ބޯހިޔާވަހިކަން ބޭނުންވާ މިންވަރު ދެނެގަތުމަށްޓަކައި ރާއްޖޭގެ އެކި ކަންކޮޅުތަކުގައި ކުރިއަށްގެންދާ ދިރާސާގައި، އާއްމުންނަށް ގުޅައިގެން އެއްކުރަންޖެހޭ މަޢުލޫމާތު އެއްކުރުމުގެ މަސައްކަތް ނިންމާލައިފިއެވެ.
މި ދިރާސާއަކީ ވޯލްޑް ބޭންކުގެ ހިލޭ އެހީއާއި ލޯނުގެ ދަށުން ކުރިއަށްގެންދާ މޯލްޑިވްސް އާރބަން ޑިވެލޮޕްމަންޓް ޕްރޮޖެކްޓުގެ ދަށުން މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ކުރިއަށްގެންދިޔަ ދިރާސާއެކެވެ.
"މޯލްޑިވްސް ހައުސިންގ މާކެޓް ނީޑްސް އެންޑް އެސަސްމަންޓް ސްޓަޑީ"ގެ ނަމުގައި ކުރިއަށްގެންދާ މި ދިރާސާގެ މަސައްކަތް އެކި ރަށްރަށުގައި ކުރިއަށް ގެންދަން ފަށާފައިވަނީ މިމަހުގެ ކުރީކޮޅުގައެވެ. މި ދިރާސާގައި އާއްމުންނަށް ގުޅައިގެން އެއްކުރަންޖެހޭ މަޢުލޫމާތު އެއްކުރުމުގެ މަސައްކަތް ނިންމާލާފައިވާއިރު، ސަރވޭގެ މުޅި މަސައްކަތް ނިންމުމަށްޓަކާ ކުރަންޖެހޭ ކަންކަން ކުރަމުންދާކަމަށް ޕްލޭނިންގ މިނިސްޓްރީން ވަނީ ވިދާޅުވެފައެވެ.
ކޯވިޑް-19ގެ ބަލިމަޑުކަމުގެ ސަބަބުން މި ދިރާސާ ކުރިއަށް ގެންގޮސްފައިވަނީ ގޭގެއަށް ޒިޔާރަތްކުރުމުގެ ބަދަލުގައި، ފޯން މެދުވެރިކޮށެވެ. މި ދިރާސާ މެދުވެރިކޮށް އެއްކުރާ މަޢުލޫމާތުގެ ތެރޭގައި ބޯހިޔާވަހިކަމަށް ބޭނުންވާ މިންވަރާއި، މިހާރު ދިރިއުޅޭ ގޭބީސީގެ ޙާލަތާއި، ގޭބިސީގައި ދިރިއުޅޭ މީހުންގެ އަދަދާއި، އަމިއްލަ މިލްކިއްޔާތުގައި ހިމެނޭ ހިޔާވަހިކަމާއި، ގޯތިގެދޮރާއި ގުޅޭ މަޢުލޫމާތާއި، ބޯހިޔާވަހިކަން ހޯދުމުގައި ގޯތިގެދޮރު މިލްކުކުރުމަށް ސަރުކާރުގެ ފަރާތުން ލިބުމަށް އެދޭ އެހީތެރިކަމާއި، ބޯހިޔާވަހިކަމަށް ކުރާ ހޭދަ ދެނެގަތުމަށް ބޭނުންވާ މަޢުލޫމާތު ހިމެނޭކަމަށް ޕްލޭނިންގ މިނިސްޓްރީން ވިދާޅުވެފައިވެއެވެ.
މި ދިރާސާއިން ހޯދާ މަޢުލޫމާތުގެ ތެރެއިން ޝާއިޢު ކުރެވޭނީ، ދިރާސާގައި އެއްކުރެވޭ މަޢުލޫމާތުގެ ޖުމްލަ އަދަދުތަކަށް ބިނާކޮށް ހޯދޭ ހޯދުންތައްކަމަށް ޕްލޭނިން މިނިސްޓްރީން ވިދާޅުވެއެވެ. އަދި ދިރާސާގެ ބައިވެރިންގެ ޒާތީ އެއްވެސް މަޢުލޫމާތެއް ހާމަނުކުރާނެކަމަށާއި އަދި މި ދިރާސާގައި އެއްކުރާ އެއްވެސް މަޢުލޫމާތެއް ތިންވަނަ ފަރާތަކާއި ހިއްސާ ނުކުރާނެކަމަށްވެސް އެ މިނިސްޓްރީން ވިދާޅުވެއެވެ.
ޕްލޭނިންގ މިނިސްޓްރީން ކުރިއަށްގެންދިޔަ މި ދިރާސާއަކީ ނޭޝަނަލް ބިއުރޯ އޮފް ސްޓެޓިސްޓިކްސްގެ ފަރާތުން ދިރާސާ ކުރުމުގެ ހުއްދަ ލިބިގެން ކުރިޔަށްގެންދާ ދިރާސާއެކެވެ. މި ދިރާސާގެ ޒަރިއްޔާއިން އެއްކުރެވޭ މަޢުލޫމާތުގެ އަލީގައި ސަރުކާރުން އެކަށައަޅާ ރާއްޖޭގެ ބޯހިޔާވަހިކަމާއިގުޅޭ ސިޔާސަތުތައް އެކުލަވާލުމާއި ތަންފީޛުކުރުން ހަރުދަނާކުރުމަށް މަގުފަހިވާނެކަމަށް ޕްލޭނިންގ މިނިސްޓްރީން ފާހަގަކުރައްވައެވެ.
ބޯހިޔާވަހިކަން ބޭނުންވާ މިންވަރު ދެނެގަތުމަށްޓަކައި ދިރާސާއެއް ކުރިއަށްގެންގޮސްފައިވާއިރު، 2022 ވަނަ އަހަރު ރާއްޖޭގެ އާބާދީ އާއި ދިރިއުޅޭ ތަންތަނުގެ ބޯހިމެނުން ކުރިއަށްގެންދިޔުމަށްވެސް ވަނީ ނިންމާފައެވެ.