މީޑިއާގެ ސުލޫކީ މިންގަނޑަށް އަހުލުވެރިކުރުމަށް ޚާއްސަ މަސައްކަތު ބައްދަލުވުމެއް ފަށައިފިއެވެ.
މި މަސައްކަތު ބައްދަލުވުމަކީ މޯލްޑިވްސް ބްރޯޑްކާސްޓިންގ ކޮމިޝަނާއި ދިވެހިރާއްޖޭގެ އިސްލާމީ ޔުނިވަރސިޓީ ގުޅިގެން ބާއްވާ މަސައްކަތު ބައްދަލުވުމެކެވެ.
މީޑިއާތަކުގެ އެޑިޓަރ ލެވެލް ފަރާތްތަކަށާއި ނޫސްވެރިންނަށް އަމާޒުކޮށް ބާއްވާ މި މަސައްކަތު ބައްދަލުވުމަކީ ނޫސްވެރިކަމާއި ޚިޔާލުފާޅުކުރުމުގެ މިނިވަންކަމުގެ ތެރެއިން ބްރޯޑްކާސްޓްކުރުމުގެ ސުލޫކީ މިންގަނޑާއި އުސޫލުތައް ދަމަހައްޓައި ދިވެހި މީޑިއާގެ ވެއްޓަކީ ސުލޫކީ މިންގަނޑު ހިފަހައްޓައި އިސްލާމީ ހަމަތަކަށް އިޙުތިރާމުކުރާ ވެއްޓެއްގެ ގޮތުގައި ބައްޓަންކުރުމަށް ދެ ފަރާތް ގުޅިގެން މަސައްކަތްކުރުމަށް އިސްލާމީ ޔުނިވަރސިޓީ އާއި ކޮމިޝަނާއި ދެމެދު 24 ސެޕްޓެމްބަރ 2020 ގައި ސޮއިކޮށްފައިވާ ފަހުމުނާމާގެ ދަށުން ބާއްވާ ފުރަތަމަ ޓްރެއިނިންގ ޕްރޮގްރާމެވެ.
އޮކްޓޯބަރ 2- 4 އަށް ބާއްވާ މި މަސައްކަތު ބައްދަލުވުމުގައި ހިމެނޭ ބައިތަކަކީ ހެޔޮ ވެރިކަން އަދި އިންސާނީ ހައްޤުތައް ހިމާޔަތްކުރުމުގައި މީޑިއާގެ ދައުރާއި، ބްރޯޑްކާސްޓް ކުރުމުގެ ސުލޫކީ މިންގަނޑާއި، ބްރޯޑްކާސްޓްކުރުމުގައި އަމަލުކުރަންވީ ގައިޑްލައިންތަކާއި، އިސްލާމީ ނަޒަރުން މަސައްކަތު އަޚްލާޤުގެ އާންމު ސިފަތަކާއި އަދި ޚަބަރު ފެތުރުމުގައި އިސްލާމީ މިންގަނޑުތަކެވެ.
މި މަސައްކަތު ބައްދަލުވުމުގެ ސެޝަންތައް ނަންގަވައިދެއްވާނީ ބްރޯޑްކާސްޓިންގ ކޮމިޝަންގެ މެމްބަރުންނާއި، އިސްލާމީ ޔުނިވަރސިޓީއާއި ޖެންޑަރ މިނިސްޓްރީގެ ފަރާތުންނާއި އަދި ކަމާބެހޭ ދާއިރާގެ ފަންނީ ބައެއް ބޭފުޅުންނެވެ.