"ރީޖަނަލް އެއަރޕޯޓްސް ކޮމްޕެނީ ލިމިޓެޑް" ގެ ނަމުގައި ސަރުކާރުގެ ކުންފުންޏެއް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު އުފައްދަވައިފިއެވެ.
މި ކުންފުންޏަކީ ސަރުކާރުން ހިންގަމުން ގެންދަވާ ސަރަޙައްދީ އެއަރޕޯޓްތައް ވިޔަފާރީގެ އުޞޫލުން ހިންގުމަށާއި، ސަރުކާރުން ރީޖަނަލް އެއަރޕޯޓްސް މެދުވެރިކޮށް ހިންގަމުން ގެންދަވާ ވައިގެ ބަނދަރުތައް ދެމެހެއްޓެނިވި ގޮތެއްގައި ތަރައްޤީކޮށް ހިންގުމަށްޓަކައި އުފެއްދެވި ކުންފުންޏެކެވެ.
ރައީސުލްޖުމްހޫރިއްޔާ މިއަދު އުފެއްދެވި ކުންފުންޏަކީ ސައްތައިން ސައްތަ ސަރުކާރު ހިއްސާވާ ކުންފުންޏެކެވެ. މި ކުންފުނީގެ ހުއްދަ ކުރެވިފައިވާ ރައުސުލް މާލަކީ 10 ރުފިޔާގެ ދުއިސައްތަ މިލިޔަން ހިއްސާގެ މައްޗަށް ބަހާލެވިފައިވާ ދެ މިލިޔަން ރުފުޔާއެވެ.
މި ކުންފުންޏަކީ އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމުގެ ހައްގު ލިބިގެންވާ ވަކި ސިއްކަ އެއް އޮންނަ ގާނޫނީ ޝަހުސެއް ކަމަށް ވަނީ ކަނޑައަޅާފައެވެ.
ރާއްޖޭގެ އެކި ސަރަޙައްދުތަކުގައި 16 އެއަޕޯޓް އެބައޮތެވެ. މީގެ ތެރޭގައި 4 އިންޓަރނޭޝަނަލް އެއަޕޯޓް ހިމެނެއެވެ. އަދި ރީޖަނަލް އެއަޕޯޓްސް އިން 6 އެއަޕޯޓެއް އޮޕަރޭޓް ކުރަމުން ގެންދެއެވެ. ރާއްޖޭގެ އެކި ސަރަާޙއްދުތަކުގައި އެއަޕޯޓްތައް އެޅުމުގެ މަޝްރޫއުގެ ދަށުން މިހާރު 3 އެއަޕޯޓެއްގެ މަސައްކަތް ދަނީ ކުރަމުންނެވެ.
ރާއްޖޭގައި އަޅާފައިވާ އެއަޕޯޓްތައް ސަރުކާރު ހިއްސާވާ ކުންފުނިތަކުގެ އިތުރުން އައިލެންޑް އޭވިއޭޝަންއާއި ރީޖަނަލް އެއަޕޯޓްސްއިން އަންނަނީ ހިންގަމުންނެވެ.