މިއަދަކީ ފުރަތަމަ ފަހަރަށް ރާއްޖޭގައި ޤައުމީ ފެންވަރުގައި "މާމަ ކާފައިންގެ ދުވަސް"ފާހަގަ ކުރާ ދުވަހެވެ. ކޮންމެ އަހަރެއްގެ ސެޕްޓެމްބަރު މަހުގެ 1 ވަނަ ދުވަހު "މާމަ ކާފައިންގެ" ދުވަހުގެ ގޮތުގައި ފާހަގަކުރުމަށް ސަރުކާރުން ނިންމަވާފައި ވަނީ މިދިޔަ އަހަރުގެ ނޮވެމްބަރު މަހުގެ 18 ވަނަ ދުވަހުއެވެ. މިއހަރުގެ މިދުވަހުގެ ޝިއާރެއްގެ ގޮތުގައި ކަނޑައަޅާފައި ވަނީ "ލޯތްބާއި އިޙްތިރާމް"އެވެ.
ދުވަހުގެ ތަޙުނިޔާ ހުރިހާ މާމަ ކާފައިންނަށް ފޮނުވަމުން ޖެންޑަރ މިނިސްޓަރ އައިޝަތު މުހައްމަދު ދީދީ ވަނީ މާމަ ކާފައިންނަކީ އަޅުގަނޑުމެންގެ ހަޔާތުގެ އެންމެ މުހިއްމު މީހުން ކަމުގައި ދެކި ގެވެށި ގުޅުން ވަރުގަދަ ކުރުމުގައި މާމަމެންނާއި ކާފަމެންގެ ބައިވެރިވުވުން އަބަދުވެސް ހޯދުމަށް ގޮވާލައްވާފައެވެ.
އުމުރުން ދުވަސްވީ މީހުންގެ ދުވަސް މީގެ ކުރިން ކޮންމެ އަހަރަކު ފާހަގަކުރި ނަމަވެސް، ރާއްޖޭގައި މާމަ ކާފައިންނަށް ވަކި ޚާއްސަ ދުވަހެއް މީގެކުރިން ފާހަގަ ކޮށްފައެއް ނުވެއެވެ. ޤައުމީ ފެންވަރުގައި މާމަ ކާފަ ދުވަސް ފާހަގަކުރުމުގެ މަޤްޞަދަކީ އުމުރުން ދުވަސްވީ މީހުން ޤައުމަށް ކޮށްދީފައިވާ ޚިދުމަތްތައް އަންނަން އޮތް ޖީލުތަކަށް ފޯރުކޮށްދިނުމެވެ. އަދި އެ މީހުންނަށް ލިބިފައިވާ ތަޖުރިބާ އާއި މަޢުލޫމާތު ޙިއްޞާކުރުމަކީ މުހިންމު ކަމެއްކަން ހާމަކޮށްދިނުމާއި މުޖުތަމަޢުގައި ދިރިއުޅޭ ކޮންމެ ގިންތިއަކާއި، ފަންތިއެއްގެ ބަޔަކުވެސް ހަވާސާކުރުމެއް ނެތި އެންމެންގެ ބައިވެރިވުން އެކުލެވޭ ވެއްޓެއްގެ ގޮތުގައި މުޖުތަމަޢު ހެދުމަކީވެސް މާމަ ކާފަ ދުވަސް ފާހަގަކުރުމުގެ މުހިއްމު މަޤްޞަދެކެވެ.
ޤައުމީ އަދި ބައިނަލްއަޤުވާމީ އެހެނިހެން ދުވަސްތައް ފާހަގަކުރާ ގޮތަށް ޤައުމީ މާމަ، ކާފަ ދުވަސް ފާހަގަކޮށް، ޅަދަރިންނާއި ޒުވާނުންގެ ހިތްތަކުގައި މާމައިންނަށާއި ކާފައިންނަށް ލޯތްބާއި އަޅާލުމާއި، އިޙްތިރާމް އެންމެ މަތީދަރަޖައަކަށް އަށަގަނެވި ތިން ޖީލު ގުޅިގެން އެކުވެރި، އަޅައިލާ އަދި އޯގާތެރި މުޖުތަމަޢުއެއް ބިނާކުރުމުގެ ފުރުޞަތު ލިބިގެންދާނެ ކަމުގައި ޖެންޑަރ މިނިސްޓްރީން ވިދާޅުވެއެވެ.
މި ދުވަސް ފާހގަކުރުމަށްޓަކައި ޖެންޑަރ މިނިސްޓްރީން ވަނީ ގިނަ ހަރަކާތްތަކެއް ކުރިއަށް ގެންދިޔުމަށް ރާވާފައެވެ. މިގޮތުން މާމަ ކާފައިންގެ އަގުވަޒަންކޮށް އެމީހުންނަށް އާއިލާ ތެރެއިން ލިބެންވާ ފުރިހަމަ އަޅާލުމާއި އިޙްތިރާމް ހޯދައިދިނުމަށް މަގުފަހިކުރުމުގެ ގޮތުން ވެބިނަރ އެއް ބޭވުމަށް ވަނީ ހަމަޖައްސާފައެވެ. މީގެ އިތުރުން ގުރައިދޫ މަރުކަޒާއި އަތޮޅުތަކުގައި ހުރި އެ މިނިސްޓްރީގެ ސެންޓަރުތަކުގައި މިދުވަސް ފާހަގަކުރުމަށް މިހާލަތަށް ރިއާއަތްކޮށް ތަފާތު ހަރަކާތްތތަކެއް ހިންގުމަށް ހަމަޖެހިފައިވާކަމށް ޖެންޑަރ މިނިސްޓްރީން ވިދާޅުވެއެވެ. އަދި ސޯޝަލް މީޑިއާ މެދުވެރިކޮށްވެސް ދުވަހުގެ ތަޙުނިޔާ ފޮނުވުމުގެ ހަރަކާތްތަކެއްވެސް ކުރިއަށް ގެންދިޔުމަށް ވަނީ ނިންމާފައެވެ.
ކޯވިޑް-19 ގެ ސަބަބުން މާ ކުލަގަދަކޮށް މިދުވަސް ފާހަގަ ނުކުރެވުނަސް މި ބަލި ނެތް ރަށްތަކުގައި ރައްކާތެރިކަމާއެކު މިދުވަސް ފާހގަކުރެވިދާނެއެވެ. އެއްގޭގައި ދިރި އުޅޭ މީހުންވެސް ގޭގައި އުޅޭ މާމައިންނާއި ކާފައިންގެ ދުވަސްވެސް ފާހަގަކުރެވިދާނެއެވެ. ކޮންމެ މާމައަކާއި ކާފައަކަށް ދޭންޖެހޭ ލޯތްބާއި އިޚްތިރާމަކީ އެމީހެއްގެ ޢާއިލާ ނުވަތަ ދަރިންގެ ފަރާތުން ލިބި އެމީހުން ރައްކާތެރިކަމާއި އަޅާލުމާއި ލޯބިދީގެން ބެލެހެއްޓުމަކީ ކޮންމެ މީހެއްގެވެސް ޒިންމާއަކަށް ހަދަންޖެހެއެވެ.