ނުކުޅެދުންތެރިކަން ހުންނަ މީހުންގެ ދުވަސް - ޑިސެބިލިޓީ މެނޭޖްމަންޓް އެންޑް ރިހެބިލިޓޭޝަން ސެންޓަރެއް ޤާއިމުކުރަނީ

ރާއްޖޭގައި ފުރަތަމަ ފަހަރަށް ޑިސެބިލިޓީ މެނޭޖްމަންޓް އެންޑް ރިހެބިލިޓޭޝަން ސެންޓަރެއް ޤާއިމުކުރުމަށް ނިންމާފައިވާކަމަށާއި، އެކަމަށް ވާންޖެހޭ ތައްޔާރީތައް ވަމުންދާކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދުދީދީ ވިދާޅުވެއްޖެއެވެ.

މިނިސްޓަރ މިކަން ހާމަކުރައްވާފައިވަނީ ބައިނަލްއަޤްވާމީ ގޮތުން ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހުގެ މުނާސަބަތުގައި ދެއްވި ޚާއްސަ ޚިޠާބުގައެވެ.

ޖެންޑަރ މިނިސްޓަރ ޢާއިޝަތު މުޙައްމަދުދީދީ ވިދާޅުވީ، ރާއްޖޭގައި ދިރިއުޅޭ ނުކުޅެދުންތެރިކަން މީހުންނަށް މިހާރަށްވުރެ ހަމަހަމަ ފުރުޞަތުތަކާއި، އަސާސީ ޚިދުމަތްތައް އެންމެ އެކަށީގެންވާ އަދި އެންމެ ފުރިހަމަގޮތުގައި ފޯރުކޮށްދިނުމަށްޓަކައި ވަކިވަކި ފަރުދުންގެ ފެންވަރުގައިއާއި ޖަމިއްޔާ ޖަމާއަތްތަކުންނާއި، ސަރުކާރުގެ ހުރިހާ މުއައްސަސާތަކުން ގުޅިގެން އެއް އަމާޒަކަށް މަސައްކަތް ކުރުމަކީ މުހިއްމު އަދި އެހާމެ ބޭނުންތެރިކަމެއްކަމަށެވެ. އަދި ނުކުޅެދުންތެރިކަން ހުންނަ މީހުންނަށް ރާއްޖޭގެ މުޖުތަމަޢުއިން ދެވޭ ސަމާލުކަން އިތުރުވެފައިވީނަމަވެސް މުޖުތަމައުގައި ހަވާސާވެފައިވާ މިފަދަ ފަރާތްތަކަށް އަދިވެސް އެންމެ އެކަށީގެންވާގޮތުގައި ޝާމިލުވެއުޅުމުގައި ތަފާތު ގޮންޖެހުންތަކެއް ހުރިކަން އެކަމަނާ ފާހަގަކުރެއްވިއެވެ.

މިއީ މިހާރަށްވުރެ ބޮޑަށް ސަމާލުކަންދީ އިތުރަށް މަސައްކަތް ކުރަންޖެހިފައިވާ ދާއިރާއެއްކަން ފާހަގަކުރައްވާ މިނިސްޓަރ ޢާއިޝަތު މުޙައްމަދުދީދީ ވިދާޅުވީ، ނުކުޅެދުންތެރިކަން ހުންނަ މީހުންނަށް ބޭނުންވާ ޚިދުމަތްތައް އެއް ފުރާޅެއްގެ ދަށުން ދިނުމަށްޓަކައި ޚާއްސަ ސެންޓަރެއް ޤާއިމުކުރުމަށް ނިންމާފައިވާކަމަށެވެ. އަދި މިއީ ރާއްޖޭގައި ޤާއިމުކުރާ މިފަދަ ފުރަތަމަ ސެންޓަރަށްވެގެންދާނެކަމަށްވެސް މިނިސްޓަރ ވިދާޅުވިއެވެ.

"މިއަދު އަޅުގަނޑު އެންމެ އުފާވާ، އަދި ދޭން ބޭނުންވާ އެންމެ އުފާވެރި ޚަބަރަކީ ޑިސެބިލިޓީ މެނޭޖްމަންޓް އެންޑް ރިހެބިލިޓޭޝަން ސެންޓަރެއް ޤާއިމުކުރުމަށްޓަކާ ވާންޖެހޭ ތައްޔާރީތައް މިހާރު ވަމުންދާކަން. މިއީ ރާއްޖޭގައި މިގޮތަށް ބިނާވެގެންދާނެ ފުރަތަމަ ސެންޓަރު. މިއީ ނުކުޅެދުންތެރިކަން ހުންނަ މީހުންނަށާއި ކުދިންނަށް ދިމާވެފައިވާ ވަރަށް ގިނަ ދަތިތަކަށް ހައްލު ލިބިގެންދާނެ ތަނަކަށް ވެގެންދާނެކަން ކަށަވަރު" ޖެންޑަރ މިނިސްޓަރ ވިދާޅުވިއެވެ.

ޖެންޑަރ މިނިސްޓަރުގެ ޚިޠާބުގައި ނުކުޅެދުންތެރިކަން ހުންނަ މީހުންނަށް ކޯވިޑް-19ގެ ސަބަބުން ދިމާވެފައިވާ ދަތިތަކާއި، އެކަންކަން ހައްލުކުރުމަށް ޖެންޑަރ މިނިސްޓްރީން ގިނަގުނަ މަސައްކަތްތަކެއް ކުރެވިފައިވާކަމަށާއި، އަދި މިހާރުވެސް ކުރަމުންދާކަން ވަނީ ފާހަގަކުރައްވާފައެވެ. އަދި ކޯވިޑް-19ގެ ސަބަބުން ނުކުޅެދުންތެރިކަން ހުންނަ މީހުންނާއި، އެފަރާތްތަކުގެ ޢާއިލާތަކަށްވެސް އިޖުތިމާޢީ ގޮތުންނާއި އިޤްތިޞާދީގޮތުން ގިނަގުނަ ގޮންޖެހުންތަކާއި ކުރިމަތިލާންޖެހިފައިވާކަމަށްވެސް މިނިސްޓަރ ވިދާޅުވިއެވެ.

"ކޯވިޑް-19 ގެ ސަބަބުން ނުކުޅެދުންތެރިކަން ހުންނަ މީހުންނާއި، އެފަރާތްތަކުގެ އާއިލާތަކަށް ދިމާވެފައިވާ ދަތިތަކާއި، އެހީތެރިކަމަށް ބޭނުންވާ ކަންތައްތައް ދެނެގަނެ ފާހަގަކުރެވުނު ކަންތައްތަކާ ގުޅިގެން އެކަންކަމަށް ހައްލު ހޯދައިދިނުމަށް ބޭނުންވާ އެކަށީގެންވާ ނިޒާމްތައް އެކުލަވާލެވުނު. އަދި މި ނިޒާމުގެ ތެރެއިން އެހީތެރިކަން ފޯރުކޮށްދިނުމުގެ މަސައްކަތްތައް ދަނީ އޭޕްރީލްމަހުން ފެށިގެން ކުރެވެމުން" ޖެންޑަރ މިނިސްޓަރ ވިދާޅުވިއެވެ.

ކޮންމެ އަހަރެއްގެވެސް ޑިސެމްބަރުމަހުގެ 3 ވަނަ ދުވަސް ފާހަގަކުރަނީ ބައިނަލްއަގްވާމީގޮތުން ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހުގެ ގޮތުގައެވެ. މި ދުވަހާގުޅިގެން އދ. ގެ ފަރާތުން މިއަހަރަށް ކަނޑައަޅާފައިވާ ޝިއާރަކީ "ބިލްޑިންގ ބެކް ބެޓަރ، ޓުވޯޑް ޑިސެބިލިޓީ، އިންކްލޫސިވް، އެކްސެސެބަލް އެންޑް ސަސްޓެއިނަބަލް ޕޯސްޓް ކޯވިޑް-19 ވޯލްޑް" އެވެ. މިފަދަ ދުވަހެއް ފާހަގަކުރުމުގެ އެންމެ ބޮޑު މަޤްޞަދަކީ ނުކުޅެދުންތެރިކަން ހުންނަ މީހުންނަކީވެސް މުޖުތަމައުގެ އެހެން ފަރުދުންނެކޭ އެއްފަދައިން ދިރިއުޅުމުގެ އެންމެހާ ކަންކަމުގައި ފުރިހަމައަށް ޝާމިލުވެވޭނެ މާހައުލެއް ޤާއިމުކުރުމަށް ބާރު އަޅާ، މިހާރަށްވުރެ ބޮޑަށް އެފަދަ ފުރުޞަތުތައް ފަހިކުރުމަށް މަސައްކަތްކުރުމެވެ.