ޤައުމީ އަރުޝީފުގެ އެޑްވައިޒަރީ ބޯޑު އުފައްދަވާ، ބޯޑުގެ ރައީސަކަށް މުޙައްމަދު ޢާޞިފް އިންތިޚާބުކޮށްފި
ޤައުމީ އަރުޝީފުގެ އެޑްވައިޒަރީ ބޯޑު އުފައްދަވާ، ބޯޑުގެ ރައީސަކަށް މުޙައްމަދު އާޞިފް (މޮންދު) އިންތިޚާބުކޮށްފިއެވެ.
ޤައުމީ އަރުޝީފުގެ އެޑްވައިޒަރީ ބޯޑު އުފައްދަވާފައިވަނީ ޤައުމީ އަރުޝީފުގެ ޤާނޫނުގައިވާގޮތުގެ މަތިން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ. މި ބޯޑުގެ ރައީސަކަށް މުޙައްމަދު އާޞިފް އިންތިޚާބުކޮށްފައިވާއިރު، ނައިބު ރައީސަކަށް އިންތިޚާބުކޮށްފައިވަނީ އަޙްމަދު ޢާޞިމެވެ. މި ދެ ބޭފުޅުން ހިމެނޭހެން ޤައުމީ އަރުޝީފުގެ އެޑްވައިޒަރީ ބޯޑުގައި ޖުމްލަ 9 ބޭފުޅުން ހިމެނިވަޑައިގަންނަވައެވެ.
ޤައުމީ އަރުޝީފުގެ އެޑްވައިޒަރީ ބޯޑުގެ ރައީސަކަށް އިންތިޚާބުކޮށްފައިވާ މުޙައްމަދު އާޞިފް ވަނީ ޚަބަރާއި މަޢުލޫމާތު ފެތުރުމުގެ ދާއިރާއިން، މަޢުލޫމާތު ފެތުރުމާއި ހުށަހެޅުމުގެ ހުނަވެރިކަމުގެ ރޮނގުން ހިތްވަރުދިނުމުގެ ޤައުމީ އިނާމު 2013 ވަނަ އަހަރު ޙާޞިލުކުރައްވާފައެވެ.
1991 ވަނަ އަހަރު ޓެލެވިޜަން މޯލްޑިވްސްގެ ޕްރޮޑިއުސަރ ޓްރޭނީގެ ވަޒީފާއިން ބްރޯޑްކާސްޓިންގ ދާއިރާއާއި ގުޅިވަޑައިގެންނެވި މުޙައްމަދު ޢާޞިފް، މިދާއިރާގައި ކުރެއްވި ޚިދުމަތްތަކާއި އަދި ކުރެއްވި މަސައްކަތްޕުޅުތަކުގެ ސަބަބުން ޢާޞިފު ހިމެނިވަޑައިގަންނަވަނީ، ވަކި ފަރާތަކަށް ޖެހިވަޑައިނުގެން، ޤައުމުގެ މަޞްލަޙަތު ޙިމާޔަތް ކުރުމުގައި، މި ދާއިރާއިން މީހުން އެންމެ ޤަދަރުކުރާ އަދި އެންމެ އިތުބާރުކުރާ އެއް ޝަޚްޞިއްޔަތުކަމުގައެވެ. ހުށަހެޅުމުގެ ހުނަރުވެރިކަމުގެ ރޮނގުން ޢާޞިފަކީ، ލާމަސީލު މިސާލެކެވެ. މިހާރު ރާއްޖޭގައި ހިންގާ ރޭޑިއޯ ޓީ.ވީ ޗެނަލްތައް ހިންގުމުގައި އިސްކޮށް ތިއްބެވީ މުޙަންމަދު ޢާޞިފާއެކު މަސައްކަތް ކުރައްވައި، އޭނާގެ ފަރާތުން އިރުޝާދާއި ތަޖްރިބާ ލިބިވަޑައިގެންފައިވާ ފަންނުވެރިންނެވެ.
އާއްމުން ބަލައިގެންފައިވާ އެތައް ޓީވީ ޕްރޮގްރާމްތަކަކާއި، ޑޮކިއުމެންޓްރީތަކެއް އުފައްދަވާ، ބެލުންތެރިންނާއި ޙަމައަށް ގެނެސްދެއްވާފައިވާ ޢާޞިފް ވަނީ ވީޓީވީގެ ސީ.އީ.އޯގެ މަޤާމުވެސް އަދާކުރައްވާފައެވެ. އަދި މޯލްޑިވްސް މިީޑިއާ ކައުންސިލުގެ ރައީސްކަންވެސް އެބޭފުޅާ ވަނީ ކުރައްވާފައެވެ. މީގެ އިތުރުން ބްރޯޑްކާސްޓިންގ ދާއިރާއިން މީހުން ބިނާކުރުމުގައިވެސް ޢާޞިފް ވަނީ ފާހަގަކޮށްލެވޭފަދަ ޚިދުމަތްތަކެއް ކުރައްވާފައެވެ.
ދިވެހިރާއްޖޭގެ ޤައުމީ އަރުޝީފަކީ، ދިވެހިރާއްޖޭގެ ޤައުމީ އަރުޝީފުގެ ޤާނޫނުގެ ދަށުން ރައީސުލްޖުމްހޫރިއްޔާ، 19 ޖަނަވަރީ 2012 ގައި އުފެއްދެވި މުއައްސަސާއެކެވެ. ޤައުމީ އަރުޝީފަކީ ޤައުމުގެ ތާރީޚީ ފުރޭފުތަކާއި ފަތްފުށްތަކާއި ފަތްކޮޅުތަކާއި ޗާޓުތަކާއި ލިޔެކިޔުންތަކާއި ރިކޯޑުތައް ރައްކާތެރިކޮށް ބެލެހެއްޓުމާއި ދެމެހެއްޓުން ޤާނޫނީގޮތުން މަތިކުރެވިފައިވާ މަރުކަޒީ މުއައްސަސާއެވެ. އަދި ދައުލަތުގެ އެންމެހާ ލިޔެކިޔުންތަކާއި ރިކޯޑުތައް ބެލެހެއްޓުމުގެ ސިޔާސަތުތަކާއި އުސޫލުތައް މަރުކަޒީގޮތުން ހިންގުން ޤާނޫނީގޮތުން މަތިކުރެވިފައިވާ މުއައްސަސާއެކެވެ.