ޤަވާއިދާ ޚިލާފަށް ކާބޯތަކެތީގެ ޚިދުމަތްދޭ ފަރާތްތަކާމެދު ފިޔަވަޅު އަޅާނެކަމަށް ހެލްތް ޕްރޮޓެކްޝަން އެޖެންސީ، އެޗް.ޕީ.އޭއިން ވިދާޅުވެއްޖެއެވެ.
އެޗް.ޕީ.އޭއިން ވިދާޅުވީ، ސަރުކާރުގެ ކަމާބެހޭ އިދާރާތަކުން ނަގަންޖެހޭ ހުއްދަ ނުނަގާ، ޤަވާޢިދާ ޚިލާފަށް ރަޖިސްޓްރީނުކޮށް ވިޔަފާރި އުޞޫލުން ކާބޯތަކެތީގެ ޚިދުމަތްތައް ބައެއް ފަރާތްތަކުން ދެމުންގެންދާކަން ފާހަގަކުރެވިފައިވާކަމަށެވެ.
އެގޮތުން ރަޖިސްޓްރީ ނުކުރާ ބަދިގެފަދަ ތަންތަނުގައި ކާބޯތަކެތި ތައްޔާރުކޮށް ވިއްކުމާއި، ފިހާރަތަކާއި ގޭގޭގައި ކާބޯތަކެތީގެ ބާވަތްތަކާއި، ދުންފަތުގެ ބާވަތްތައް އޮންލައިން ޕްލެޓްފޯރމްތަކުގައާއި، އެހެންގޮތްގޮތަށް އިޝްތިހާރުކޮށް ޑެލިވަރީ ޚިދުމަތް ދެމުންގެންދާކަމުގެ މަޢުލޫމާތާއި ޝަކުވާ އެ އެޖެންސީއަށް ލިބެމުންދާކަމަށް އެޗް.ޕީ.އޭއިން ވިދާޅުވެއެވެ.
އެހެންކަމުން އެއްވެސް ފަރާތަކުން ވިޔަފާރީގެ އުޞޫލުން ކާބޯތަކެތީގެ ޚިދުމަތް ފޯރުކޮށްދޭނަމަ، ކާބޯތަކެތީގެ ޚިދުމަތް ދިނުމުގައި ހުންނަންޖެހޭ ސާފުތާހިރުކަމުގެ މިންގަނޑުތައް ބަޔާންކުރާ ޤަވާޢިދާއި، ކަމާގުޅޭ އެހެން ޤަވާއިދުތަކާ އެއްގޮތްވާގޮތުގެ މަތިން ހުއްދަ ނެގުމަށް އެޗް.ޕީ.އޭއިން ވަނީ ދަންނަވާފައެވެ. އަދި ޚިދުމަތް ހޯދާ ފަރާތްތަކުންވެސް ރަޖިސްޓްރީނުކޮށް ހިންގާ މިފަދަ ތަންތަނުން ޚިދުމަތް ނުހޯދުމަށް އެ އެޖެންސީން ވަނީ އިލްތިމާސްކުރައްވާފައެވެ.
ރަޖިސްޓްރީނުކޮށް ވިޔަފާރި އުޞޫލުން ކާބޯތަކެތީގެ ޚިދުމަތްދޭ ފަރާތްތަކުން ރަޖިސްޓްރީ ކުރުމަށްޓަކައި ހެލްތު މިނިސްޓްރީގެ ޕޯރޓަލް މެދުވެރިކޮށް އެކަމަށް ހުށަހެޅުއްވުމަށް އެޗް.ޕީ.އޭއިން ވަނީ އަންގަވާފައެވެ. އަދި ރަޖިސްޓްރީނުކޮށް ކާބޯތަކެތީގެ ޚިދުމަތް ފޯރުކޮށްދޭ ފަރާތްތަކާމެދު، ޤަވާޢިދުގައިވާގޮތުގެ މަތިން ފިޔަވަޅުއަޅާނެކަމަށްވެސް އެ އެޖެންސީން ވަނީ ވިދާޅުވެފައެވެ.