މާލޭ ހުކުރު މިސްކިތް މަރާމާތުކުރުމުގެ މަސައްކަތް އަންނަ ޖެނުއަރީމަހު އަލުން ފެށުމަށް ނިންމާފައިވާކަމަށް މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން ވިދާޅުވެއްޖެއެވެ.
މާލޭ ހުކުރު މިސްކިތުގެ އާބާތުރަ ފިލުވައި ޙިމާޔަތް ކުރުމުގެ މަސައްކަތް ކުރަމުން އަންނަނީ އާކިއޮލޮޖިކަލް ސަރވޭ އޮފް އިންޑިއާގެ ޚާއްސަ ޓީމަކުންނެވެ. ހުކުރު މިސްކިތް މަރާމާތުކުރުމުގެ މަސައްކަތްތައް އަލުން ފެށުމާގުޅޭގޮތުން ވަރޗުއަލްކޮށް ކުރިއަށްގެންދިޔަ ބައްދަލުވުމެއްގައި ހެރިޓޭޖް މިނިސްޓަރ ޔުމްނާ މަޢުމޫނާއި، އިންޑިއާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ސަންޖޭ ސުދީރު ވަނީ މަޝްވަރާކުރައްވާފައެވެ.
މި ބައްދަލުވުމާގުޅޭގޮތުން ކުރެއްވި ޓުވީޓެއްގައި މިނިސްޓަރ ޔުމްނާ ވިދާޅުވީ، މާލޭ ހުކުރު މިސްކިތް މަރާމާތުކުރުމުގެ މަސައްކަތް އަލުން ފެށުމާގުޅޭގޮތުން އިންޑިއާގެ ސަފީރާއެކު ކާމިޔާބު މަޝްވަރާތަކެއް ކުރެވުނުކަމަށެވެ. އަދި މި މަސައްކަތް އަލުން ފެށުމަށް ހަމަޖެހިފައިވަނީ 1 ޖެނުއަރީ 2021 ގައި ކަމަށެވެ.
ހުކުރު މިސްކިތުގެ އާބާތުރަ ފިލުވައި މަރާމާތުކުރުމުގެ މަސައްކަތަކީ އިންޑިއާ ސަރުކާރުގެ ފަންނީ އަދި މާލީ އެހީއާއެކު ކުރިއަށްގެންދާ މަސައްކަތެކެވެ. އެގޮތުން މި މަސައްކަތަށް އާކިއޮލޮޖިކަލް ސަރވޭ އޮފް އިންޑިއާއިން 1.3 މިިލިއަން ޑޮލަރު ޚަރަދުކުރުމަށް ނިންމާފައިވާކަމަށް ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން ކުރެއްވި ޓުވީޓެއްގައި ވަނީ ވިދާޅުވެފައެވެ.
މި މަޝްރޫޢު ރަސްމީކޮށް އިޢުލާންކުރައްވާފައި ވަނީ 2019 ވަނަ އަހަރުގެ ޖޫންމަހުގެ ތެރޭގައި އިންޑިއާގެ ބޮޑުވަޒީރު ނަރެންދުރަ މޯދީ ދިވެހިރާއްޖެއަށް ކުރެއްވި ރަސްމީ ދަތުރުފުޅުގައި ރައްޔިތުންގެ މަޖިލީހުގައި ދެއްވި ޚާއްސަ ތަޤްރީރުގެ ތެރެއިންނެވެ.
މާލޭ ހުކުރު މިސްކިތުގެ އާބާތުރަ ފިލުވާ އެތަން ޙިމާޔަތްކުރުމަށް އިންޑިއާ ސަރުކާރުގެ އެހީގައި ކުރިއަށްގެންދާ މި މަސައްކަތްކުރުމަށް އެ މިސްކިތް ބަންދުކޮށްފައިވަނީ މިދިޔަ އަހަރުގެ ސެޕްޓެމްބަރުމަހުގައެވެ. ނަމަވެސް ކޯވިޑް-19ގެ ސަބަބުން މާލޭ ސަރަޙައްދު ފުރަބަންދުކުރުމާއި، އަޅާފައިވާ ރައްކާތެރިކަމުގެ ފިޔަވަޅުތަކާއެކު އެ މަސައްކަތް މަޑުޖެހިފައިވާކަމަށް ހެރިޓޭޖް މިނިސްޓްރީން ވަނީ ވިދާޅުވެފައެވެ. އެހެންނަމަވެސް އެ މަސައްކަތް ފެށިތާ އަހަރެއްހާ ދުވަސްފަހުން މިމަހުގެ އެއްވަނަ ދުވަހު މާލޭ ހުކުރު މިސްކިތް ހެރިޓޭޖް މިނިސްޓްރީން ވަނީ ވަގުތީގޮތުން އާއްމުންނަށް ހުޅުވާލާފައެވެ.
ހުކުރު މިސްކިތް ހުޅުވާފައިވަނީ ކަތުރުފަނި ނައްތާލުމަށްޓަކާ ދޭންޖެހޭ ޓްރީޓްމަންޓްތައްދީ، މިސްކިތުގެ ކާޕެޓު ނަގައި، ކޮލެޓީ ރަނގަޅު ނެވިލޯނު އެޅުމަށްފަހުގައެވެ. އަދި އެ މިސްކިތަށް ނަމާދަށްދާ މީހުންވެސް ކޯވިޑް-19 އާ ގުޅިގެން އެޗް.ޕީ.އޭއާއި ކަމާބެހޭ އިދާރާތަކުން ދެމުންގެންދާ އިރުޝާދުތަކާ އެއްގޮތަށް ޢަމަލުކުރުމަށް ހެރިޓޭޖް މިނިސްޓްރީން ވަނީ އިލްތިމާސްކުރައްވާފައެވެ.
މާލޭ ހުކުރު މިސްކިތަކީ ދިވެހީންގެ އިސްލާމީ ވަޙުދަތާއި، ދިވެހީންގެ ހުނަރުވެރިކަމާއި، ފަންނުވެރިކަން ދައްކުވައިދޭ އެންމެ ދުވަސްވީ އެއް ބިނާއެވެ. އައްސުލްޠާން އިބްރާހީމް އިސްކަންދަރު 1 ގެ އަމުރުފުޅަކަށް މީލާދީން 1656 ގައި ބިނާކުރެއްވި މި މިސްކިތަކީ ދުނިޔޭގެ އެހެން އެއްވެސް ޤައުމަކުން ނުފެންނަ ފަދަ ހިރިގަލުގެ މަސައްކަތް ވަރަށް ފުރިހަމައަށް ފެނިގެންދާ ބިނާއެކެވެ.