މަސްތުވާތަކެތި އެތެރެކުރި ޕާކިސްތާނުގެ 4 މީހުން ޝަރީޢަތް ނިމެންދެން ބަންދުކުރަން އަމުރުކޮށްފި

އެތެރެހަށީގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރި ޕާކިސްތާނުގެ 4 މީހުން ޝަރީޢަތް ނިމެންދެން ބަންދުކުރަން ކްރިމިނަލް ކޯޓުން އަމުރުކޮށްފިއެވެ.

ރާއްޖެއަށް މަސްތުވާތަކެތި އެތެރެކުރި ޕާކިސްތާނުގެ 4 މީހަކު ހައްޔަރުކޮށް، އެ މައްސަލަ ފުލުހުންގެ ޑްރަގް އެންފޯސްމަންޓް ޑިޕާޓްމަންޓުން މިހާރު ދަނީ ތަހުޤީޤު ކުރަމުންނެވެ.

މި މައްސަލައާ ގުޅިގެން ހައްޔަރުކޮށްފައިވަނީ އުމުރުން 30 އަހަރުގެ އަހްސަން އުލް ހަސަން އާއި، އުމުރުން 41 އަހަރުގެ މުހައްމަދު އަލީ ބާއިގް އާއި، އުމުރުން 22 އަހަރުގެ މުހައްމަދު ސާދު ވަރްސީ އަދި އުމުރުން 34 އަހަރުގެ އަބްދުﷲ އަލީ ހަސަން އެވެ. މި 4 މީހުންނަކީވެސް ޕާކިސްތާން ފިރިހެނުންނެވެ.

މި 4 މީހުން ހައްޔަރުކޮށްފައި ވަނީ، މިދިޔަ ސެޕްޓެމްބަރ މަހުގެ 11 ވަނަ ދުވަހުގެ ހެނދުނުގެ ވަގުތެއްގައެވެ. މިމީހުން ހިފަހައްޓާފައި ވަނީ، ހަށިގަނޑުގެ ތެރޭގައި ރައްކާކޮށްގެން ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވިގެން ކަސްޓަމްސް އޮފިސަރުން ފުލުހުންނަށް މައުލޫމާތު ދިނުމާގުޅިގެންނެވެ.

އެގޮތުން އެ މީހުން ހުއްޓުވައި، އެކްސްރޭ ކުރުމުން ހަށިގަނޑުގެ ތެރޭގައި އެއްޗެހިތަކެއް ހުރިކަމަށް ފާހަގަކުރެވުނެވެ. އަދި ފުލުހުންނާއި ކަސްޓަމްސް ގުޅިގެން އެމީހުން ހޮސްޕިޓަލަށް ގެންގޮސް ޑޮކްޓަރަށް ދެއްކުމުން އެމީހުންގެ ހަށިގަނޑުގައި ފޮރިން ބޮޑީސްތަކެއް ހުރިކަމަށް އެނގިފައިވެއެވެ. އެ މީހުން ހޮސްޕިޓަލުގައި އެޑްމިޓްކޮށް، ފުލުހުންގެ ބެލުމުގެ ދަށުގައި ތިބިއިރު އެ މީހުން ބޮޑުކަމުދިޔަ ތަކެތީގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއްހުރި 81 ބުލެޓް ފެނިފައިވެއެވެ. މިތަކެތީގެ ބަރުދަނުގައި 791 ގްރާމް ހުރި ކަމުގައި ފުލުހުން ވަނީ ބުނެފައެވެ.