ޝައްކެތްވެސް ނެތްގޮތުގަައި ކުޑަކުދިންނަކީ ޤައުމުގެ މުސްތަޤުބަލެވެ. އެ ޤައުމެއްގެ އެންމެ މުހިންމު ރައުސުލްމާލެވެ.
ޤައުމުގެ ކުރިމަގު ބިނާވެގެންވަނީ މިއަދުގެ ކުޑަކުދިން ތަރުބިއްޔަތު ކުރެވޭ ގޮތެއްގެ މައްޗަށެވެ. ޤައުމާމެދު އެކުދިންގެ ވިސްނުން ބިނާކުރެވޭ ގޮތެއްގެ މައްޗަށެވެ. ކުޑަކުދިންގެ ދުވަހުގެ ގޮތުގައި ދުވަހެއް ފާހަގަކުރުމުގެ އެންމެ މުހިއްމު މަޤްޞަދަކީ، އެކުދިންނަށް ޙައްޤު ރަޙުމާއި ލޯބި ދިނުމާއި، މުޖުތަމަޢުގައި އެކުދިންނަކީވެސް މުހިންމު ބައެއްކަން އަންގައިދިނުމެވެ. އަދި ކުޑަކުދިންގެ ޙައްޤުތައް ރައްކާތެރިކުރުމާމެދު މުޖުތަމަޢު ހޭލުންތެރިކޮށް، ޤައުމީ ފެންވަރުގައި ކުޑަކުދިންނަށް ދިމާވާ މައްސަލަތައް ޙައްލުކުރުމުގައި އެންމެން ގުޅިގެން މަސައްކަތްކުރުމުގެ ރޫޙް އާލާކުރުމެވެ.
ކޮންމެ އަހަރެއްގެވެސް ނޮވެމްބަރުމަހުގެ 20 ވަނަ ދުވަހަކީ ބައިނަލްއަޤްވާމީގޮތުން ފާހަގަކުރާ ކުޑަކުދިންގެ ދުވަހެވެ. މި ދުވަހާގުޅިގެން ކުޑަކުދިންގެ މެދުގައި ބޮޑު މަޤުބޫލުކަމަކާއި ލޯތްބެއް ހޯދާފައިވާ "ރޮބޯމޭން" މިވަނީ ޚާއްސަ ވީޑިއޯ ކްލިޕެއް އޭނާގެ ސޯޝަލް މީޑިއާ އެކައުންޓްތަކުގައި ޙިއްސާކޮށްފައެވެ. 4 މިނެޓް 21 ސިކުންތުގެ މި ވީޑިއޯ ކްލިޕުން މާނަފުން މުހިއްމު މެސެޖުތަކެއް އަންގައިދެއެވެ. ދަރިިންނަށްޓަކާ މައިންބަފައިން އުފުލާ ބުރައާއި، އެކުދިންގެ ހުވަފެންތަކާއި އުއްމީދުތައް ހަޤީޤަތަކަށް ހަދައިދޭން ވާ ޤުރުބާނީ ވަރަށް ފުރިހަމައަށްވެސް މި ވީޑިއޯ ބަލާލުމުން އިޙްސާސްކުރެވިގެންދެއެވެ.
އިވެންޓް މެނޭޖްމަންޓް، ވީޑިއޯ ޕްރޮޑަކްޝަން އަދި އެޑްވަޓައިޒިން އެޖެންސީއެއްގެ ގޮތުގައި މަޝްހޫރުކަން ހޯދާފައިވާ "އޯކޭޒްއިންކް"އާއި ގުޅިގެން ތައްޔާރުކޮށްފައިވާ މި ވީޑިއޯގެ ޑައިރެކްޝަން ހަދާފައިވަނީ މުޙައްމަދު މުންތަސިރު (މުންކޮ) އެވެ. ވީޑިއޯ ފަށަނީ ހުޅުމާލޭގައި ބާއްވާ ކިޑްސް ފެސްޓިވަލަކަށް ދިއުމަށް ކުޑަ ކުއްޖަކު ލާރި އެއްކުރާ މަންޒަރަކުންނެވެ. ވަރަށްވެސް އާދައިގެ ދިރިއުޅުމެއް އުޅެމުންދާ ޢާއިލާއަކަށް ނިސްބަތްވާ އެ ކުއްޖާގެ ހުވަފެނަކަށްވީ އެ ފެސްޓިވަލަށް ދިއުމެވެ. އަދި ރޮބޯމޭން ހަމަ ލޮލުން ދެކިލުމެވެ. އެކަން ހަޤީޤަތަކަށް ހެދުމަށް އޭނާ ދިޔައީ ބިއްލޫރި ކުޑަ ފުޅިއަކަށް ވަކި ލާރި އަޅާ އެއްކުރަމުންނެވެ.
ކުއްޖާގެ ބައްޕައަކީ މާލީގޮތުން އެހާ ތަނަވަސް މީހަކަށްނުވިނަމަވެސް ދަރިފުޅުގެ އެ އެދުން ފުރިހަމަކޮށްދިނުމަށް ބައްޕަވެސް ދިޔައީ ވެވުނު މިންވަރަކުން އެހީތެރިކަން ފޯރުކޮށްދެމުންނެވެ. ނަމަވެސް ދެން ފެނިގެންދަނީ ކަރަންޓް ބިލު ނުދެއްކިގެން ގެއިން ކަރަންޓް ކަނޑާލާ މަންޒަރެވެ. މުޅި ވީޑިއޯއިން އެންމެ ބޮޑަށް އަޅައިގަތީ ގޮތްހުސްވެފައި އިން ބައްޕައަށް އެހީތެރިވުމަށް އޭނާގެ ދަރިފުޅު ކިޑްސް ފެސްޓިވަލަށް ދާން އެއްކުރަމުންދިޔަ ލާރި، ދެވަނަ ވިސްނުމަކަށް ދިއުމެއްނެތި ގެނެސް ބައްޕަގެ އަތަށް ދޭ މަންޒަރެވެ.
ކިޑްސް ފެސްޓިވަލަށް ދާން ދަރިފުޅު ދެކެމުންދިޔަ ހުވަފެނުގައި ހަޤީޤީ ކުލަ ޖެއްސުމަށް އޭނާގެ ބައްޕަ ރެއާދުވާލު މަސައްކަތްކޮށްގެން އެ ކުއްޖާއާއި އޭނާގެ ބައްޕަ ފެސްޓިވަލަށް ދެއެވެ. ވީޑިއޯ ނިމޭއިރު އެ ކުއްޖާއަށް ރޮބޯމޭންއާއި ބައްދަލުކުރުމުގެ ފުރުޞަތު ލިބިގެންދެއެވެ. ވީޑިއޯ ނިންމާލާފައިވަނީ މަޝްޙޫރު ޅެންވެރިޔާ އަދި ލިޔުންތެރިޔާ ޑެއިޒީމާގޭ މަރްޙޫމާ އައިމިނަތު ފާއިޒާ ހައްދަވާފައިވާ މަޝްހޫރު ލަވައެއްގެ ކަޑިއަކުންނެވެ. އެއީ "ދެއްވާށި ކުޑަކުދިންނަށް ހިތްގައިމު ފޮނި އުފާތައް، އެންމެންގެ ލޯބި ލިބިގެން ބޮޑުވާނެ ރަން ދުވަސްތައް" އެވެ. މި ލަވައަކީ ކުޑަކުދިން ތަރުބިއްޔަތުކުރުމުގައި މައިންބަފައިންނާއި މުޖުތަމަޢުގެ ޒިންމާ އަންގައިދޭ އިބުރަތްތެރި ލަވައެކެވެ.
ރޮބޯމޭން އަދި އޭނާގެ ޓީމުން މި ތައްޔާރުކުރި ވީޑިއޯ ކްލިޕުން ދިރިއުޅުމުގައި ކުރިމަތިލާންޖެހޭ އުފަލާއި ހިތާމައިގެ ޙާލަތްތަކުގައިވެސް އެކަކު އަނެކަކަށް އެހީތެރިވެ، އަޅާލާ، ލޯތްބާއި އިޙްތިރާމް ކުރުމުގެ މުހިއްމުކަން ވަރަށް ފުރިހަމައަށް ދައްކުވައިދީފައިވެއެވެ. ވީޑިއޯ ސޯޝަލް މީޑިއާގައި ހިއްސާކުރުމާއެކު ގިނަ ބަޔަކު އަންނަނީ މި ވީޑިއޯ ޝެއަރކުރަމުންނެވެ.
ކޮންމެ ޤައުމެއްގައިވެސް އެންމެ މުހިއްމު ރައުސުލްމާލަކީ އެ ޤައުމެއްގެ ތުއްތުކުދީންކަން ޔަޤީނެވެ. ހަރުދަނާ ޒުވާން ޖީލެއް ބިނާކުރެވޭނީ އެ ޤައުމެއްގެ ކުޑަކުދީންނަށް ބޭނުންވާ ޙިމާޔަތާއި ރައްކާތެރިކަމާއި އެހެންވެސް އެންމެހައި ކަންކަން އޭގެ އެންމެ ފުރިހަމަގޮތުގައި ލިއްބައިދީގެންނެވެ. ކުޑަކުދިންގެ ދުވަސް ފާހަގަކުރަމުންދާއިރު، އަޅުގަނޑުމެންގެ މި މުޖުތަމަޢުއަކީވެސް ލޯތްބާއި، އަޅާލުމާއެކު ކުޑަކުދިންގެ ހައްޤުތަކަށް އިޙްތިރާމްކުރާ ބަޔަކަށްވުން މުހިއްމެވެ. ރޮބޯމޭންގެ މި ވީޑިއޯއިންވެސް އެކަން ވަރަށް ރަނގަޅަށް ދައްކުވައިދެއެވެ.