ކުޅުދުއްފުއްޓަށް ފެށި ކާގޯ ފެރީއަކީ އުތުރުގެ ރަށްތަކަށް އަންނަ ތަރައްޤީގެ އާ ފެށުމެއް - މިނިސްޓަރ ޝާހިދު

އިންޑިއާގެ ކޮޗިންއާއި ކުޅުދުއްފުއްޓާ ދެމެދު ކާގޯ ފެރީ ފެށުމަކީ މާލެއަށް ބަރޯސާވެ ތަރައްޤީގެ ކަންކަން ކުރަމުން އައި އައުން ނިމުމަކަށް ގެނައުމުގެ ފެށުންކަމަށް މިނިސްޓަރ އޮފް ފޮރިން އެފެއާޒް އަބްދުﷲ ޝާހިދު ވިދާޅުވެއްޖެއެވެ.

އިންޑިއާގެ ކޮޗިންއިން މުދާ ހިފައިގެން ހދ.ކުޅުދުއްފުއްޓަށް ދިޔަ ފުރަތަމަ ކާގޯ ފެރީއަށް މަރުޙަބާ ކިޔުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ފޮރިން މިނިސްޓަރ އަބްދުﷲ ޝާހިދު ވަނީ ކުޅުދުއްފުއްޓަށް ފެށި ކާގޯ ފެރީއަކީ އުތުރުގެ ރަށްތަކަށް އަންނަ ތަރައްޤީގެ އާ ފެށުމެއްކަމަށެވެ. އަދި މިފެރީގެ ސަބަބުން ކުރިއަށް އޮތް އަހަރުތަކުގައި މިކަމުގެ ހެޔޮ ނަތީޖާތައް ފެންނަމުންދާނެކަމަށާއި މިއީ ބޮޑު ތިލަދުންމަތި ތަރައްޤީވެ ކުރިއަރާ ދިޔުމަށް ކުރެވޭ މަސައްކަތެއްކަމަށްވެސް މިނިސްޓަރ ވިދާޅުވިއެވެ.

މިނިސްޓަރ ޝާހިދު ވިދާޅުވީ އަލަށްފެށި މި ކާގޯ ފެރީގެ ސަބަބުން އިންޑިއާއާއި ރާއްޖެއާ ދެމެދު އޮންނަ ގުޅުން މިހާރަށްވުރެ ހަރުދަނާވެގެން ދާނެކަމަށެވެ. އަދި މިގޮތަށް ހުޅުވާލެވޭ ކޮންމެ ދޮރަކީ އިޤްތިޞާދަށް އަންނަ ދިރުމެއްކަމަށާއި އެއްތަނުން އަނެއްތަނަށް މުދާ ގެނައުން ފަހިކޮށްދިނުމަކީ ހަޤީޤީ ދިރުންކަމަށެވެ.

"މި ޚިދުމަތުގެ ސަބަބުން އުތުރުގެ ބަނދަރުތަކަށް ބޭރުން މުދާގެނެސް އެ މުދާ އުތުރުގެ ސަރަޙައްދަށް ފެތުރިގެންދާނެ ގޮތް މިވަނީ ފަހިވެފައި. މިއީފަޚުރުވެރިވާންވީ ކަމެއް." މިނިސްޓަރ އޮފް ފޮރިން އެފެއާޒް އަބްދުﷲ ޝާހިދު ވިދާޅުވިއެވެ.

މި ރަސްމިއްޔާތުގައި ވާހަކަފުޅުދައްކަވަމުން އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވީ އިންޑިއާގެ ކޮޗިން އާއި ކުޅުދުއްފުށި ސިޓީ އާއި ދެމެދު ފެށި ކާގޯ ފެރީގެ ޚިދުމަތާއި އެކު ކުޅުދުއްފުށި ސިޓީ ބޮޑެތި ޝިޕިން އެޖެންސީތަކުގެ މެޕަށް އަރާނެކަމަށެވެ. މި ޚިދުމަތާއި އެކު ކުޅުދުއްފުޓަށް ގިނަ ފައިދާތަކެއް ކޮށް އަތްފޯރާފަށުގައި ތަކެތިވެސް ލިބިގެންދާނެކަމަށާއި ކާގޯ ފުރަތަމަ ފެރީގައިވެސް ރާއްޖެއަށް ބޭނުންވާ ޒަރުރީ އެތައް ސާމާނެއް ގެނެސްފައިވާކަމަށް ސަންޖޭ ސުދީރު ވިދާޅުވިއެވެ.

" ޚާއްސަގޮތެއްގައި ރާއްޖޭގެ ކުދި އަދި މެދުފަންތީގެ ވިޔަފާރިތަކަށާއި މަސްވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކަށް މީގެން ކުރާ ފައިދާ ބޮޑުވާނެ. އަދި ކުޑަ އިންޑިއާގެ އެއް ބިލިއަން މީހުންގެ އާބާދީއަށް މުދާ އެކްސްޕޯޓް ކުރުމުގެ ފުރުސަތު ލިބިގެންދާނެ." އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވިދާޅުވިއެވެ.

އިންޑިއާގެ ކޮޗިންއިން ކާގޯއާ އެކީ އައި، މި ފުރަތަމަ ފެރީއަކީ އެއްފަހަރާ 3000ޓަނުގެ މުދާ އުފުލޭ ބޯޓެކެވެ. ފުރަތަމަ ދަތުރުގައި ކުޅުދުއްފުއްޓަށް 500 ޓަނުގެ ސިމެންތިއާއި، އަދި އެހެނިހެން ބާވަތްތަކުގެ މުދާ ހިމެނޭ 2 ކޮންޓެއިނަރު ގެނެސްފައިވެއެވެ.