"މޯލްޑިވްސް ޔޫތު ކޭމްޕް 2020"ގެ ނަމުގައި ޒުވާނުންނަށް ޚާއްސަކޮށްގެން ވަރޗުއަލްކޮށް ކޭމްޕެއް ބާއްވަނީ

"މޯލްޑިވްސް ޔޫތު ކޭމްޕް 2020" ގެ ނަމުގައި ދިވެހި ޒުވާނުންނަށް ޚާއްސަކޮށްގެން ވަރޗުއަލްކޮށް ކޭމްޕެއް ބޭއްވުމަށް މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓުން ނިންމަވައިފިއެވެ.

ވަރޗުއަލްކޮށް ބާއްވާ މި ކޭމްޕަކީ ޤައުމީ ޒުވާނުންގެ ދުވަސް ފާހަގަކުރުމުގެ ގޮތުން ކުރިއަށްގެންދިއުމަށް ނިންމާފައިވާ ހަރަކާތްތަކުގެ ތެރޭގައި ހިމެނޭ ހަރަކާތެކެވެ. ޔޫތް މިނިސްޓްރީން ވިދާޅުވީ، މި ކޭމްޕަކީ ރާއްޖޭގެ އެކި ކަންކޮޅުތަކާއި، ރާއްޖެއިން ބޭރުގައި ދިރިއުޅޭ ޒުވާނުންނަށް ހުޅުވާލައިގެން ބާއްވާ ކޭމްޕެއްކަމަށެވެ. މި ކޭމްޕްގެ މައިގަނޑު މަޤްޞަދަކީ ސަރުކާރުން އެކުލަވާލައިފައިވާ ސްޓްރެޓެޖިކް އެކްޝަން ޕްލޭންގައި ހިމެނޭ ޒުވާނުން ބާރުވެރިކުރުމާއި، ޒުވާނުންނާ ގުޅުންހުރި މައްސަލަތައް ޙައްލުކުރުމުގައި ޒުވާނުންގެ އިސްނެގުމާއި، ބައިވެރިވުން އިތުރުކުރުންކަމަށް ޔޫތް މިނިސްޓްރީން ވިދާޅުވެއެވެ.

މިކޭމްޕްގައި ބައިވެރިވުމަށް ޝަޢުޤުވެރިވާ އުމުރުން 18 އަހަރާއި 35 އަހަރާ ދެމެދުގެ ޒުވާނުންނަށް 13 އޮކްޓޯބަރ 2020 ގެ ނިޔަލަށް އޮންލައިންކޮށް ރަޖިސްޓަަރވުމުގެ ފުރުޞަތު މިހާރު ވަނީ ހުޅުވާލާފައެވެ. "މޯލްޑިވްސް ޔޫތު ކޭމްޕް 2020"ގެ ނަމުގައި ދެ ދުވަހުގެ މުއްދަތަށް ކުރިޔަށް ގެންދިޔުމަށް ހަމަޖެހިފައިވާ މި ކޭމްޕްގެ ޝިޢާރަކީ "ޔޫތު، ޕީސް އެންޑް ސެކިއުރިޓީ" އެވެ. މި ކޭމްޕް ނިންމުމުގެ ގޮތުން "މޯލްޑިވްސް ޔޫތު ކޭމްޕް 2020" ގެ ޤަރާރެއް އެކުލަވައިލައި، އެ ޤަރާރު ސަރުކާރާއި ޙިއްސާކުރާނެކަމަށް ޔޫތް މިނިސްޓްރީން ވިދާޅުވެއެވެ.

މި އަހަރުގެ ޤައުމީ ޒުވާނުންގެ ދުވަސް ކަމަށްވާ 22 އޮކްޓޯބަރ 2020 ކުލަގަދަ ގޮތެއްގައި ފާހަގަކުރުމަށްޓަކައި ޔޫތް މިނިސްޓްރީއާއި އެހެނިހެން ފަރާތްތައް ގުޅިގެން ތަފާތު އެކި ހަރަކާތްތައް ކުރިޔަށް ގެންދިޔުމަށް ވަނީ ރޭވިފައެވެ.