ދުނިޔޭގެ އެކި ޤައުމުތަކުގައިވެސް އެއްތަނުން އަނެއްތަނަށް ދަތުރުފަތުރު ކުރާއިރު ޓިކެޓް ނެގުމަށް ޚާއްސަ އެކި ޕެކޭޖްތައް ހިމަނާފައިވެއެވެ. މިއާއެކު ކޮންމެ ދުވަހަކު ދަތުރުކުރާ މީހުންނަށްވެސް ފަސޭހަތަކެއްވެއެވެ. ރާއްޖޭގެ އެކި ރަށްތައް ދަތުރުފަތުރުގެ ނިޒާމުން ގުޅާލުމަށްޓަކައި ކުރިއަށް ގެންދާ ހައި ސްޕީޑް ފެރީ ނިޒާމްގައިވެސް ރައްޔިތުންނަށް ފަސޭހަ ވާނެގޮތަށް ގިނަ ޚިދުމަތްތަކެއް އެކުލެވެއެވެ. މީގެތެރޭގައި ޓިކެޓިންގެ އެކި ޕެކޭޖްތަކެއް އެކުލަވާލުމަށް ނިންމާފައިވާ ކަމަށް އެމްޓީސީސީން ވިދާޅުވެއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ހައި ސްޕީޑް ފެރީގެ ޚިދުމަތުގައި ޓިކެޓް ގަތުމަށްޓަކައި އެޕްލިކޭޝަނެއް ތަޢާރަފްކުރުމަށް ނިންމާފައިވާކަމަށެވެ. އަދި މިއެޕްލިކޭޝަން މެދުވެރިކޮށް ޓިކެޓް ގަތުމާއި ޕްރީ ބުކް ކުރުމާއި ފެރީ އޮތް ހިސާބުވެސް ބަލާލެވޭނެއެވެ. އަދި ފެރީގެ ޝެޑިއުލްތަކާއި ފެރީ ދަތުރުކުރަމުންދާ މަންޒިލްވެސް މި އެޕް މެދުވެރިކޮށް ބަލާލެވޭނެކަމަށް އާޒިމް ވިދާޅުވެއެވެ.
ހައި ސްޕީޑް ފެރީގެ ޚިދުމަތް އެންމެ ފުރަތަމަ ފެށުމަށް ހަމަޖެހިފައިވަނީ ޒޯން 1 ގައި ހިމެނޭ ހއ.އާއި، ހދ.އާއި ށ. އަތޮޅުގައެވެ. ޚިދުމަތުގައި އެމްޓީސީސީން ބޭނުންކުރުމަށް ނިންމާފައިވަނީ 40-50 ދެމެދުގެ ޖާގައިގެ 47 ފޫޓުގެ ލޯންޗެވެ. ފުރަތަމަ ޒޯންގައި 41 ރަށަކަށް ޚިދުމަތްދިނުމަށްވަނީ ހަމަޖެހިފައެވެ. އެމްޓީސީސީން މިސަރަޙައްދުގައި ބެކްއަޕް ލޯންޗާއެކު ޖުމުލަ 17 ލޯންޗެއް ބޭނުން ކުރުމަށް ހަމަޖެހިފައިވެއެވެ.
އާޒިމް ވިދާޅުވީ ޚިދުމަތް ފަށައިގަނެ ދަތުރުކުރާ މީހުންގެ ނިސްބަތަށް ބަލާނެކަމަށެވެ. އަދި ޖާގައިގެ ދަތިކަމެއް ކުރިމަތިވެއްޖެނަމަ ލޯންޗްތައް އިތުރު ކުރުމުގެ މަސައްކަތްވެސް ސަރުކާރުގެ ލަފާގެ މަތިން ކުރާނެކަމަށެވެ. އާޒިމް ވިދާޅުވީ ލޯންޗް ޓިކެޓްގެ އަގުތައްވެސް އާއްމުކޮށް ދަތުރުކުރާ ލޯންޗްތަކުގެ އަގުތަކަށް ވުރެ ހެޔޮވާނެ ކަމަށާއި ލުއިފަސޭހަ ކުރުމުގެ ގޮތުން އެކި ޕެކޭޖްތައް ހުންނާނެކަމަށެވެ.
"އެކި ޕެކޭޖްތައް އެކުލަވާލުމުން ރައްޔިތުންނަށްވެސް ފަސޭހަވެގެންދާނެ. ޓިކެޓިންގެ ތެރޭގައި މިސާލަކަށް ކޮންމެ ދުވަހަކު ހޮސްޕިޓަލަށް ދާ މީޙަކަށް އަގުހެޔޮ ނިޒާމެއް ހަމަޖައްސާނެ. އެޕްގެ ތެރެއިން އެމީހަކު ދަތުރުކުރާނެ ގޮތް ސިލެކްޓްކޮށްލެވޭނެ." އެމްޓީސީސީގެ ސީއީއޯ އާދަމް އާޒިމް ވިދާޅުވިއެވެ.
ހައި ސްޕީޑް ޚިދުމަތާއެކު ކޮންމެ ސަރަހައްދެއްގައިވެސް އެމްޓީސީސީގެ މައި ހަބެއް ޤާއިމްކުރުމަށް ވަނީ ނިންމާފައެވެ. އެއާއެކު ރަށްރަށުގެ ކައުންސިލާއި އެމްޓީސީސީ ގުޅިގެން މަސައްކަތްކުރެވޭނެ ގޮތް ހަމަޖެހިގެންދާނެއެވެ. އާޒިމް ވިދާޅުވީ ހައި ސްޕިީޑް ފެރީގައި ކޮންމެ މީހަކަށްވެސް ލަގެޖާއެކު 20 ކިލޯގެ ތަކެތި ގެންދެވޭނެ އިންތިޒާމްވެސް ހަމަޖައްސާނެކަމަށެވެ.
ހައިސްޕީޑް ފެރީ ހަފްތާގެ 7 ދުވަހު ދަތުރު ކުރާނެއެވެ. އަދި މިޚިދުމަތުގައި ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރާނެކަމަށާ، މިޚިދުމަތަކީ އެންމެ މަތީ ނިޒާމްގައި ދެވޭ ޚިދުމަތެއްގެ ގޮތުގައި ހަދާނެކަމަށް އެމްޓީސީސީން ވިދާޅުވެއެވެ. އެމްޓީސީސީން އަމާޒު ހިފާފައިވަނީ މިއަހަރުގެ އޮކްޓޫބަރު މަހު ހައި ސްޕީޑް ފެރީގެ ޚިދުމަތް ފެށުމަށެވެ.