ކޯވިޑް-19އާ ގުޅިގެން ރާއްޖެއަށް އިމްޕޯޓްކުރާ ކާބޯތަކެތި ދޫކުރުމުގައި ޢަމަލުކުރާ ގޮތުގެ އުސޫލަށް ބަދަލުގެނެސްފިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީން ވިދާޅުވީ ކޯވިޑް-19 އާއި ގުޅިގެން ކާބޯތަކެތި އިމްޕޯޓުކުރުމުގައި ދިމާވާ ދަތިތައް ހައްލުކޮށް، ކާބޯތަކެތީގެ ރައްކާތެރިކަން ކަށަވަރުކޮށް، ކާބޯތަކެތި އެތެރެކުރާ ފަރާތްތަކަށް ލުއިދިނުމަށް އެކުލަވާލައިފައިވާ އުސޫލަށް ބަދަލުގެނައުމަށް ނިންމާފައިވާ ކަމަށެވެ.
އެގޮތުން އިންޕޯޓްކުރާ ކާބޯތަކެއްޗަށް ހެލްތު ކްލިއަރަންސް ދޫކުރާނީ ވަކި ކަންތައްތަކަށް ބެލުމަށްފަހު އެކަންތައް ފުރިހަމަވާނަމަ ކަމަށް އެފްޑީއޭއިން ހާމަކުރެއެވެ.
އެފްޑީއޭއިން ވިދާޅުވީ ހެލްތު ސެޓްފިކެޓް ހުށަހަޅަންޖެހޭ ކާބޯތަކެއްޗަށް، އޮރިޖިނަލް ހެލްތު ސެޓްފިކެޓު އިންވޮއިސްއާއެކު ހުށަހަޅަންޖެހޭނެ ކަމަށެވެ. އަދި މީގެއިތުރުން ރާއްޖެ އެތެރެކުރާ ކާބޯތަކެތި ލޭބަލް ކުރުމުގެ ޤައުމީ މިންގަނޑު "ބަންދުކުރި ކާބޯތަކެތި ލޭބަލް ކުރުމުގެ ޤައުމީ މިންގަނޑު" ގައިވާ ޝަރުތުތައް ފުރިހަމަވާން ވާނެކަމަށްވެސް އެ އޮތޯރިޓީން ހާމަކުރެއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީން ވިދާޅުވީ އަންނަ މަހުގެ އެއްވަނަ ދުވަހުން ފެށިގެން އިމްޕޯޓްކުރާ ކާބޯތަކެއްޗަށް ހެލްތު ކްލިއަރަންސް ދެވޭނީ މި ޝަރުތުތައް ފުރިހަމަވާނަމަ ކަމަށެވެ.