ބެންކޮކުން ރާއްޖެއަށް މުދާ ގެންނަން ބޭނުންވާ ވިޔަފާރިވެރިންނަށް ހާއްސަ ކާގޯ ފްލައިޓު ދަތުރެއް ބާއްވަނީ
ތައިލޭންޑުގެ ވެރިރަށް ބެންކޮކުން ރާއްޖެއަށް މުދާ ގެންނަން ބޭނުންވާ ރާއްޖޭގެ ވިޔަފާރިވެރިންނަށް އަމާޒްކޮށްގެން ޙާއްސަ ކާގޯ ފްލައިޓު ދަތުރެއް ބޭއްވުމަށް ސްޕެންސް މޯލްޑިވްސްއިން ނިންމައިފިއެވެ.
ސްޕެންސް މޯލްޑިވްސްގެ މެނޭޖިންގ ޑިރެކްޓަރ މުޙައްމަދު ފިރާޤު ވިދާޅުވީ މި ދަތުރު ބޭއްވުމަށް އެ ކުންފުނިން ނިންމީ ގިނަ އަދަދެއްގެ ވިޔަފާރިވެރިންގެ އެދުމުގެ މަތިންކަމަށެވެ. އަންނަ މަހުގެ 15ވަނަ ދުވަހު ބޭއްވުމަށް ހަމަޖެހިފައިވާ މި ކާގޯ ދަތުރުގައި ބޭނުންކުރުމަށް ހަމަޖެހިފައިވަނީ ސްރީލަންކަން އެއަރލައިންސްގެ ކާގޯ އުފުލުމަށް ޙާއްސަ ފްލަައިޓެއްކަމަށް ފިރާޤު ވިދާޅުވިއެވެ.
" ބެންކޮކުން މުދާ ގެނައުމުގައި ރާއްޖޭގެ ވިޔަފާރިވެރިންނަށް އެބަހުރި ދަތިތަކެއް، މި ބާއްވާ ޗާޓަރ ކާގޯ ދަތުރާއި އެކު ރާއްޖެއަށް ބެންކޮކުން މުދާ ގެންނަން ބޭނުންވާ ފަރާތްތަކަށް ފަސޭހަވެގެންދާނެ، މުދާ ގެންނަން ބޭނުންވާ ފަރާތްތަކުން ސްޕެންސް މޯލްޑިވްސްއަށް ގުޅައިގެން މިކަމާއި ގުޅޭ ކަންތައްތައް ކުރިއަށްގެންދެވޭނެ މިހާރު"، ފިރާޤު ވިދާޅުވިއެވެ.
ޖުމްލަ 42 ޓަނާއި ހަމައަށް މި ފްލައިޓުގައި ރާއްޖެއަށް ކާގޯ ގެނެވޭނެ ކަމަށް ފިރާޤު ވިދާޅުވިއެވެ. ސްރީލަންކަން އެއަރލައިންސްއިން ދަނީ ރާއްޖެއަށް މިހާރުވެސް ކާގޯ ދަތުރުތައް ބާއްވަމުންނެވެ.
ސްރީލަންކާގެ ވެރިރަށް ކޮލޮމްބޯ އާއި ރާއްޖެއާއި ދެމެދު އެެއަރލައިންއިން ދަނީ ރާއްޖެއަށް ކޮންމެ ހަފްތާއެއްގައިވެސް 5 ނޫނީ 7 ފްލައިޓު ބާއްވަމުންނެވެ. މި ފްލައިޓުތަކުގައިވެސް ގިނަ އަދަދެއްގެ ކާގޯދަނީ ރާއްޖެއަށް ގެންނަމުންނެވެ.