މާދަމާ ޗައިނާއާއި ދެކޮޅަށް ނިކުންނަ މެޗަކީ ކޯޗިންގ ކެރިއަރުގައި މިހާތަނަށް ކުރިމަތިލާ އެންމެ މުހިންމު މެޗުކަމަށް ޤައުމީ ފުޓްބޯޅަ ޓީމުގެ ވަގުތީ ކޯޗް އިސްމާއިލް މަހުފޫޒް ބުނެފިއެވެ.މަހުފޫޒް ބުނީ މީ މެޗަކީ ވަރަށް ހާއްސަ މެޗެއްކަމަށެވެ. މިއީ ކޯޗިންގ ކެރިއަރުގެ އެންމެ މުހިންމު މެޗުކަމަށްވާއިރު، ޤާބިލްކަންހުރި ވަރަކުން މި މެޗުގައި ޓީމަށް ރަނގަޅު ނަތީޖާއެއް ހޯދުމަށް މަސައްކަތްކޮށްދޭނެކަމަށެވެ.ޗައިނާއަކީ އޭޝިޔާގެ ފުޓްބޯޅައިގެ ވަރުގަދަ ޓީމަކަށް ވާއިރު ޗައިނާ ޓީމުގައި ޔޫރަޕުގެ ވަރުގަދަ ކްލަބަތަކަށް ކުޅެފައިވާ ކުޅުންތެރިން އެބަތިބިކަމަށެވެ. މަހުފޫޒް ބުނީ ރާއްޖެއިން މި މެޗުގައި ޗައިނާގެ މައްޗަށް ގަދަވެގަންނަން މަސައްކަތް ނުކުރާނެކަށެވެ. އެހެންނަމަވެސް ނުވަދިހަ މިނިޓް ވަންދެން ޑިފެންސްކުރުމުގެ ވިސްނުމެއްވެސް ރާއްޖޭގެ ނެތްކަމަށް މަހުފޫޒް ބުންޏެވެ.މި މެޗަށް ޓީމު ނުކުންނަނީ ޓީމުގެ މުހިންމު ބައެއް ކުޅުންތެރިންނާ ނުލައެވެ. ޓީމުގެ ބައެއް ކުޅުންތެރިން އަނިޔާގައި ތިބިއިރު ކެޕްޓަން އަލީ އަޝްފާގަށްވެސް މި މެޗުގައި ނުކުޅެވޭނެއެވެ.މަހުފޫޒް ބުނީ ޓީމުގެ މުޙިއްމު ބައެއް ކުޅުންތެރިންނާ ނުލާ މާދަމާ ޗައިނާއާއި ދެކޮޅަށް ނިކުންނަނީ ރާއްޖޭގެ އެންމެ ވަރުގަދަ ޓީމޭ ބުނެވެން ނެތްކަމަށެވެ. އެކަމަކު މިއީ ޓީމުގައި ތިބި ޒުވާން ކުޅުންތެރިންނަށް ލިބޭ ރަނގަޅު ފުރުސަތެއްކަމަށާ މިހާރު ތިބީވެސް ޓީމުގެ މުހިންމު ކުޅުންތެރިން ރިޕްލޭސް ކޮށްލެވޭ ވަރުގެ ކުޅުންތެރިންކަމަށް މަހުފޫޒް ބުންޏެވެ. ކެޕްޓަން އަޝްފާޤާ ނުލާ ކުޅުމަކީ އަބަދުވެސް އުނދަގޫކަމަކަށް ވާނޭކަން މަހުފޫޒް ފާހަގަކުރިއެވެ.މި މެޗުގައި މިހާރު ޓީމާއެކު ހުރި ޒުވާން ކުޅުންތެރިޔާ އަބުދުﷲ މުއާޒުއަށް ނުކުޅެވޭނެއެވެ.، އެއީ އެންމެ ފަހުން ފިލިޕީންސްގެ ޤައުމީ ޓީމާއެކު ކުޅުނު މެޗުގައި އޭނާގެ ފަޔަށް ލިބުނު އަނިޔާއަކާއި ގުޅިގެންނެވެ. އެހެން ކުޅުންތެރިން މެޗަށް ފިޓްވާނެކަމަށް ކޯޗް ބުންޏެވެ.މި މެޗަކީ ފަސޭހަ މަޗަކަށް ވެގެން ނުދާނެކަމަށާއި އެކަމަކު މިހާރު ޓީމް އޮތީ މި މެޗަށް ވަރަށް ރަނގަޅަށް ތައްޔާރުވެފައިކަމަށް ޓީމުގެ މުހިންމު ކުޅުންތެރިއެއްކަމަށްވާ މުޙައްމަދު އާރިފް ބުންޏެވެ.މިއަހަރު ރާއްޖޭގެ ޤައުމީ ޓީމުގެ ކޯޗްގެ މަޤާމުގައި ހުރި ވެލިޒަރ ޕޮޕޯވް ވަނީ އިންޑިއަން އޯޝަން އައިލެންޑް ގޭމްސްއަށްފަހު މަޤާމުން ވަކިވެފައެވެ. ޓީމަށް މިހާރު އިރުޝާދުދެމުން ދަނީ އެސިސްޓެންޓް ކޯޗް އިސްމާއިލް މަހުފޫޒެވެ.ވޯލްޑްކަޕް ކޮލިފިކޭޝަނުގައި ޗައިނާޔާއި ރާއްޖެ ބައްދަލުކުރާ މެޗް ފެށުމަށް ހަމަޖެހިފައިވަނީ ރާއްޖެ ގަޑިން މާދަމާ ހަވީރު ހަތަރު ގަޑި ތިރީސް ފަހެއްގައެވެ.