ދައުލަތުގެ މީޑިއާއަށް 40 އަހަރަށްވުރެ ގިނަދުވަހު ޚިދުމަތް ކުރެއްވުމަށްފަހު އާދަމް ލަޠީފް ރިޓަޔަރ ކުރައްވައިފި
ދައުލަތުގެ މީޑިއާއަށް 40 އަހަރަށްވުރެ ގިނަދުވަހު ޚިދުމަތްކުރެއްވުމަށްފަހު، ޕީ.އެސް.އެމްގެ މެނޭޖަރ ޓެކްނިކަލް އޮޕަރޭޝަންސް އާދަމް ލަޠީފް ރިޓަޔަރކުރައްވައިފިއެވެ.
އާދަމް ލަޠީފް ރިޓަރކުރެއްވުމާގުޅިގެން، އޭނާގެ ޚިދުމަތަތްތަކުގެ އަގު ވަޒަންކޮށް ޝަރަފުވެރިކަމުގެ ހަނދާނީ ފިލައަކާއި، ޚާއްސަ ރިޓަޔަރމަންޓް ޕެކޭޖެއް ޕީ.އެސް.އެމްގެ މެނޭޖްމަންޓުގެ ފަރާތުން ވަނީ އާދަމް ލަތީފަށް ހަދިޔާކޮށްފައެވެ.
ދައުލަތުގެ މީޑިއާގައި މެދުނުކެނޑި 40 އަހަރަށްވުރެ ގިނަދުވަހު ޚިދުމަތްކުރެއްވުމަށްފަހު އާދަމް ލަތީފް ރިޓަޔަރކުރެއްވުމާގުޅިގެން، އެކަމުގެ އަގު ވަޒަންކުރުމުގެގޮތުން ޝަރަރުވެރިކަމުގެ ހަނދާނީ ފިލާ އަރުވާފައިވަނީ އެކަމަށްޓަކާ ދިވެހިރާއްޖޭގެ އަޑުގެ ސެނެކޯ މާލަމުގައި ބޭއްވި ރަސްމިއްޔާތެއްގައި ދައުލަތުގެ މީޑިއާ މިހާރު ހިންގަމުންދާ ޕީ.އެސް.އެމްގެ މެނޭޖިންގ ޑިރެކްޓަރ ޢަލީ ޚާލިދާއި، ޑެޕިއުޓީ މެނޭޖިންގ ޑިރެކްޓަރ މުޙައްމަދު ޝަމީމެވެ.
މި ރަސްމިއްޔާތުގައި ވާހަކަފުޅުދައްކަވަމުން ޕީ.އެސް.އެމްގެ މެނޭޖިންގ ޑިރެކްޓަރ ޢަލީ ޚާލިދު ވިދާޅުވީ، މެދުނުކެނޑި 40 އަށްވުރެ ގިނަ އަހަރު އެއްތަނެއްގައި މަސައްކަތް ކުރުމަކީ މަސައްކަތަށް ހުރި ޝަޢުގާއި ތަނަށް ހުރި ލޯބި ދައްކުވައިދޭ ވަރަށްވެސް އަލިގަދަ ހެއްކެއްކަމަށެވެ. އަދި ޢާދަމް ލަތީފްއަކީ މަސައްކަތަށް ކަމޭހިތާ، ތަނަށް އިޙްލާސްތެރިވި މުވައްޒަފެއްކަމަށާއި، އާދަމް ލަތީފް ކުންފުންޏާ ވަކިވެގެންދިއުމަކީ ތަނަށްލިބޭ ފަޅުކަމެއްކަމަށްވެސް ޢަލީ ޚާލިދު ވިދާޅުވިއެވެ.
"އާދަމް ލަޠީފް އަޅުގަނޑުމެންނާއި ވަކިވެގެންދަނީކީ މިއަދު ޢާދަމް ލަތީފަށް އަޅުގަނޑުމެންގެ ބޭނުން ނެތިގެނެއްނޫން. މިތަނަށް އާދަމް ލަޠީފް ބޭނުން. އެކަމު މިއަދު ކަންތައްތައް ވާގޮތާއި، ކަންކަން ހަމަޖެހިފައި އޮންނަގޮތުން އަލްވަދާޢު ކިޔަން މިޖެހެނީ. މިއީ ހަޤީޤަތަކީ. އެހެންނަމަވެސް އަޅުގަނޑުމެން ޢާދަމް ލަތީފްގެ ބޭނުން އަދިވެސް ހިފޭ ހިސާބެއްގައި މިތިބީ" ޢަލީ ޚާލިދު ވިދާޅުވިއެވެ.
މި ރަސްމިއްޔާތުގައި ވާހަކަދައްކަވަމުން އާދަމް ލަޠީފް ވިދާޅުވީ، އިލެކްޓްރޯނިކް މަސައްކަތްތަކަކީ އޭނާ އަބަދުވެސް ވަރަށް ޝައުގުހުންނަ ދާއިރާއެއްކަމަށާއި، ދައުލަތުގެ މީޑިއާއާއި ގުޅުނީވެސް އެ ދާއިރާއަށް ހުރި ލޯތްބެއްގެ ބޮޑުކަމުންކަމަށެވެ. ފާއިތުވި އަހަރުތަކުގައި މަސައްކަތުގައި ދެމިހުރުމަށް ކުންފުނީގެ ފަރާތުން ލިބުނު އެއްބާރުލުމާއި، އެކުގައި މަސައްކަތް ކުރި މުވައްޒަފުންގެ ފަރާތުން ލިބުނު އެހީތެރިކަން ފާހަގަކޮށް، ޢާދަމް ލަތީފް ވަނީ އެކަމަށް ޝުކުރު އަދާކުރައްވާފައެވެ. ތަނުން ވަކިވެގެންދަނީ ވަރަށް އުފާވެރި މަޖާ ހަނދާންތަކަކާއެކުކަމަށާއި، ތަނުން ވަކިވެގެންދިޔަޔަސް ޤާބިލުކަން ހުރި މިންވަރަކުން ކުންފުންޏަށް އެހީތެރިކަން ފޯރުކޮށްދޭން އަބަދުވެސް ތައްޔާރަށް ހުންނެވިކަމަށް ޢާދަމް ލަތީފް ވިދާޅުވިއެވެ. އަދި އެކަމަށް އެއްވެސް އަގެއްވެސް ނުނަގާނެކަމަށްވެސް އޭނާ ވިދާޅުވިއެވެ.
"މިތަނުގައި އުޅުނީ ވަރަށް އުޅޭ ހިތުން، މަސައްކަތް ކުރީ ވަރަށް ކުރާ ހިތުން. ވަރަށް ގިނަ ބައެއްގެ އެހީތެރިކަމާ އެއްބާރުލުމާއެކު މިހާ ދުވަހު މިތަނުގައި އުޅެވުނީ. އަދިވެސް މިތަނުން އެދުނު ކޮންމެކަމެއް ހިލޭ ސާބަހަށްކޮށްދޭން ތައްޔާރަށް އަޅުގަނޑު މިހުރީ. އަޅުގަނޑަށްކޮށްދެވޭ ވަރުގެ ކަމެއްވިއްޔާ. ގެއަށްދިޔަޔަސް އެއްވެސް އުޖޫރައެއްވެސް ބޭނުމެއްނޫން. މިތަނުން އެދިއްޖެ ކޮންމެކަމެއް އަޅުގަނޑުކޮށްދޭނަން" އާދަމް ލަޠީފް ވިދާޅުވިއެވެ.
އާދަމް ލަޠީފް އެންމެ ފުރަތަމަ މަސައްކަތް ކުރައްވާފައިވަނީ އޮޑިޓް އޮފީހުގައެވެ. މާލީ ދާއިރާގައި ދުވަސްކޮޅަކު މަސައްކަތް ކުރެއްވުމަށްފަހު، އިންޖިނިއަރިންގ ދާއިރާއަށް ޝަޢުފުވެރިކަން އުފެދި، ޓެލެވިޜަން މޯލްޑިވްސްގެ ޙިދުމަތާ ގުޅިވަޑައިގަތެވެ. އޭގެފަހުން ވޭތުވެދިޔަ 45 އަހަރު ދައުލަތުގެ މީޑިއާގައި ޢާދަމް ލަތީފް ވަނީ އެކި ދާއިރާތަކުން ޚިދުމަތް ކުރައްވާފައެވެ. އެގޮތުން ޓީވީ ޓްރާންސްމިޝަން ޓެކްނިޝަނެއްގެ ގޮތުގައާއި، ސީނިއަރ މެއިންޓަނަންސް ޓެކްނީޝަނެއްގެ ގޮތުގައާއި އިންޖިއަރިންގައިވެސް ވަނީ މަސައްކަތްކުރައްވާފައެވެ.
އާދަމް ލަޠީފަކީ ގާތުގައި އުޅޭ މީހުން ލައްވާ އިލެކްޓްރޯނިކްސް ތަކެތި އުފެއްދުމުގެ މަސައްކަތުގައިވެސް ފޫހިކަމެއްނެތި އުޅުއްވާ ބޭފުޅަކަށްވާއިރު، އެއީ މީހުންނަށް މަސައްކަތް ހަވާލު ކޮށްގެން، ޑެލިގޭޓް ކޮށްގެން، މަސައްކަތް ކުރުއްވަން ކުޅަދާނަ ބޭފުޅެއްކަން ފާހަގަކުރެވެވެ. އެބޭފުޅާއަކީ މީހަކާ މަސައްކަތެއް ހަވާލުކޮށްފިނަމަ، އެމީހަކު އެމަސައްކަތެއް ކުރާގޮތް ގާތުން މޮނީޓަރކޮށް ސުޕަރވައިޒްކުރައްވާ ބޭފުޅެއްކެވެ.