަރު މަހުގެ ފަހުން އިތުރަށް ހިނގާ މުއްދަތައް ފައިސާއެެއް ނުދޭނެކަމަށް، ސަރުކާރުގެ ބޯހިޔާވަހިކަމުގެ މަޝްރޫތަކާއި ގުޅޭގޮތުން ނޫސްވެރިންނަށް މައުލޫމާތު ދިނުމަށް ބޭއްވެވި ބައްދަލުކުރެއްވުމުގައި މިނިސްޓަރ އަސްލަމްވަނީ ވިދާޅުވެފައެވެ.