ޞިއްޙީ ޚިދުމަތް ލާމަރުކަޒުކުރުމަށް ކުރާ މަސައްކަތަށް ރައްޔިތުންގެ އިތުބާރު މިހާރު ލިބިއްޖެ - ރައީސް

ރާއްޖޭގެ ޞިއްޙީ ޚިދުމަތުގެ ފެންވަރު ރަނގަޅުކޮށް ލާމަރުކަޒު ކުރުމަށް ސަރުކާރުން ކުރާ މަސައްކަތްތަކަށް ރައްޔިތުންގެ ފުރިހަމަ އިތުބާރު މިހާރު ލިބިފައިވާކަމަށް ރައީސުލްޖުމްޙޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ސަރުކާރުން ހައްދުންމަތީގައި ކުރިއަށްގެންދިޔަ 3 މަޝްރޫޢެއް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، މިއަދު ފުރިހަމަވެގެން މިދަނީ، ލާމަރުކަޒީ ނިޒާމު ހަރުދަނާ ކުރުމުގެ ސިޔާސަތުގެ ދަށުން ހައްދުންމަތީގެ ތަރައްޤީއަށް ހިންގުނު ވަރަށް މުހިންމު 3 މަޝްރޫޢެއްކަމަށެވެ. ވަކިން ޚާއްސަގޮތެއްގައި ޞިއްޙީ ޚިދުމަތް ލާމަރުކަޒު ކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން، ގަމު ރީޖަނަލް ހޮސްޕިޓަލް، ޓާޝަރީ ފެންވަރަށް ތަރައްޤީކުރުމުގެ ގޮތުން ގެނެވޭ މުހިންމު ބަދަލުތަކުގެ މައްޗަށް އެމަނިކުފާނު އަލިއަޅުއްވާލެއްވެވިއެވެ.

ރައީސުލްޖުމްހޫރިއްޔާ ވިދާޅުވީ، ގަމު ރީޖަނަލް ހޮސްޕިޓަލުގައި އަލަށް ފަށާ ސީޓީ ސްކޭންގެ ޚިދުމަތަކީ، އެތަން ޓާޝަރީ ފެންވަރަށް ގެންދިއުމަށް ކުރެވޭ މަސައްކަތުގެ ތެރެއިން އިތުރުކުރެވެނު މުހިންމު ޚިދުމަތެއްކަމަށެވެ. އަދި މިކަމުގެ ސަބަބުން މި ޚިދުމަތް ހޯދަން މާލެއަށް ނުގޮސް، ރަށުގައި ތިބެގެން ނުވަތަ އެ އަތޮޅުން، ޚިދުމަތް ހޯދުމުގެ ފުރުޞަތު މިސަރަޙައްދުގެ ރައްޔިތުންނަށް ފަހިކޮށްދެވިފައިވާކަމަށް އެމަނިކުފާނު ވިދާޅުވިއެވެ. އަދި ގަން ރީޖަނަލް ހޮސްޕިޓަލް ތަރައްޤީކުރުމަށް ކުރާ މަސައްކަތާއެކު، ހިދުމަތުގެ ފެންވަރަށް ބޮޑެތި ބަދަލުތަކެއް އައިސް، ވަޒީފާގެ އިތުރު ފުރުޞަތުތައްވެސް ފަހިވެގެންދާނެކަން އެމަނިކުފާނު ފާހަގަކުރެއްވިއެވެ.

"އޯ.ޕީ.ޑީއަށް އިތުރުކުރި ކޮޓަރިތައްވެސް މިހާރު އެހުރީ ނިމި ބޭނުންކުރަން ތައްޔާރުވެފައި. ޑިޖިޓަލް އެކްސްރޭ އާއި މެމޮގްރާމާއި ދަތުގެ ފަރުވާއަށާއި ފިޒިއޯތެރަޕީއަށް ބޭނުންވާ ސާމާނާއި ލެބޯޓެރީ ސާމާނުވެސް މިހާރު އެހުރީ ހޮސްޕިޓަލަށް ގެނެވިފައި. އެ މެޝިންތައް އިންސްޓޯލްކޮށް ވަރަށް އަވަހަށް ޚިދުމަތް ދޭން ފެށޭނެ. އަދި މި ހޮސްޕިޓަލަށް ބޭނުންވާ ސްޕެޝަލިސްޓް ޑޮކްޓަރުންނާއި ޞިއްޙީ ޚިދުމަތްތެރިން ހޯދުމުގެ މަސައްކަތްވެސް މިއަންނަނީ ކުރަމުން. މިއިން ކޮންމެ ބަދަލަކާ އެކު އުފެދިގެން އެއަންނަނީ ވަޒީފާގެ އެތައް ފުރުޞަތެއް. މިދާއިރާއިން މަތީ ތަޢުލީމް ޙާޞިލްކުރަމުން ގެންދާ ދަރިވަރުން، ރަށާއި އަތޮޅުގައި ތިބެގެން ވަޒީފާ އަދާކުރުމުގެ ވަރަށް ތަނަވަސް ފުރުޞަތުތަކެއް އުފެދިގެންދާނެ" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވިއެވެ.

ރައީސުލްޖުމްހޫރިއްޔާ ދެއްކެވި ވާހަކަފުޅުގައި ޞިއްޙީ ދާއިރާ ހަރުދަނާކުރުމަށް ވަކިން ޚާއްސަކޮށް، ލާމަރުކަޒު ކުރުމަށް ސަރުކާރުން ގެންގުޅުއްވާ ސިޔާސަތު ކާމިޔާބުވަމުންދާ މަންޒަރު މިއަދު ފެންނަމުންދާކަމަށް ވަނީ ވިދާޅުވެފައެވެ. އަދި މި ދާއިރާއަށް ރައްޔިތުންގެ އިތުބާރު މިހާރު ލިބިފައިވާކަމަށްވެސް އެމަނިކުފާނު ވިދާޅުވިއެވެ.

"ޞިއްޙީ ޚިދުމަތުގެ ފެންވަރު ރަނގަޅުކޮށް ލާމަރުކަޒު ކުރުމަށް، މީގެ ދެ އަހަރު ކުރިން ފެށިގެން ކުރަމުން މިއަންނަ މަސައްކަތްތަކަށް ރައްޔިތުންގެ އިތުބާރު ލިބި، އަތޮޅުތަކުގެ ހޮސްޕިޓަލްތަކުން ޚިދުމަތް ހޯދާ މީހުންގެ ޢަދަދު ވަރަށް ބޮޑަށް އިތުރުވެއްޖެ. އަދި ކޯވިޑް-19ގެ ބަލިމަޑުކަމާ ގުޅިގެން، މާލެ ފުރަބަންދުކުރަން ޖެހުމުން، ޚިދުމަތްތައް ލާމަރުކަޒު ކުރުމުގެ މުހިންމުކަން ފެނިއްޖެ. އަދި މިއީ ކޮންމެހެން ކުރަންޖެހޭ ކަމެއްކަން، އޮޅުމެއް ނެތި އެނގިއްޖެ" ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވިއެވެ.

ރަައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ރައްޔިތުންނަށް ތަކުލީފަކަށް ނުވެ، ރައްޔިތުންނާ ވީހާވެސް ގާތުން ފެންވަރު ރަނގަޅު ޞިއްޙީ ޚިދުމަތް ލިބޭނެ ގޮތް ހެދުމަކީ ސަރުކާރުގެ އަމާޒެއްކަމަށެވެ. އަދި ގަމު ހޮސްޕިޓަލް ތަރައްޤީކުރުމުގެ މަޝްރޫޢުގައި ހިމެނޭ، އައު ޢިމާރާތުގެ މަސައްކަތް އަންނަ އަހަރުގެ ތެރޭގައި ފެށޭނެކަން އެމަނިކުފާނު ވަނީ ހާމަކުރައްވާފައެވެ. ރައީސުލްޖުމްހޫރިއްޔާ ވިދާޅުވީ، ގަމު ހޮސްޕިޓަލުގެ އައު ޢިމާރާތް ނިމި ޓާޝަރީ ފެންވަރަށް ޚިދުމަތް ދޭން ފެށުމާއެކު، ހައްދުންމަތީގެ ޞިއްޙީ ޚިދުމަތަށް ބޮޑެތި ކުރިއެރުންތަކެއް އަންނާނެކަމަށެވެ.