އެކި ތަންތަނަށް މަޑުކޮށްގެން މުދާ އަރުވާ ބޭލުމުގެ ބަދަލުގައި، އެކަމަށް ޚާއްސަކޮށްފައިވާ ޒޯންތަކުގެ ބޭނުން ހިފުމަށް މާލޭ ސިޓީ ކައުންސިލުން އިލްތިމާސްކުރައްވައިފިއެވެ.
މާލޭ ސިޓީ ކައުންސިލުން ވަނީ މާލެތެރޭގައި ލޯޑިން އެންޑް އަންލޯޑިންއަށް ޚާއްސަކޮށްގެން 58 ސަރަޙައްދެއް ކަނޑައަޅާ، އެތަންތަނުގައި ބޯޑު ހަރުކޮށްފައެވެ.
މާލޭ ވިޔަފާރި ބަނދަރުން މުދާ މާލެތެރެއަށް ލޯޑްކުރުމާއި އަންލޯޑްކުރުމުގައި މީގެ ކުރިން އަމަލުކޮށްފައިވާ އުޞޫލުތަކުގެ ސަބަބުން މާލޭގެ ބޮޑެތި މަގުތަކުގައި ޓްރެފިކް ޖޭމްވާކަމުގެ ޝަކުވާއަކީ އާއްމުންނާއި ވިޔަފާރިވެރިންގެވެސް ވަރަށް ބޮޑު ކަންބޮޑުވުމެކެވެ. މިކަމަށް ހައްލެއް ގެނައުމަށް ކުރާ މަސައްކަތްތަކާގުޅޭގޮތުން ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން މާލޭ ސިޓީގެ މޭޔަރ ސިފާ މުޙައްމަދު ވިދާޅުވީ، މާލެ ތެރޭގައި މުދާ ލޯޑްކޮށް އަންލޯޑްކުރުމަށް ޚާއްސަ ސަރަޙައްދުތަކެއް ކަނޑައަޅާފައިވަނީ މާލެ 10 ޒޯނަކަށް ބަހާލުމަށްފަހުކަމަށެވެ. އަދި އެތަންތަން ފާހަގަކޮށްފައިވަނީ ސިޓީ ކައުންސިލާއި، ފުލުހުންނާއި ވެމްކޯ ގުޅިގެންކަމަށް މޭޔަރ ވިދާޅުވިއެވެ.
މޭޔަރ ސިފާ ވިދާޅުވީ، މިގޮތަށް ހަމަޖެއްސުމުން މާލޭގެ މަގުތަކަށް ކޮންމެވެސް ވަރެއްގެ ލުޔެއް ލިބިފައިވާކަމަށެވެ. އަދި ވެމްކޯގެ އުޅަނދުތައް ކުނި ނެގުމަށް މަޑުކޮށްލާ ވަގުތުތައް ފިޔަވާ، މި ސަރަހައްދުތަކަކީ ހުސްކޮށް އޮންނާނެ ތަންތަންކަމުން، އެކި ތަންތަނަށް މަޑުކޮށްގެން މުދާ އަރުވާ ބޭލުމުގެ ބަދަލުގައި އެތަންތަނުގެ ބޭނުން ވިޔަފާރިވެރިިންވެސް ހިފުމަށް މޭޔަރ ވަނީ އިލްތިމާސްކުރައްވާފައެވެ.
"އަޅުގަނޑުމެން މި ޤަބޫލުކުރަނީ ކޮންމެވެސް ވަރެއްގެ ލުއިކަމެއް އަންނާނެކަމަށް. ހިތުހުރިތަނަކަށް ގޮސް މުދާ ބާލަން މަސައްކަތް ކުރުމުގެ ބަދަލުގައި މި ދެންނެވި ޒޯންތައް ހުސްކޮށް ގިނަ ވަގުތު ހުންނާނީ. އެހެންވީމަ އެ ޒޯންތަކުގައި ޕިކަޕްތައް މަޑުކޮށްގެން ލޯޑްކޮށް އަންލޯޑްކުރުމުގެ މަސައްކަތް ގެންދަވައިފިކަމަށްވަންޏާ މީގައި ރޭވުންތެރިކަމާއެކުގައި މިކަންކަން ކޮށްދެއްވައިފިކަމަށްވާނަމަ ހުރިހާ އެންމެނަށްވެސް ލުއިފަސޭހަ ލިބިގެންދާނެ" މޭޔަރ ސިފާ ވިދާޅުވިއެވެ.
މާލެތެރޭގެ ފިހާރަތަކަށާއި، މުދާ ގުދަންކުރާ ތަންތަނަށް މުދާ ގެންގޮސް ލޯޑްކޮށް އަންލޯޑްކުރުމަށް ޚާއްސަ ސަރަޙައްދުތަކެއް މާލޭ ސިޓީ ކައުންސިލުން ކަނޑައަޅާފައިވާއިރު، އަދިވެސް މާލޭގެ ބައެއް ސަރަޙައްދުތަކުގައި ޓްރެފިކް ބާރުބޮޑުވާކަން ފާހަގަކުރެވިފައިވާކަމަށް މާލޭ ސިޓީ ކައުންސިލުން ވިދާޅުވެއެވެ. މޭޔަރ ސިފާ ވިދާޅުވީ، ފަރީދީމަގު ފެންޓަސީ ހިމެނޭ ސަރަޙައްދާއި، ސޯސަންމަގާއި ޖަނަވަރީމަގުގެ އިތުރުން މާރުކޭޓް ސަރަޙައްދު އަދިވެސް ބާރުބޮޑުވާކަން ފާހަގަކުރެވިފައިވާކަމަށެވެ. އެހެންކަމުން އެތަންތަނަށް ލުއިތަކެއް ހޯދުމުގެ މަސައްކަތް ކުރަމުންދާކަމަށް މޭޔަރ ވިދާޅުވިއެވެ.
"އަޅުގަނޑުމެން ފެންޓަސީ ކުރިމަތިން އެ ހިސާބުގަނޑުގެ ޓްރެފިކްގެ ހުރި ލޯޑުބޮޑުކަމަށް ބަލާފައި މިހާރު ބައެއް އިތުރު ސަރަޙައްދުތަކުގައި އަޅުގަނޑުމެން ވާނީ ލޯޑިންގ އެންޑް އަންލޯޑިންގ ހަދައިދީފައި. އިތުރަށް މާރުކޭޓު ސަރަޙައްދާއި، އަތޮޅު ފިހާރަތައް ހިމެނޭ ސަރަޙައްދުތަކުގައި އެ އޮންނަ ބާރު ލޯޑު ބޮޑުވާ ސަރަހައްދުތަކަށްވެސް ކުރިއަށްއޮތްތާނގައި ކޮންމެވެސް ކަހަލަ ލުއިކަމެއް އަންނާނެ، ޚާއްސަކޮށް އެމްއެމްއޭ ކުރިމަތިން އަޅުގަނޑުމެން މި ބަލަނީ ކޮންމެވެސް ވަރެއްގެ ލުއިކަމެއް މިހާރުވެސް ގެނެވޭތޯ" މޭޔަރ ސިފާ ވިދާޅުވިއެވެ.
މުދާ ލޯޑުކޮށް އަންލޯޑުކުރުމަށް ކަނޑައަޅާފައިވާ ސަރަޙައްދުތަކަކީ ސައިން ބޯޑުތައް ޖަހާ ވަކިކޮށްފައިވާ ސަރަހައްދުތަކެއްކަމުން، އެތަންތަނުގައި ސައިކަލާއި ކާރު މަޑުކުރުމާއި ޕާކުކުރުންފަދަ ކަންކަން ނުކުރުމަށް މާލޭ ސިޓީ ކައުންސިލުން ވަނީ އަންގަވާފައެވެ. އަދި އެތަންތަން އިތުރަށް ބަލައިދިނުމަށް ސިޓީ ކައުންސިލުންވަނީ ފުލުހުންނަށް ދަންނަވާފައެވެ.