މާލޭސިޓީގެ ސަރުކާރު ސްކޫލްތަކަށް ދަރިވަރުން ވެއްދުމާއި، ސްކޫލް ބަދަލުކުރަން ބޭނުންވާ ފޯމް ހުށައެޅުމަށް ޚާއްސަކޮށް އޮންލައިން ޕޯޓަލްއެއް މިނިސްޓްރީ އޮފް އެޑިޔުކޭޝަނުން ތަޢާރަފް ކުރައްވައިފިއެވެ.
މިއަދު މިނިސްޓްރީ އޮފް އެޑިޔުކޭޝަނުން އިފްތިތާހް ކުރެއްވި މި ޕޯޓަލްއަކީ ދަރިވަރުން ސްކޫލަށް ވެއްދުމަށް ފޯމު ހުށައެޅުމާއި، އެކަމާ ގުޅިގެން ކުރަންޖެހޭ އެހެނިހެން ކަންކަން ކުރިއަށް ގެންދިއުމުގައި ބެލެނިވެރިންނަށް ފަސޭހަ ކުރުމުގެ މަޤްޞަދުގައި ތައްޔާރުކޮށްފައިވާ ޕޯޓަލްއެކެވެ.
މި ޕޯޓަލް މެދުވެރިކޮށް ސްކޫލަށް ކުދިން ވައްދަން ފޯމް ހުށައެޅުމުގެ އިތުރުން، ފޯމާ ގުޅޭ އިތުރު ޑޮކިއުމެންޓްތައްވެސް އޮންލައިކޮށް ހުށައެޅޭނެކަމަށް އެޑިއުކޭޝަން މިނިސްޓްރީން ވިދާޅުވެއެވެ. އަދި ޖާގަ ލިބޭ ސްކޫލްތަކަށް އިތުރު ޑޮކިއުމެންޓް ހުށައަޅަން ނުޖެހި ޕޯޓަލް މެދުވެރިކޮށް އެކަންކަން ހަމަޖެހިގެންދާނެކަމަށްވެސް އެ މިނިސްޓްރީން ވިދާޅުވިއެވެ.
މީގެ އިތުރުން ސްކޫލަށް ކުދިން ވެއްދުމާއި، ގުޅިގެން ޝަކުވާ ހުށަޅަން ބޭނުންވާ ފަރާތްތަކަށްވެސް މި ޕޯޓަލް މެދުވެރިކޮށް ޝަކުވާ ހުށައެޅުމުގެ ފުރުސަތު ވަނީ ހުޅުވާލެވިފައެވެ. އޮންލައިންކޮށް ފޯމް ހުށައެޅުމުން ބެލެނިވެރިޔާގެ ފޯނަށް ޖަވާބު ސްލިޕް، ޕޯޓަލް މެދުވެރިކޮށް ފޮނުވޭ ގޮތަށްވަނީ ހަމަޖައްސާފައެވެ. މި ޕޯޓަލްއަށް އެޑިއުކޭޝަން މިނިސްޓްރީގެ ވެބްސައިޓް މެދުވެރިކޮށްވެސް ވަދެވޭނެއެވެ.
މި އޮންލައިން ޕޯޓަލްއާއެކު ދަރިވަރުން ސްކޫލަށް ވެއްދުމުގެ މަރުހަލާތަކުގައި ބެލެނިވެރިން މިނިސްޓްރީއަށާއި، ސްކޫލްތަކަށް އަންނަން ނުޖެހި ފަސޭހަކަމާއެކު ސްކޫލަށް ވެއްދުމުގެ ކަންކަން ކުރެވޭނޭ އިންތިޒާމް ހަމަޖެހިގެންދާނެއެވެ.