ތިލަފުއްޓާއި ގުޅިފަޅުގެ އާއްމު ސަރަޙައްދުތަކާއި މަގުތައް އަދި ފަޅުތަކުގައި ބޭނުންނުކޮށް ނުވަތަ ގިނަ ދުވަސްވަންދެން ބަހައްޓާފައިވާ ތަކެއްޗާއި، އުޅަނދުތައް ނަގާ ސާފުކުރުމަށް ނިންމާފައިވާކަމަށް ހައުސިންގ ޑިވެލޮޕްމަންޓް ކޯރޕަރޭޝަން، އެޗް.ޑީ.ސީން ވިދާޅުވެއްޖެއެވެ.
އެޗް.ޑީ.ސީން ވަނީ މިގޮތަށް ބަހައްޓާފައިވާ ތަކެތި މިއަދުން ފެށިގެން 90 ދުވަހުގެ ތެރޭގައި ނަގާ ސާފުކުރުމަށް އަންގާފައެވެ. އަދި އެ ސަރަޙައްދުތަކުގައި ބަހައްޓާފައިވާ ތަކެތި ދީފައިވާ މުއްދަތުގެ ތެރޭގައި ނުނަގައިފި ނަމަ، ނުވަތަ ދީފައިވާ މުއްދަތުގެ ފަހުން ތަނުގައި ތަކެތި ބަހައްޓައިފިނަމަ، އެތަކެތި ނެގުމުގެ މަސައްކަތް ކުރާނެކަމަށްވެސް އެކުންފުނިން ވަނީ ވިދާޅުވެފައެވެ. އެޗް.ޑީ.ސީން ވިދާޅުވީ، އެފަދަ ތަންތަނުގައި ބަހައްޓާފައިވާ މުދާތައް ނެގުމުގެ ތެރޭގައި ލިބޭ އެއްވެސް ގެއްލުމަކަށް އެކުންފުނިން ޒިންމާ ނުވާނެކަމަށެވެ.
މީގެ އިތުރުން ތިލަފުއްޓާއި ގުޅިފަޅުގައި ބިން ކުއްޔަށް ނަގައިގެން އުޅޭ ފަރާތްތައް ފިޔަވައި، އިތުރު ފަރާތްތަކުން ތިލަފުއްޓާއި ގުޅިފަޅު ފަޅުތެރޭގައި އަޅާފައިވާ އުޅަނދުތައްވެސް މިއަދުން ފެށިގެން 90 ދުވަހުގެ ތެރޭގައި ނެގުމަށް އެޗް.ޑީ.ސީން ވަނީ އަންގާފައެވެ. އަދި އެ މުއްދަތަކުގެ ތެރޭގައި އުޅަނދުތައް ނަގާފައިނުވާނަމަ، އެތަކެތި ނެގުމުގެ މަސައްކަތްވެސް ކުރާނެކަށާއި، އެކަމުގެ ތެރޭގައި ލިބޭ އެއްވެސް ގެއްލުމަކަށްވެސް އެކުންފުނިން ޒިންމާނުވާނެކަމަށް އެޗް.ޑީ.ސީން ވަނީ ވިދާޅުވެފައެވެ.