އެތެރެ ހަށީގެ ބަލިތަކަށް ޚާއްސަ ޑޮކްޓަރުން ތަމްރީންކުރުމުގެ ޕްރޮގްރާމެއް އައި.ޖީ.އެމް.އެޗްގައި ފަށައިފި

އެތެރެ ހަށީގެ ބަލިތަކަށް ޚާއްސަ ޑޮކްޓަރުން ތަމްރީންކުރުމުގެ ޕްރޮގްރާމެއް އިންދިރާ ގާނދީ މެމޯރިއަލް ހޮސްޕިޓަލް، އައި.ޖީ.އެމް.އެޗްގައި ފަށައިފިއެވެ.

މި ތަމްރީން ޕްރޮގްރާމަކީ މެލޭޝިޔާގެ "ނޭޝަނަލް ޔުނިވަސިޓީ އޮފް މެލޭޝިޔާ" އާއި އައި.ޖީ.އެމް.އެޗާއި ގުޅިގެން ކުރިއަށްގެންދާ ތަމްރީން ޕްރޮގްރާމެއްކަމަށް އައި.ޖީ.އެމް.އެޗް އިން ވިދާޅުވެއެވެ. މި ޕްރޮގްރާމުގައި އައި.ޖީ.އެމް.އެޗުގެ 08 ޑޮކްޓަރުންނާއި އިތުރު 02 ޑޮކްޓަރުން ބައިވެރިވެފައިވެއެވެ. އަދި މިއީ ޑޮކްޓަރުން ތަމްރީނުކުރުމަށް މިފަދަ ޕޯސްޓް ގްރެޖުއޭޝަން ޕްރޮގްރާމެއް ދިވެހިރާއްޖޭގައި ހިންގާ ފުރަތަމަ ފަހަރުކަމަށްވެސް އެ ހޮސްޕިޓަލުން މަޢުލޫމާތުދެއްވައެވެ.

އައި.ޖީ.އެމް.އެޗު އިން ވިދާޅުވީ، ކޯވިޑް-19 އާއިއެކު މެލޭޝިޔާގެ ބޯޑަރު ބަންދުވުމާއި ގުޅިގެން ނޭޝަނަލް ޔުނިވަސިޓީ އޮފް މެލޭޝިޔާގެ ރެސިޑެންސީ ޕްރޮގްރާމުގައި ބައިވެރިވެފައިވާ ރާއްޖޭގެ ޑޮކްޓަރުންނާއިއެކު އައި.ޖީ.އެމް.އެޗުގައި މި ޕްރޮގްރާމް ފެށުމަށް ނޭޝަނަލް ޔުނިވަސިޓީ އޮފް މެލޭޝިޔާއިން ހުށަހެޅުމަކީ އެ ހޮސްޕިޓަލަށް ލިބިގެންދިޔަ ފަޚުރެއްކަމަށެވެ. އަދި މިއީ އައި.ޖީ.އެމް.އެޗް ގައި މިފަދަ ޕޯސްޓް ގްރެޖުއޭޝަން ޕްރޮގްރާމެއް ހިންގުމުގެ ޤާބިލުކަންހުރިކަން އެބޭފުޅުން ބަލައިގަންނަކަން ދޭހަވާކަމެއްކަމަށްވެސް އައި.ޖީ.އެމް.އެޗް އިން ވިދާޅުވެއެވެ.

މި ޕްރޮގްރާމުގެ ސަބަބުން ކައިރި މުސްތަޤްބަލެއްގައި މިފަދަ ޕޯސްޓް ގްރެޖުއޭޝަން ނުވަތަ ސްޕެޝަލައިޒޭޝަން ޕްރޮގްރާމުތައް އައި.ޖީ.އެމް.އެޗްގައި ހިންގުމަށް އިތުރު ފުރުސަތުތަކާއި ހިތްވަރު ލިބިގެންދާނެކަމަށްވެސް އެ ހޮސްޕިޓަލުން ބުނެއެވެ.