ސްރިލަންކާ ސަރަޙައްދުގައި އުފެދިފައިވާ ކޮޅިގަނޑު މިހާރު ޠޫފާނަކަށް ބަދަލުވެފައިވާކަމަށް މޫސުމާބެހޭ ޤައުމީ އިދާރާއިން ވިދާޅުވެއްޖެއެވެ.
މޫސުމާބެހޭ ޤައުމީ އިދާރާއިން ވިދާޅުވީ، ސްރީލަންކާގެ ޓްރިންކޮމަލީގެ އިރުދެކުނުން ގާތްގަނޑަކަށް 500 ކިލޯމީޓަރު ދުރުގައި އުފެދިފައިވާ ކޮޅިގަނޑު އިތުރަށް ބާރުގަދަވެ، ޠޫފާނަކަށް ބަދަލުވެފައިވާކަން އިންޑިއާގެ މީޓިއޮރޮލޮޖިކަލް ސެންޓަރު މިހާރު އަންގާފައިވާކަމަށެވެ. އަދި މި ޠޫފާން މިހާރު މިސްރާބުޖަހާފައިވަނީ ބޭ އޮފް ބެންގާލް ހިމެނޭ ސަރަޙައްދުން ލަންކާގެ ހުޅަނގަށްކަމަށާއި، ޠޫފާން ސްރިލަންކާގެ މަތިން ހުރަސްކުރާނެކަމަށް ލަފާކުރެވެނީ މާދަމާގެ ހަވީރު ނުވަތަ އިރުއޮއްސޭ ވަގުތުގައިކަމަށްވެސް މޫސުމާބެހޭ ޤައުމީ އިދާރާއިން ވިދާޅުވެއެވެ. ކުރިއަށްހުރި ވަގުތުތަކުގައި މި ޠޫފާނުގެ ބާރުގަދަވާނެކަމަށް ބެލެވޭތީ، އެކަމަށް ސަމާލުވުމަށް އިންޑިއާގެ މީޓިއޮރޮލޮޖިކަލް ސެންޓަރުންވެސް ވަނީ އިރުޝާދު ދީފައެވެ.
އުތުރު އިންޑިއާ ކަނޑާއި، ބޭ އޮފް ބެންގާލް އަދި ޢަރަބި ކަނޑުގެ ސަރަޙައްދަށް އަންނަ ޠޫފާންތަކަށް ނަން ދިނުމާއި، އެލަރޓްތައް ނެރުމަށް އުފައްދާފައިވާ "ޓްރޮޕިކަލް ސައިކްލޯން ވޯނިންގ ސެންޓަރ"އިން ލަންކާ ސަރަހައްދުގައި އުފެދުނު ޠޫފާނަށް ދީފައިވަނީ "ބުރެވި" މި ނަމެވެ. މިއީ އެ ސެންޓަރުގެ މެންޑޭޓުގެ ތެރޭގައި ހިމެނޭ 13 ޤައުމުގެ ތެރެއިން ދިވެހިރާއްޖޭގެ ފަރާތުން ހުށަހަޅާފައިވާ ނަމެކެވެ. އެ ސެންޓަރުން ޠޫފާންތަކަށް ނަން ދިނުމުގައި ކަނޑައަޅަނީ ޤައުމުތަކުން ހުށަހެޅުމުން އެ ނަންތައް ފާސްވާ ތަރުތީބުންނެވެ.
މޫސުމާބެހޭ ޤައުމީ އިދާރާއިން ވިދާޅުވެފައިވަނީ "ބުރެވި" މި ނަން ނިސްބަތްކޮށްފައިވަނީ ކަނޑޫފާގައި ސަރަހައްދުތަކުގައި އާއްމުކޮށް ހެދޭ ބުރެވި ގަހަށްކަމަށެވެ. މިއީ ރާއްޖޭގެ ބައެއް ރަށްރަށުގެ ގޮނޑުދޮށް ސަރަޙައްދުންވެސް ފެންނަ ބާވަތުގެ ގަހެކެވެ.
ޠޫފާން "ބުރަވި"ގެ ސީދާ އަސަރު ރާއްޖެއަށް ނުކުރިނަމަވެސް، މި ޠޫފާނުގެ ނުސީދާ އަސަރު ކޮންމެވެސް ވަރަކަށް ރާއްޖެއަށް ކުރާނެކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ. އެގޮތުން މާދަމާގެ މެންދުރުފަހުން ފެށިގެން ރާއްޖޭގެ ބޮޑު ސަރަޙައްދަކަށް ވައިގަދަވެ، ކަނޑުތައް ގަދަވާނެކަމަށާއި، އުތުރުރާއި މެދުތެރޭގެ އަތޮޅުތަކަށް ވިއްސާރައިގެ އަސަރުކުރާނެކަމަށް އެ ސެންޓަރުން ވަނީ ހާމަކޮށްފައެވެ.
މިޠޫފާން ސްރީލަންކާގެ މަތިން ހުރަސްކުރުމަށްފަހު މިމަހުގެ 3 ވަނަ ދުވަހު ދެކުނު އިންޑިއާގެ އައްސޭރިފަށާއި ކައިރިވާނެކަމަށް އިންޑިއާގެ މޫސުމާބެހޭ އިދާރާއިން ލަފާކޮށްފައިވާއިރު، ޠޫފާނުގެ އަސަރު ޓެމިލްނާޑޫއާއި ކެރެލާގެ އައްސޭރިފަށުގެ ސަރަޙައްދުތަކަށް ކުރާނެކަމަށްވެސް އެ ޤައުމުގެ މެޓްއޮފީހުން ވަނީ ހާމަކޮށްފައެވެ.
މީގެ އިތުރުން، ރާއްޖޭގެ އިރުދެކުނުން ދެކުނު އިންޑިއާ ކަނޑުގައިވެސް ކޮޅިގަނޑެއް އުފެދިފައިވާކަމަށް މޫސުމާބެހޭ ޤައުމީ އިދާރާއިން ވިދާޅުވެއެވެ. އަދި މިމަހުގެ 3 ވާ ބުރާސްފަތި ދުވަހުން ފެށިގެން ހަފްތާ ބަންދު ތެރެއާއެކު ރާއްޖޭގެ ސަރަޙައްދުގައި ވައިގަދަވެ، ކަނޑުތައް ގަދަވެގެންދާނެކަމަށް ބެލެވޭކަމަށްވެސް އެ އިދާރާއިން ވިދާޅުވެއެވެ.
މިކަމާގުޅިިގެން ރާއްޖޭގެ މޫސުމަށް ފޯރާނެކަމަށް ބެލެވޭ އަސަރުތައް އެ އިދާރާއިން އަމަލުކުރަމުންދާ އުސޫލުގެ ތެރެއިން، ނެރޭ ސަމާލު، އަދި އިންޒާރުގެ މެސެޖްތައް މެދުވެރިކޮށް އާންމުކުރަމުންދާނެކަމަށްވެސް މޫސުމާބެހޭ ޤައުމީ އިދާރާއިން ވިދާޅުވެއެވެ.