މާލޭގެ ގޭބިސީތަކުން ކުނި އުކާލުމަށް ނެރޭ ގަޑި ރޭގަނޑު 10 އިން 12 އަށް ބަދަލުކުރުމަށް ނިންމާފައިވާކަމަށް މާލޭ ސިޓީގެ މޭޔަރ ސިފާ މުޙައްމަދު ވިދާޅުވެއްޖެއެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން މޭޔަރ ސިފާ ވިދާޅުވީ، މާލޭގެ މަގުތަކުގައި މުޅި ދުވަހު ކުނިކޮތަޅުތައް ހުންނަ މައްސަލައަށް ހައްލެއް ގެނައުމުގެގޮތުން، ކުނި ނެރެންޖެހޭ ގަޑިތަކަށް ބަދަލު ގެނައުމަށް މާލޭ ސިޓީ ކައުންސިލާއި، ވެމްކޯއާއި ދެމެދު މަޝްވަރާކޮށްފައިވާކަމަށެވެ. އަދި ކުނި ނެރެންޖެހޭ ގަޑި ރޭގަނޑު 10 އިން 12 އަށް ބަދަލުކުރުމަށް ހަމަޖެހިފައިވާކަމަށް މޭޔަރ ވިދާޅުވިއެވެ. މޭޔަރ ވިދާޅުވީ، މިހާރު ކުނި ނެރެން އޮންނަ ގަޑީގެ ސަބަބުން، ކުނިތައް ނެގުމުގައިވެސް ދަތިތަކެއް ކުރިމަތިވާކަން ފާހަގަކުރެވިފައިވާކަމަށެވެ.
އެގޮތުން އެ މަސައްކަތް ކުރަމުންދަނީ ދުވާލުގަޑީގައި ކަމަށްވެފައި، ވެމްކޯގެ ވެހިކަލްތަކަށާއި، ކުނި ނެގުމަށް ހަރަކާތްތެރިވާ މުވައްޒަފުންނަށްވެސް އެގަޑިތަކުގައި މަގުތަކުގައި ހަރަކާތްތެރިވުމުގައި އުނދަގޫތަކެއް ކުރިމަތިވާކަމަށް މޭޔަރ ވިދާޅުވިއެވެ. އަދި ކުނި ނެގުމުގެ މަސައްކަތް ދިގުލައިގެން ދިއުމާއި، ކުނި ނެރުމަށް އޮންނަ ގަޑީގެ ބަދަލުގައި އެހެން ގަޑިތަކުގައި ކުނި ނެރެފައި މަގުމަތީގައި ބެހެއްޓުންފަދަ ކަންކަންވެސް ފާހަގަކުރެވިފައިވާކަމަށް މޭޔަރ ވިދާޅުވިއެވެ.
މޭޔަރ ސިފާ ވިދާޅުވީ، މިހާރަކަށް އައިސް އަވަހަށް ކުނިވާ ޒާތުގެ ކުނިތައް މުޅި ދުވަހު ކަހަލަގޮތަކަށް މަގުތަކުގައި ހުރުމުގެ ސަބަބުން ބައެއް މަގުތަކުގައި ނުބައިވަސްދުވުމާއި، ބުޅަލުގެ އުނދަގޫ ބޮޑުވުމުގެ ޝަކުވާތައްވެސް ކައުންސިލަށް ލިބެމުންދާކަމަށެވެ. އެހެންކަމުން ކުނި ނެރޭ ގަޑި ބަދަލުކުރުމުން، އާއްމުންގެ އެފަދަ ޝަކުވާތަކަށް ހައްލެއް ލިބިގެންދާނެކަމަށް މޭޔަރ ވިދާޅުވިއެވެ. ނަމަވެސް އެގޮތަށް ޢަމަލުކުރަން ފަށާނެ ވަކި ތާރީޚެއް މޭޔަރ ދެއްވާފައެއްނުވެއެވެ.
"މިހާރު ކުނި ނެރޭ ގަޑީގެ ސަބަބުން އެކަން ކުރުމުގައި އުނދަގޫތަކެއް ހުރިކަން ފާހަގަކުރެވޭ. މަސައްކަތް ދިގުލައިގެން ދިއުމާއި، ބޮޑެތި ވެހިކަލްތައް ހަވީރު ގަޑީގައި ދުއްވާތީ މަގުތަކުގެ ބާރުވެސް ބޮޑުވޭ. އެހެންކަމުން ވެމްކޯއާއި މަޝްވަރާކުރުމަށްފަހު ގޭބިސީތަކުން ކުނި ނެރޭ ގަޑި ރޭގަނޑު 10 އިން 12 އަށް ބަދަލުކުރުމަށް ނިންމާފައިވަނީ. އޭރުން ފަތިސްވާންވާއިރަށް މަގުތައް ސާފުކުރެވޭނެ. އަޅުގަނޑުމެން ވެމްކޯއާއި ގުޅިގެން ވަރަށް އަވަށް ޕްރެސްކޮން ފަރެންސްއެއް ބާއްވާނަން އިތުރު މަޢުލޫމާތުދޭން" މޭޔަރ ސިފާ ވިދާޅުވިއެވެ.
ކޯވިޑް-19ގެ ސަބަބުން ވެމްކޯއިން ކުނި އުކާލުމުގެ ޚިދުމަތްދޭ ގަޑިތަކަށް ވަނީ ބަދަލުގެނެސްފައެވެ. އެގޮތުން މިދިޔަ އޭޕްރީލްމަހުން ފެށިގެން އެ ކުންފުނިން އަންނަނީ މާލޭގައި ގޭބިސީތަކުން ކޮންމެ ދުވަހެއްގެވެސް މެންދުރު 12 އިން 2 އަކަށް އެގެއެއްގެ ތިރިއަށް ކުނި ނެރެފައި ބެހެއްޓުމުން ކުނި އުކައިދިނުމުގެ މަސައްކަތް ކުރަމުންނެވެ.