ގެސްޓްހައުސްތައް ވީ އެންމެ އަވަހަކަށް ހުޅުވުމަށް ދަނީ މަޝްވަރާކުރަމުން- ޓުއަރިޒމް މިނިސްޓަރ
ގެސްޓްހައުސްތައް ވީ އެންމެ އަވަހަކަށް ހުޅުވުމަށްޓަކައި އެޗްޕީއޭއާއެކު މަޝްވަރާކުރަމުންދާކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަފުޅުދައްކަވަމުން މިނިސްޓަރ މައުސޫމް ވިދާޅުވީ ގެސްޓްހައުސް ވިޔަފާރިތައް އަލުން ހުޅުވާލުމުގެ ހުއްދަ ދޭންޖެހޭކަމަށެވެ. އަދި ރައީސުލްޖުމްހުރިއްޔާ އިބްރާހީމް މުޙައްމަދު ޞާލިހްގެ ވިސްނުންފުޅުވެސް ހުންނެވީ ވީ އެންމެ އަވަހަކަށް ގެސްޓްހައުސްތަކުގެ ވިޔަފާރިތައް ކުރިއަށް ގެންދިއުމަށް ހުއްދި ދިނުމަށްކަމަށްވެސް މިނިސްޓަރ ވިދާޅުވިއެވެ. މިގޮތުން ގެސްޓްހައުސްތަކުގެ ވިޔަފާރިތައް ހުޅުވުގެ ހުއްދަދިނުމުގެ ކުރިން ކަމާބެހޭ ފަރާތްތަކާއެކު މަޝްވަރާތްތައް ކުރަމުން އަންނަކަމަށާއި އަދި މަޝްވަރާތައް ވަރަށް ކާމިޔާބުކަމަށްވެސް މިނިސްޓަރ ވިދާޅުވިއެވެ.
"ގެސްޓްހައުސްތައް ހުޅުވާލާއިރު ނާމޫނާ މޮޑެލްއަކަށް ހުޅުވެގެންދާނެކަމަށް އުއްމީދު ކުރަން. ރަށްރަށުންވެސް އެދެމުން ދޭ ގެސްޓްހައުސްތަކުގެ ވިޔަފާރި ހުޅުވާލުމަށް. އަދި ރަށްރަށުގައި ކަނޑައަޅާފައިވާ އުޞޫލްތަކާއެއް އެއްގޮތަށް އެތަންތަން ހިންގުމާއި އެޗްޕީއޭގެ އުޞޫލްތަކާ އެއްގޮތަކަށް ކަންކަން މެނޭޖްކޮށްގެން ޚިދުމަތް ދެވޭނެކަމަށް ރަށްރަށުންވެސް ބުނަމުންދޭ." މިނިސްޓަރ އޮފް ޓުއަރިޒަމް އަބްދުﷲ މަޢުޞޫމް ވިދާޅުވިއެވެ.
ފަތުރުވެރިންގެ ޕީސީއާރް ޓެސްޓް ހެދުމުގައިވެސް ކުރިން ދަތިތަކެއް ހުރި ނަމަވެސް މިހާރު އެކަމަށްވެސް ލުއިފަސޭހަ ގޮތްތަކެއް ހޯދުމަށް ކަމާބެހޭ ފަރާތްތަކުން މަސައްކަތްތައް ކުރަމުންދާކަމަށް ޓުއަރިޒަމް މިނިސްޓަރ ވިދާޅުވިއެވެ. އެގޮތުން ރަށްރަށުން ސާމްޕަލް ގެނައުމާއި ޓެސްޓު ހެދޭނެ އިންތިޒާމުތައްވެސް މިހާރު ހަމަޖެހިފައިވާކަމަށް މިނިސްޓަރ ފާހަގަކުރެއްވިއެވެ.
ފަތުރުވެރިކަމުގެ ދާއިރާގެ 20 އިންސައްތަ ހިއްސާކުރަނީ ގެސްޓްހައުސްގެ ވިޔަފާރިތަކެވެ. ކޯވިޑް-19 އާ ގުޅިގެން ބޯޑަރު ބަންދުކުރުމަށްފަހު އަލުން ހުޅުވާފައިވަނީ މިދިޔަ މަހުގެ ތެރޭގައެވެ. އެއާއެކު ފަތުރުވެރިކަމުގެ ސިނާއަތުގެ ބައެއްކަންކަން ފެށުމުގެ ހުއްދަވެސް ވަނީ ދީފައެވެ. އަދި ބައެއް ރިސޯޓްތައް ހުޅުވާ ޚިދުމަތްދެމުންދާއިރު ގެސްތްހައުސްތަކުގެ ވިޔަފާރިތައް ފަށާފައެއް ނުވެއެވެ.
އޯގަސްޓް 1 ގައި ގެސްޓްހައުސްތައް ހުޅުވާނެކަމަށް ކުރިން އިއުލާންކޮށްފައި އޮތުމުން ގެސްޓްހައުސްތަކުންވެސް ދިޔައީ ލިބޭވަރަކުން ބުކިންތައް ނަގަމުންކަމަށެވެ. ނަމަވެސް ކުއްލިގޮތަކަށް ސަރުކާރުގެ ވިސްނުން ބަދަލުކޮށް ގެސްޓްހައުސްތައް އޮގަސްޓްމަހު ނުހުޅުވާ ގޮތަށް ނިންމުމުން އިތުރު ތަކްލީފްތަކެއް ގެސްޓްހައުސްތަކަށް ކުރިމަތިވެ މުޅި އިންޑަސްޓްރީއަށް ގެއްލުމާއި ކުރިމަތިލާންޖެހިފައިވާކަމަށް ގެސްޓް ހައުސްގެ ސިނާއަތުގައި ހަރަކާތްތެރިވާ ފަރާތްތަކުން ބުނެއެވެ.