ރާއްޖޭގައި ސްކޫލް ނިންމާ ދަރިވަރުންގެ ނިސްބަތަށް ބަލާއިރު ފިރިހެންކުދިންނަށްވުރެ ނިސްބަތުން އަންހެންކުދިންގެ ޢަދަދު އިތުރެވެ. އަދި ނަތީޖާވެސް ރަނގަޅެވެ. ވަޒީފާގެ މާހައުލުގައިވެސް އަންހެނުންގެ ދައުރު ފުޅަވެފައި ޚާއްސަކޮށް ބައެއް ދާއިރާތަކުގައި ވަޒީފާ އަދާކުރާ އަންހެނުންގެ ނިސްބަތް މާ އިތުރެވެ. ސިވިލްސަރވިސްއަކީ މިފަދަ އެއް ދާއިރާއެވެ.
މިއީ ރާއްޖޭގެ އެކިކަންކަމުގައި އަންހެނުންގެ ދައުރު ފުޅާކުރުމަށް ކުރެވޭ ގިނަ މަސައްކަތްތަކުގެ ހެޔޮ ނަތީޖާވެސް މެއެވެ. މިހާރު ކުރިއާ އަޅާބަލާއިރު އެކިދާއިރާތަކުގައި ވަޒީފާ އަދާކުރާ އަންހެނުންގެ އަދަދު އެތައް ގުނަ އިތުރެވެ. ޚާއްސަކޮށް ސިޔާސީ ދާއިރާގައިވެސް މަސައްކަތް ކުރާ އަންހެނުންގެ ދައުރު ފުޅާވެފައި އިތުރެވެ.
އެހެންނަމަވެސް ތަޢުލީމީގޮތުން ވަރަށް ޤާބިލް މޮޅު އަންހެނުން، ވޒީފާގެ ވަކި ހިސާބަކުން މިމާޙައުލުން ގެއްލުމަކީ ޢާއްމުކަމެކެވެ. މަތީ ތަޢުލީމަށްފަހު ނަތީޖާ ވަރަށްމޮޅު އެތައް ދަރިވަރުންނެއް އެމީހުންގެ ޒަވާޖީ ޙަޔާތަށްފަހު ނުވަތަ ކުދިން ލިބުމަށްފަހު މަސައްކަތުގެ މާޙައުން ދުރަށް ދެއެވެ. އެތައް ހޭދައެއްކޮށްގެން މަތީ ތަޢުލީމު ޙާސިލްކުރުމަށްފަހު އޭގެ އެންމެ ހެޔޮ ފައިދާ ޤައުމަށް ނުކުރާގޮތް ވަނީއެވެ.
މިފަދަ ކަންކަން މިހެން މެދުވެރިވާ ވަރަށްގިނަ ސަބަބުތަކެއް އެބަހުއްޓެވެ. އެންމެބޮޑު އެއް ސަބަބަކީ ޢާއިލާއެއް ފަށައި ދަރިން ލިބޭ ހިސާބުން ވަޒީފާ އަދާކުރާނެ ޚާއްސަ އުސޫލެއް އަދި މިނިޒާމުގެ ތެރެއިން ދަރިން ބަލަހައްޓާނެ ގޮތެއް ނެތުމެވެ.
މި ސަރުކާރުން ވެރިކަމާ ޙަވާލުވެ އެކި ދާއިރާތަކުގައި އަންހެނުން ޝާމިލްވާ މިންވަރު އިތުރުކުރުމަށް ގިނަ މަސައްކަތްތަކެއް ވަނީ ކުރައްވާފައެވެ. ރައްޔިތުންގެ މަޖިލީހުގައި އަންހެނުންގެ ދައުރު ފުޅާކުރުމާއި ކައުންސިލްތަކުގައި އަންހެނުންނަށް ވަކި އިންސައްތައެއް ރިޒާވްކޮށް އިތުރުކުރުންފަދަ ކަންކަން ހިމެނެއެވެ. އަދި ހަމައެހެންމެ އަންހެނުންނަށް ޚާއްސަކޯށްގެން ވިޔަފާރިކުރުމަށްޓަކައިވެސް އަންނަނީ ލޯން ދޫކުރަމުންނެވެ.
އެހެންނަމަވެސް އަންހެނުން ވަޒީފާގެ މާޙައުލަށް ނުކުތުމަށް މިހާރުވެސް އެތައް ގޮންޖެހުންތަކަކާ ކުރިމަތިލާންޖެހެއެވެ. ޚާއްސަކޮށް ތުއްތު ކުދިން ގެންގުޅޭ މައިންނަށެވެ. ތުއްތު ދަރިން ގޮވައިގެން ވަޒީފާ އަދާކުރުމަކީ ފަސޭހަކަމަކަށް ނުވި ނަމަވެސް އާމްދަނީ ހޯދުމަށްޓަކައި ވަޒީފާއަށް ދާންވެސްޖެހެއެވެ.
ވަޒީފަގެ މާހައުލުގައި އަންހެނުންގެ ދައުރު އިތުރުވުމާއެކު އަންހެނުން ނުވަތަ މައިން ވަޒީފާގެ މާހައުލަށް ނުކުންނައިރު މައިންގެ ކޮޓަރިއެއް ހުރުމަކީ ވަރަށް މުހިއްމުކަމެކެވެ.
ސިއްޙީ ޚިދުމަތްދޭ ތަންތަނުގައި މިފަދަ ތަންތަން ހުރިކަމުގައި ވީނަމަވެސް މިހާތަނަށް އައިރު ރާއްޖެގެ އެހެން އެއްވެސް ތަނެއްގައި މައިންނަށް ޚާއްސަ ކޮޓަރިއެއް ހަނދާފައެއްނެތެވެ. މިހާރު ރައްޔިތުންގެ މަޖިލީހުގައި މިވަނީ ވަޒީފާގެ މާހައުލެއްގައި މައިންނަށް ޚާއްސަ ކޮޓަރިއެއް ހަދާފައެވެ. ފުރަތަމަ ފަހަރަށް ރައްޔިތުންގެ މަޖިލިސްކުރާ ގޭގައި މިކަންކުރުމަކީ ތާރީޚީ މުހިންމުކަމެކެވެ.
މަޖިލީހުގައި މައިންނަށް ޚާއްސަ ކޯޓަރިއެއް ހެދުމާ ގުޅިގެން ރައްޔިތުންގެ މަޖިލީހުގެ ފުރަތަމަ އަންހެން ނައިބް ރައީސް އަދި މުލަކަތޮޅުގެ ކުރީގެ މެންބަރު އަނީސާ އަޙްމަދުގެ ޝުޢޫރުން އެކަނިވެސް މިކަމުގެ މުހިންމުކަމާއި ބޭނުންތެރިކަން ހާމަވެއެވެ. އެކަމަނާގެ ޝުޢޫރުފުޅު ގޮސް ހުއްޓުނީ މާޒީއަށެވެ.
ރާއްޖޭގެ ސަރުކާރުގެ އިސް ބައެއް މަޤާމުތަކާއި ސިޔާސީ ދާއިރާގެ މުހިންމު އެތައް މަޤާމެއް ފުރުއްވާފައިވާ އަނީސާ ކުރެއްވި ޓުވީޓެއްގައި ވިދާޅުވެފައިވަނީ މަޖިލީހުގެ އިމާރާތުގައި އަންހެން މެމްބަރުންނަށް ތުއްތު ދަރިން ގޮވައިގެން އެކަހެރިވެވޭފަދަ ލައުންޖެއް ހުންނަންޖެހޭނެކަމަށް އޭރު ވަކާލާތު ކުރެއްވި ހަމައެކަނި މެމްބަރަކީ އެކަމަނާކަމަށެވެ.
އެހެންނަމަވެސް މިހާތަނަށްވެސް އެކަން ކާމިޔާބު ނުވެ އޮތްކަމަށް އިޝާރާތްކުރައވައި އަނީސާ ވިދާޅުވީ މަޖިލީހުގެ އިދާރާގައި އެފަދަ ކޮޓަރިއެއް ހުޅުވުމުން މިއަދު ވަރަށްބޮޑު ހިތްހަމަޖެހުމެއް ލިބިވަޑައިގެންފިކަމަށެވެ.
ރައްޔިތުންގެ މަޖިލީހުގައި މައިންގެ ކޮޓަރި ހަދާފައިވަނީ ރައްޔިތުންގެ މަޖިލީހުގެ އިދާރާގެ އައު އިމާރާތުގެ ފުރަތަމަ ފަންގިފިލާގައެވެ. މިއީ ރައްޔިތުންގެ މަޖިލީހުގެ މެންބަރުންނާއި އިދާރީ މުވައްޒަފުން ބޭނުން ކުރުމަށް ހަދާފައިވާ ތަނެކެވެ. މަޖިލީހުގެ އިދާރާގައި ގިނަ ޢަދަދެއްގެ އަންހެން މުވައްޒަފުން މަސައްކަތްކުރައްވަމުން ގެންދަވާއިރު މެންބަރުގެ ގޮތުގައި 4 އަންހެން މެންބަރުން އެބަތިއްބެވެ.
ރައްޔިތުންގެ މަޖިލީހުގައި މައިންނަށް ޚާއްސަ ކޮޓަރިއެއް ހަނދާފައިވާއިރު މިކަމުގެ ސަބަބުން އެހެން އޮފީސްތަކަށްވެސް އިތުރު ހިތްވަރެއް ލިބިގެން ދާނެކަން ޔަޤީނެވެ. ފަހަރުގައި ކުރިއަށް އޮތްތަނުގައި ސަރުކާރުގެ އޮފީސްތަކާއި އަމިއްލަ ތަންތަނުގައިވސް މިފަދަ ތަންތަން ހަދާފަނެއެވެ. މައިންނަށް ޚާއްސަ ކޮޓަރިއެއް ހަދައިފިނަމަ އެމީހުންނަށް ވަޒީފާގެ މާހައުލުގައި ހިތްތަހަމަޖެހިގެން މަސައްކަތްވެސް ކުރެވޭނެއެވެ.